Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 18

18-тӥ ЛЮКЕТ

1Та бере мон инмысь васькись эшшо мукетсэ Кылчинэз адӟи. Солэн туж бадӟым кужымез вал; солэн данэныз музъем пиштыса улӥз.2Со туж кужмо, бадӟым куараен вазиськыса шуиз: «Куашказ, куашказ азыса-калгыса улӥсь быдӟым Вавилон, со периослы улон интылы, вань сьӧд кужымъёслы люкаськон интылы пӧрмиз; вань урод, юрӟым тылобурдоослэн каръяськон интызы луиз; уго аслаз азыса-калгыса улонэзлэн лек винаеныз со вань калыкъёсты кудӟытъяз.3Музъем выл эксэйёс соин азыса-калгыса улӥзы, музъем выл вузчиос солэн туж бадӟым узырлыкеныз узырмизы».

4Соку Инмысь мон мукет тазьы верась куара кылӥ: «Мынам калыке, пот со пушкысь, солэн сьӧлыкъёсаз медад пыриське, солэсь вӧсь каронъёссэ адӟоно медад луэ;5уго солэн сьӧлыкъёсыз Инмозь вуизы, солэсь шонертэм улэм нуналъёссэ Инмар тодаз вайиз.6Солы пунэмзэ тыре озьы, кызьы со тӥледлы тыриз. Ужъёсызъя солы кык полэс пунэмзэ берыктэ. Чашаын со тӥледлы вина дасяз, нош тӥ солы кык полэс кужмозэ дасялэ.7Кӧня со данлык пӧлын, узырлык пӧлын майбыр улӥз, сомында ик солы курадӟонъёс, куректон-кайгуос сётэ. Со уго сюлмыныз шуэ: ”Эксэй кадь пукисько, мон палкышно ӧвӧл, куректон-кайгуэз уг адӟы!”8Соин ик одӥгаз нуналэ со доры вӧсь каронъёс вуозы – кулон, бӧрдон, сютэм улон. Со тылын сутэмын луоз, сое судить карись Инмар Кузё-Инмар кужмо уго.

9Ӝуась тылэз, солэсь ӵынзэ адӟизы ке, бӧрдыны кутскозы, викышъялозы со пумысен соин азыса-калгыса, узырлык пӧлын майбыр улэм музъем выл эксэйёс.10Солэсь курадӟемзэ адӟыса кышкаменызы, палэнын сылозы но шуозы: ”Куректон-кайгу, куректон-кайгу тыныд, Вавилон, туж бадӟым город, юн город! Уго одӥг час куспын судить карон дырыд вуиз”.

11Со понна музъем выл вузчиос но бӧрдозы, викышъялозы, уго нокин но соослэсь вуззэс уз ни окты, –12зарни, азвесь арбериосты, дуно изъёсты но, марӟанэз но, тӧдьы дэраез, порфираез но, буртчинэз, нап-горд дуно басмаез но, ческыт зыно пуосты но, слон лылэсь пӧртэм арбериосты но; дуно пуослэсь, ыргонлэсь, кортлэсь, мраморлэсь пӧртэм тӥрлыкъёсты;13корицаез, фимиамез, мироез но, ладанэз но, винаез но, вӧез но, тӧдьы пызез но, ю-нянез но, пудоез но, ыжъёсты но, валъёсты но, уробоосты но, адями мугорез но, лулэз но.14Лулыдлэн кулэ карон емышъёсыз но тон дорысь кошкизы, ваньмыз умоез, югытэз тон бордысь палэнскиз, – тон сое уд ни шедьты.15Ваньмыныз таин вузкарисьёс, соин узырмемъёс, солэсь курадӟемзэ адӟыса, кышкаменызы палэнын сылозы, бӧрдозы, викышъялозы16но шуозы: ”Куректон-кайгу, куректон-кайгу тыныд, туж бадӟым город, тӧдьы дэраен но порфираен, нап-горд дуно басмаен дӥсяськем но зарниен, дуно изъёсын, марӟанэн чеберъяськем город!17Одӥг час куспын та быдӟа узырлык ышиз-быриз!”

Соку ваньмыз пыжез валтӥсьёс, пыжъёсын уяса мынӥсьёс, вань пыж кузёос, ваньмыз зарезь вылын ужасьёс палэнэ кариськизы18но, солэсь ӝуамзэ, ӵынзэ адӟыса, бадӟым куараен кеськыса шуизы: ”Кыӵе город вань на та бадӟым городлы укшасез?!”19Йыр вылъёсазы пень пызьназы но бӧрдыса, викышъяса кеськизы: ”Куректон-кайгу, куректон-кайгу тыныд, туж бадӟым город! Ваньмызлэн, кинъёслэн зарезь вылын пыжъёссы вал, солэн дуно арбериосыныз ваньзы соос узырмизы. Нош одӥг час куспын ваньмыз со быриз!”

20Та пумысен шумпотэ-шулдыръяське, Ин но, святой апостолъёс но, пророкъёс но, уго Инмар тӥ понна сое судить кариз».

21Соку одӥгез кужмо Кылчин бадӟым вуко кӧлы укшась изэз басьтыса зарезе куштӥз но тазьы шуиз: «Таӵе ик ӝоглыкен куштэмын луоз Вавилон но, туж бадӟым город, со пырак ӵожелы быроз.22Крезен шудӥсьёслэн, кырӟасьёслэн, чипчирган шудӥсьёслэн, гумы пеллясьёслэн тон дорын куаразы уз ни кылӥськы; тон дорын нокыӵе усточиос но, нокыӵе киуж устолыкъёс но уз ни луэ, тон дорын вуко кӧлэн дыбыртэмез но уз ни кылӥськы;23Лампадалэн югытэз но тон дорын уз ни пишты; эмеспилэн но, вылькенлэн но куаразы тон дорын уз ни кылӥськы: уго тынад вузчиосыд музъем вылын кузёяськыса улӥзы, вань калыкъёсты син пӧртманэныд йыромытыса возид.24Пророкъёслэн, святойёслэн, музъем вылын вань вием муртъёслэн вирзы со пушкысь шедьтэмын».


предыдущая глава Глава 18 следующая глава