Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 9

9-тӥ ЛЮКЕТ

1Витетӥез Кылчин гумызэ пельтэм бере инмысь музъем вылэ усем кизилиез мон адӟи. Солы пыдэстэм дуннее пырон гулэн усьтонэз сётэмын вал. 2Со пыдэстэм дуннее пырон гуэз усьтӥз но, отысь бадӟым гурысь кадь ӵын потӥз. Со ӵынэн сэрен шунды но, омыр но пеймытомизы. 3Ӵын пӧлысь музъем вылэ саранча потӥз. Музъем вылысь скорпионъёслэн кадь саранчалы кужым сётэмын вал. 4Солы верамын вал, музъем вылысь турынлы, нокыӵе турын-куарлы, нокыӵе писпулы но изъян медаз лэсьты, кымесазы Инмарлэн печатез луымтэ адямиослы гинэ изъян мед лэсьтоз шуыса. 5Саранчалы адямиосты виылыны лэземын ӧй вал, вить толэзь ӵоже курадӟытыны гинэ лэземын вал; скорпион адямиез лексем бере кадь ик саранча лексем бере но висьыса курадӟоно. 6Со нуналъёсы адямиос кулон утчалозы, но сое уз шедьтэ; кулэмзы потоз, нош кулон соос дорысь пегӟоз.

7Аслаз вылтусызъя саранча ожмаськонэ дасям валъёслы укша вал. Саранчалэн йыр вылаз зарни венецлы укшась макеез вал. Солэн ымнырыз адями ымныръёслы укша. 8Солэн йырсиосыз – кышномуртлэн йырсиосыз кадесь, нош пиньёсыз – сьӧсь пӧйшурлэн вазерпиньёсыз кадесь; 9солэн вылаз утиськон дӥсез корт дӥсь кадь, нош бурдызлэн куараез трос валъёслэн ожмаськонэ ворттыкузы кыткем уробооссылэн дыбыртэмзылы укша. 10Солэн быжъёсыз скорпионъёслэн кадесь, быжъёсыз йылын шиосыз. Вить толэзь ӵоже адямиослы изъян лэсьтыса улыны солы эрик сётэмын. 11Пыдэстэм дуннелэсь кылчинзэ со аслыз эксэй кариз; еврей сямен солэн нимыз Аваддон, нош грек сямен – Аполлион.

12Одӥгез куректон-кайгу ортчиз, тани, со бӧрсьы эшшо кыкез куректон-кайгуос лыкто.

13Куатетӥез Кылчин гумыез пельтэм бере мон кылӥ Инмар азьын сылӥсь зарнилэсь лэсьтэм курбон сётон ӝӧкысь ньыль сюръёсысь потӥсь одӥг куараез.14Куатетӥ Кылчинлы, кудӥзлэн гумыез вал, со шуиз: «Туж бадӟым Ефрат шур дуре думылэм ньыль Кылчинъёсты мозмыты».15Соку та часлы но нуналлы, толэзьлы но арлы – адямиос пӧлысь куинетӥ люкетсэ быдтыны дасям ньыль Кылчинъёс мозмытэмын вал.16Мон кылӥ, вал вылын ожмаськисьёслэн лыдзы кызь сюрс пол дас сюрс шуыса.17Аслам адӟонам валъёсты но соос вылын пукисьёсты мон таӵеен адӟи: утиськон корт дӥсьсы тыллэсь, гиацинтлэсь, сералэсь; валъёслэн йыръёссы левлэн йырызлы укшало; ым пушкысьтызы тыл, ӵын, сера потыса улӥз.18Та куинь вӧсь каронъёсын, соослэн ымысьтызы потӥсь тылэн, ӵынэн, сераен адямиос пӧлысь куинетӥ люкетэз быдтэмын вал.19Валъёслэн кужымзы ымазы, быжъёссы бордын улӥз, уго соослэн быжъёссы кый выллемесь, йыръёссы вань, соинызы соос адямиослы изъян лэсьтылӥзы.

20Нош мукетъёсыз, та вӧсь каронъёслэсь кулымтэ адямиос, ас киынызы лэсьтэм ужъёссы понна ӧз ӧпкеле. Соос периослы, нош озьы ик зарнилэсь, азвесьлэсь, ыргонлэсь, излэсь, пулэсь лэсьтэм, адӟыны но, кылыны но, ветлыны но быгатӥсьтэм сульдэръёслы-идолъёслы йыбыртъямысь ӧз дугдэ.21Адями виылэмъёссы, тунаськыса-пелляськыса, азыса-калгыса, лушкаськыса улэмъёссы понна соос ӧз ӧпкеле.


*а 9:11 аполлион«виылӥсь-быдтӥсь» шуэм луэ


предыдущая глава Глава 9 следующая глава