Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 8

8-тӥ ЛЮКЕТ

1Со сизьыметӥзэ печатез басьтэм бере Инмын чус-чус луиз, озьы ог ӝыны час мында улӥз. 2Соку мон сизьым Кылчинъёсты адӟи, соос Инмар азьын сылӥзы. Кылчинъёс кие сизьым гумы сётӥзы.

3Эшшо мукетыз Кылчин лыктӥз но, зарни ӵындытон сосудэз кутыса, курбон сётон ӝӧк азе султӥз. Солы трос-трос фимиам сётэмын вал, вань святойёслэн вӧсяськонэнызы сое престол азьысь зарнилэсь лэсьтэм курбон сётон ӝӧк вылэ мед поноз шуыса. 4Святойёслэн вӧсяськонэнызы ӵош фимиамлэн ӵыныз Кылчинлэн киысьтыз Инмар азе ӝутскиз. 5Кылчин ӵындытон сосудэз басьтӥз, курбон сётон ӝӧкысь тылэн сое тырмытӥз но музъем вылэ куштӥз. Соку ик куараос шуккиськизы, гудыръяз, чилекъяз, музъем зурказ.

6Сизьым гумыен сизьым Кылчинъёс пелляны дасяськизы.

7Нырысетӥез Кылчин гумызэ пельтӥз но, вирен сураськем йӧзор, тыл музъем вылэ усьылыны кутскизы. Соку писпуос пӧлысь куинетӥ люкетэз ӝуаса быриз, вань вож турын-куар но ӝуаса быриз.

8Кыкетӥез Кылчин гумызэ пельтӥз но, гомаса тылын ӝуась бадӟым гурезьлы укшась маке зарезе усиз. Соку зарезьлэн куинетӥ люкетэз вирлы пӧрмиз. 9Соку зарезьын улӥсь макеос пӧлысь куинетӥ люкетэз кулӥз; пыжъёс-судноос пӧлысь куинетӥ люкетэз быриз.

10Куинетӥез Кылчин гумызэ пельтӥз но, инмысь, ӝуась сэрегпум кадь, бадӟым кизили вань шуръёс пӧлысь куинетӥ люкетэз вылэ, ву сётӥсь ошмесъёс вылэ усиз. 11Та кизилилэн нимыз «Курытпот». Соку вуос пӧлысь куинетӥ люкетэз курытпот кадь кузял луиз. Трос адямиос та вуэз юыса кулӥзы, уго со укыр курыталэс кузял луиз.

12Ньылетӥез Кылчин гумызэ пельтэм бере шундылэн куинетӥ люкетэз, толэзьлэн куинетӥ люкетэз, кизилиослэн куинетӥ люкетсы сӧриськиз, озьы ваньзылэн куинетӥ люкетэз пеймытомиз; нуналлэн куинетӥ люкетэз югыттэк кылиз, озьы ик уйлэн но.

13Мон адӟи, мон кылӥ инбам шортӥ лобись одӥгзэ Кылчинэз, со бадӟым куараен вераз: «Куинь Кылчинъёслэн мукет гумыосын пелляса поттэм куараоссылэсь куректон-кайгу, куректон-кайгу, куректон-кайгу луоз музъем вылын улӥсьёслы!»


предыдущая глава Глава 8 следующая глава