Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 7

7-тӥ ЛЮКЕТ

1Нош та бере мон ньыль Кылчинъёсты адӟи. Соос музъемлэн ньыль пал сэрегаз сыло но музъемлэсь ньыль тӧлъёссэ кутыса уло, одӥгез но тӧл музъем вылэ но, зарезь вылэ но, нокыӵе писпу вылэ но медаз пельты шуыса. 2Собере мон адӟи мукетсэ, шунды ӝужанысь ӝутскись Кылчинэз, со киын Улэп Инмарлэн печатез вал. Со бадӟым куараен музъемлы но, зарезьлы но изъян лэсьтыны эрик сётэм ньыль Кылчинъёслы черетскиз: 3«Милям Инмармылэн ляльчиосызлэн кымес вылазы печать пуктытозямы, музъемлы но, зарезьлы но, писпуослы но изъян эн лэсьтэ». 4Соку мон кылӥ печать пуктэм муртъёслэсь лыдзэс: сю ньыльдон ньыль сюрс мурт. Израиль пиослэн вань выжыоссы пӧлысь вал соос. 5Иудалэн выжыысьтыз дас кык сюрсэзлы печать пуктэмын; Рувим выжыысь дас кык сюрсэзлы; Гад выжыысь дас кык сюрсэзлы; 6Асир выжыысь дас кык сюрсэзлы; Неффалим выжыысь дас кык сюрсэзлы; Манассий выжыысь дас кык сюрсэзлы; 7Симеон выжыысь дас кык сюрсэзлы; Левий выжыысь дас кык сюрсэзлы; Иссахар выжыысь дас кык сюрсэзлы; 8Завулон выжыысь дас кык сюрсэзлы; Иосиф выжыысь дас кык сюрсэзлы; Вениамин выжыысь дас кык сюрсэзлы печать пуктэмын.

9Та бере мон учки но, тани, адӟисько: туж-туж трос калык, соосты нокин но лыдъяны ӧз быгаты. Вань выжыос, калыкъёс, пӧртэм кылын вераськисьёс, улыос-бечеос пӧлысь вал соос; престол азьын, Ыжпи азьын сыло, тӧдьы дӥськутэн, киосазы пальма вайёс. 10Соос бадӟым куараен тазьы вераса черетскылӥзы: «Престол вылын пукись Инмармылэн но Ыжпилэн кияз утиськон!» 11Вань Кылчинъёс престол котырын, пересь визьнодчиос, ньыль улэп макеос котырын сылӥзы, престол азе ымныр вылазы уськытскыса, Инмарлы йыбырттыса 12шуизы: «Аминь! Бакельлыко, данлыко, ваньмызлэсь визьлыко, кужымо, юнлыко милям Инмармы, Солы тау кариськомы, Сое данъяськомы пумтэм вапумъёс ӵоже. Аминь».

13Пересь визьнодчиос пӧлысь одӥгез мынэсьтым юаз: «Кинъёс та тӧдьы дӥськутэн дӥсяськемъёс, кытысь лыктэмъёс?» 14Мон солы шуи: «Кузёе, тон тодӥськод». Со мыным шуиз: «Та адямиос туж бадӟым курадӟон-куректон пыр потэмын, Ыжпилэн вирыныз соос дӥськутсэс миськизы, чылкыт, тӧдьы каризы. 15Со понна табере соос Инмарлэн престол азяз уло, Солэн храмаз уй но нунал Солы служить каро. Престол вылын Пукись соос пушкы улыны интыяськоз. 16Соослэн табере кӧтсы но уз ни сюма, сюзы но уз ни куасьмы; шунды но соосты уз ни ӵушка, нокыӵе ӵушкась пӧсь но уз ни суты, 17уго престол шорысь Ыжпи соосты возьмалоз, улэп вуэн ошмесъёс доры соосты Со нуллоз, синмысьтызы вань синвузэс Инмар ӵушоз».


предыдущая глава Глава 7 следующая глава