Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 21

21-тӥ ЛЮКЕТ

1Собере мон выль инэз но выль музъемез адӟи; уго азьвылэз ин но, азьвылэз музъем но ортчизы-кошкизы, зарезь но ӧвӧл ни.2Соку мон, Иоанн, Инмысь, Инмар дорысь васькись святой городэз, выль Иерусалимез, адӟи; аслаз кузпалэз понна вылькен кадь чеберъяса со дасямын вал.3Инмысь мон бадӟым куара кылӥ, со шуиз: «Тани, Инмарлэн адямиосын огазьын улон интыез-скинияез, соосын Со огазьын улоз; соос Солэн калыкез луозы, нош Ачиз Инмар соосын огазьын луоз – соослэн Инмарзы луоз.4Инмар соослэн син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ, уго мар вал азьвыл, ваньмыз со ортчиз-кошкиз».

5Престол вылын Пукись шуиз: «Тани, Мон ваньзэ выльзэ кылдытӥсько». Собере Со мыным шуиз: «Гожты, та кылъёс зэмесь, шонересь уго».6Мыным шуиз: «Быдэсмиз! Мон – Альфа но Омега, Кутсконэз но, Пумыз но. Сюэз куасьмем муртлы ошмесысь улэп вуэз дунтэк сёто.7Вормись мурт ваньзэ тае люкетлы басьтоз, солы Мон Инмар луо, нош со Мыным – пи луоз.8Нош кышкасьёслэн, оскисьтэмъёслэн, кырсь-юрӟым муртъёслэн, адями виылӥсьёслэн, азыса-калгыса улӥсьёслэн, туно-пеллёослэн, сульдэръёслы-идолъёслы йыбыртъясьёслэн, вань ӧрекчаськисьёслэн азьпал адӟонзы – тыл, сераен ӝуась ты. Таиз – кыкетӥез кулон».

9Берпуметӥ сизьым вӧсь каронъёсын тырмытэм сизьым чашаен сизьым Кылчинъёс пӧлысь одӥгез мон доры лыктӥз. Со мыным шуиз: «Лык татчы, мон тыныд вылькенэз, Ыжпилэсь кышно луонзэ, возьмато».10Духен тыр луыкум, Кылчин монэ туж бадӟым, ӝужыт гурезь йылэ тубытыса, мыным быдӟым городэз – святой Иерусалимез – возьматӥз. Со Инмысь Инмар дорысь лэзиськиз:11со бордын Инмарлэн пиштӥсь данлыкез вал. Со дуно из кадь, хрустальлы укшась яспис из кадь пиштыса улӥз.12Городэз бадӟым, ӝужыт борддор котыртэ, отын дас кык капкаез, нош со капкаос вылын дас кык Кылчинъёс сыло. Капкаос бордын Израильлэн дас кык выжыосызлэн нимъёссы гожтэмын:13шундыӝужанын куинь капка, уйпалан куинь капка, лымшор палан куинь капка, шундыпуксёнын куинь капка.14Городлэн борддорез дас кык инъет вылын сылэ, соос бордын Ыжпилэн дас кык апостолъёсызлэн нимъёссы гожтэмын.

15Городэз, солэсь капкаоссэ, солэсь борддоръёссэ мертан понна монэн вераськисьлэн кияз зарни бодыез вал.16Город ньыль сэрего, солэн кузьдалаез пасьталаеныз одӥг кадь. Бодыен со городэз мертаз, солэн кузьдалаез дас кык сюрс стадия. Городлэн кузьдалаез но, пасьталаез но, ӝуждалаез но огкадесь.17Солэсь борддорзэ но мертаз. Адями мертэтэн мертаса, со сю ньыльдон ньыль гырпум кузьда, со мертэт Кылчинлэн мертэтэз луэ.18Солэн борддорез яспислэсь пуктэмын, нош ачиз город – чылкыт зарнилэсь, пыр адӟиськись пиялалы укша.19Город борддорлэн инъетэз чеберъямын олокыӵе но дуно изъёсын: нырысетӥ инъетэз – яспис, кыкетӥез – сапфир, куинетӥез – халкидон, ньылетӥез – марӟан из,20витетӥез – сардоникс, куатетӥез – сардис, сизьыметӥез – хризолит, тямысэтӥез – вирилл, укмысэтӥез – топаз, дасэтӥез – хризопрас, дас одӥгетӥез – гиацинт, дас кыкетӥез – аметист.21Нош городлэн дас кык капкаез – со дас кык марӟан пырыос: котькудӥз капка – одӥг марӟан пыры. Городлэн ульчаез – пыр адӟиськись пияла кадь чылкыт зарнилэсь.22Городысь храмез мон ӧй адӟы; уго Дунне Кутӥсь Инмар Кузё-Инмар, Ыжпи – со солэн храмез.23Город шундылэн но, толэзьлэн но югытсылы ёрмыса уг улы, уго Инмарлэн пиштӥсь данлыкез сое югдытыса возе, нош солэн югыт сётӥсез – Ыжпи.24Утем калыкъёс солэн югытаз ветлозы, музъем выл эксэйёс со пушкы асьсэлэсь данлыксэс, сӥзэс-санзэс ваёзы.25Городлэн капкаосыз нуназе уз ворсаськылэ, нош уй отын чик уз луы.26Отчы калыкъёслэсь данлыксэс, сӥ-санзэс ваёзы.27Со пушкы нокыӵе жоб макелэн пыремез уз луы, нокин но юрӟым, ӧрекчи уж лэсьтӥсь уз пыры, пырозы соос гинэ, кинъёс Ыжпилэн улон книгаяз гожтэмын.


предыдущая глава Глава 21 следующая глава