Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 12

12-тӥ ЛЮКЕТ

1Инмын бадӟым тодмет возьматскиз – шундыен шобырскем кышномурт. Солэн пыд улаз толэзь, йыр вылаз дас кык кизилиё венец понэмын.2Со секытэн вал, нылпи ваёнэн курадӟыса, вӧсь луэмезлы чидатэк, со кеськиз.

3Инмын эшшо мукет тодмет возьматскиз: тани, бадӟым горд лобась кый – сизьым йыро, дас сюро, йыръёсыз вылын сизьым венец изьыосыз вань.4Аслаз быжыныз со инмысь кизилиос пӧлысь куинетӥ люкетсэ кыскыса нуиз но музъем вылэ куштӥз. Та лобась кый нуны вайыны дасяськем кышномурт азе султӥз, – нуны вайиз ке, солэсь пиналзэ сиыны вылысь.5Соку кышномурт пи нуны вайиз, со вань калыкъёсты корт эксэй бодыен возьманы кулэ луоз. Солэн нуныез Инмар доры, Солэн престол дораз ӝутэмын вал.6Нош кышномурт кыр дуннее пегӟиз, отчы солы Инмарен инты дасямын вал; отын сюрс кык сю куатьтон нунал ӵоже со сюдыса воземын луыны кулэ.

7Инмын ожмаськон потӥз: Михаил аслаз Кылчинъёсыныз лобась кыйлы пумит ожмаськизы, нош лобась кый аслаз кылчинъёсыныз соослы пумит ожмаськизы,8но пумитъяськыны кужымзы ӧз ни тырмы, Инмын соослы инты ӧз ни кыльы.9Со куспын туж бадӟым лобась кый, вашкала кый, сэрпалтэмын вал, сое диавол, шайтан шуыса нималлязы. Быдэс дуннелэсь визьзэ тугасез музъем вылэ сэрпалтӥзы, солэсь кылчинъёссэ но асэныз огазе куштӥзы.10Соку Инмысь бадӟым куараен верамез мон кылӥ: «Табере вуиз утиськон, кужым, Инмармылэн эксэйлыкез, Солэн Христосэзлэн властез! Агай-вынъёмес янгыше уськытӥсь, соос сярысь Инмармы азьын уй но нунал янгыше уськытӥсь кылъёс верась табере сэрпалтэмын.11Ыжпилэн виреныз, асьсэлэн тодытэм-ивортэм кылынызы сое соос вормизы. Асьсэлэсь лулзэс ӧз жалялэ, виёнэн ке но соосты кышкатъязы.12Со понна ик, Инъёс, Инмын вань улӥсьёс, шулдыръяське! Нош музъем вылын, зарезьын улӥсьёслы куректон-кайгу: тӥ доры туж бадӟым йыркурен диавол васькиз, – со тодэ уго, солы ӧжыт дыр кылемын ни шуыса».

13Лобась кый со музъем вылэ сэрпалтэмын ни шуыса адӟем бераз пи нуны ваем кышномуртэз уйылыны кутскиз.14Нош кышномуртлы бадӟым ӧрӟилэн кык бурдыз сётэмын вал, кыйлэн син азьысьтыз кыр дуннее аслаз интыяз со мед лобӟоз, но отын дыр, дыръёс но ӝыны дыр ӵоже кӧтсэ тырыса мед улоз шуыса.15Кышномуртлэн бӧрсяз кый ымысьтыз шур кадь ву лэзиз, сое шур ву гылтыса мед нуоз шуыса.16Но музъем кышномуртлы юрттӥз: аслэсьтыз ымзэ музъем усьтӥз но лобась кыйлэсь ымысьтыз лэзем шурзэ ньылӥз.17Соку лобась кыйлэн кышномуртлы туж зол вожез потӥз но солэн кидысысьтыз-выжыысьтыз вань потэмъёсын, Инмарлэсь курон-косонъёссэ утьыса улӥсьёсын, Иисус Христослэсь тодытонзэ возисьёсын, ожмаськыны мынӥз.


*а 12:14 дыр, дыръёс но ӝыны дыр – лыдъяло, та лыдпус куинь но ӝыны арлы тупа шуыса


предыдущая глава Глава 12 следующая глава