Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 11

11-тӥ ЛЮКЕТ

1Корт бодылы укшась ньӧр сётэм беразы мыным шуизы: «Султыса Инмар храмез мерта, курбон сётон интыез но отысь йыбыртъясьёсты лыдъя.2Нош храмлэсь педло пал азбарзэ лыдэ эн басьты, эн мерта сое, со уго язычникъёслы сётэмын: соос ньыльдон кык толэзь ӵоже святой городэз лёгаса-ӝикатыса возёзы.3Аслам кыкезлы адӟисьёсылы-ивортӥсьёсылы эрик сёто, соос, бышкись ӟустари дӥськут дӥсяса, сюрс кык сю куатьтон нунал ӵоже азьпалзэ тодытыса улозы».4Соос – музъемлэн Инмарез азьын сылӥсь кык вӧйпуос, кык лампадаос.5Кин ке соослы изъян лэсьтыны малпаз ке, соку ик соослэн ымысьтызы тыл потоз но соослэсь тушмонъёссэс ньылоз. Кин ке соосты ӝоже уськытыны малпаз ке, со виемын луоз.6Азьпалзэ тодытыса улон нуналъёсазы музъем вылэ медаз зоры шуыса, инмез ворсаны соослэн кужымзы вань. Куке мылзы потӥз, соку соослэн вуосты вирлы пӧрмытыны но музъем вылэ пӧртэм вӧсь каронъёс вайыны кужымзы вань.

7Веранзэс-ивортонзэс йылпумъямзы бере пыдэстэм дуннеысь потӥсь пӧйшур соосын ожмаськоз, соосты вормоз, виёз.8Соослэн шӧйзы духовной Содом но Египет шуыса нимаськись быдӟым городлэн ульчаяз кыллёз, отын асьмелэн Кузё-Инмармы кортӵогамын вал.9Пӧртэм калыкъёс, выжыос, пӧртэм кылын вераськисьёс, улыос-бечеос, соослэн шӧйёссы шоры учкыса, куинь но ӝыны нунал ӵоже улозы, соослэсь шӧйёссэс шайгуэ поныны уз лэзе.10Та понна музъем вылын улӥсьёс шумпотозы, шулдыръяськозы, огзылы огзы саламъёс-кузьымъёс ыстозы, малы ке шуоно та кык пророкъёс музъем вылын улӥсьёсты курадӟытӥзы.11Нош куинь но ӝыны нунал ортчыса, пророкъёс пушкы Инмарлэн улон сётӥсь духез пыриз, соку соос кыксы ик пыд йылазы султӥзы; ваньзы тае адӟисьёс туж юн куалектӥзы.12Соку Инмысен бадӟым куараен соослы тазьы верамез кылӥзы: «Татчы тубе». Пилем вылын соос Инме тубизы; нош тушмонъёссы соос шоры учкыса сылӥзы.13Со куспын ик музъем туж кужмо зурказ, городлэн дасэтӥ люкетэз куашказ. Музъем зуркаку, сизьым сюрс адями быриз, нош улэп кылемъёс туж кышкатскизы но Инмысь Инмарез данъяны кутскизы.

14Кыкетӥез куректон-кайгу ортчиз но, тани, со бӧрсьы ик куинетӥез куректон-кайгу вуэ ини.

15Сизьыметӥез Кылчин гумызэ пельтэм бере Инмын кужмоесь, тазьы верась куараос кылӥськизы: «Дуннелэн эксэйлыкез Кузё-Инмармылэн но Солэн Христосэзлэн Эксэйлыкез луиз, Со пумтэм вапумъёс ӵоже Эксэй луоз».16Соку кызь ньыль пересь визьнодчиос, Инмар азьын асьсэлэн престолъёссы вылын пукисьёс, ымныр вылазы уськытскыса, Инмарлы йыбырттыса17шуизы:

«Дунне Кутӥсь Инмар Кузё-Инмармы,
тау кариськомы Тыныд! Тон вань, Тон вал, Тон лыктод!
Туж бадӟым кужымез Тон Ас киулад басьтӥд но
пумтэм вапумъёслы эксэй престол вылэ пуксид.
18Йыркурен пачылмизы язычникъёс;
соку вуиз Тынад вожпотонэд, кулэмъёсты судить карон дырыд.
Аслад ляльчиосыдлы, пророкъёсыдлы, святойёсыдлы,
Тынад нимыдлэсь кышкасьёслы,
покчиослы но, бадӟымъёслы но мед-кузьым сётъян,
нош музъемез саптасьёсты быдтон дырыд вуиз».

19Инмын Инмарлэн храмез усьтӥськиз но, Солэн храмаз сӥзён-косонэзлэн ковчегез адӟиськиз. Соку ик чилекъяны кутскиз, куараос шуккиськизы, гудыръяз, музъем зурказ, туж кужмо йӧзор усиз.


предыдущая глава Глава 11 следующая глава