Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 6

6-тӥ ЛЮКЕТ

1Мон адӟи, кызьы Ыжпи сизьым печать пӧлысь нырысетӥзэ басьтӥз. Соку ньыль улэп макеос пӧлысь одӥгезлэсь гудыри выллем куараен верамзэ мон кылӥ: «Лыкты но учкы».2Мон учки но, тани, адӟисько: тӧдьы вал. Вал вылын пукисьлэн кияз пукыӵез вань, солы венец сётӥзы. Соку со, вормон басьтӥсь кадь, вормон басьтыны потӥз.

3Со кыкетӥзэ печатез басьтэм бере мон кылӥ кыкетӥезлэсь улэп макелэсь тазьы шуэмзэ: «Лыкты но учкы».4Соку потӥз мукетыз вал – тыл кадь гордэз. Вал вылын пукисьлы музъем вылысь тупаса улонэз басьтыны, адямиослы ог-огзэс виылыны эрик сётэмын. Солы бадӟым меч сётӥзы.

5Со куинетӥзэ печатез басьтэм бере мон кылӥ куинетӥезлэсь улэп макелэсь тазьы шуэмзэ: «Лыкты но учкы». Мон учки но, тани, адӟисько: сьӧд вал, вал вылын пукисьлэн кияз мертаськон весэз вань.6Ньыль улэп макеос пушкысь мон куара кылӥ, со куара шуиз: «Одӥг мертэт чабей динариен сётӥське, куинь мертэт йыды динариен сётӥське; нош вӧез но, винаез но эн сапта».

7Со ньылетӥзэ печатез басьтэм бере мон ньылетӥезлэсь улэп макелэсь тазьы шуэм куаразэ кылӥ: «Лыкты но учкы». 8Мон учки но, тани, адӟисько: тӧдьыпыр пурысялэс вал, вал вылын пукисьлэн нимыз: «Кулон». Со бӧрсьын ад мынэ. Солы музъемлэн ньылетӥ люкетэныз кузёяськыны – мечен виылыны, сютэм улон пыр, урод висёнъёс пыр, кыр пӧйшуръёслы кесяса виылыны-быдтыны эрик сётэмын.

9Со витетӥзэ печатез басьтэм бере курбон сётон улысь Инмар кыл понна, сое тодытэмзы понна виылэмъёслэсь лулъёссэс мон адӟи. 10Нош соос бадӟым куараен кеськыса веразы: «Дун-Сьӧлыктэм, Зэмлыко Кузё-Атай, малы татчыозь судить уд кариськы, музъем вылын улӥсьёслы милесьтым вирмес кисьтэмзы понна пунэмзэ уд берыктӥськы?» 11Соослы ваньзылы тӧдьы дӥськут сётӥзы, соослы шуизы: «Эшшо кӧня ке гинэ дыр – тӥледын ӵош ужась-тыршисьёсты, агай-вынъёстэс тӥледыз кадь ик виытозязы, – курадӟытэмъёслэн лыдпуссы тырмыт луытозь, чидалэ на».

12Со куатетӥзэ печатез басьтэм бере мон учки но, тани, туж кужмо музъем зуркан луиз. Шунды пеймытомиз, чурыт гонлэсь урдэг дӥсян кадь луиз, толэзь вир кадь луиз. 13Соку инмысь кизилиос музъем вылэ усизы озьы, кызьы кужмо тӧл пельтыку, смоквапу аслэсьтыз кисьмамтэ мульыоссэ уськытъя. 14Инбам, куасам кагаз кадь погыльскыса, ватскиз. Вань гурезьёс, вань шормуӵъёс сылон интыысьтызы вырӟизы. 15Музъем вылысь эксэйёс, кузёйыръёс, узыръёс, сюрс солдатэн кивалтӥсьёс, кужмоос но, вань ляльчиос но, вань эрико адямиос но гурезьёсысь гуосы, гурезь висъёсы пегӟылӥзы 16но гурезьёслы, изъёслы шуо: «Ми вылэ усе, милемыз престол вылын Пукисьлэн ымныр азьысьтыз ватэ, Ыжпилэн вожпотонэзлэсь ватэ. 17Уго Солэн туж бадӟым вожпотонэзлэн нуналыз вуиз, кин табере утиськыны-возиськыны быгатоз на?»


*а 6:6 мертэт – грек кылын: хиникс – одӥг нуналлы, одӥг муртлы кӧтсэ тырымон нянь мертэт;

*б 6:6 динарий – коньдон; медъяськем муртлэн одӥг нуналлы уждунэз


предыдущая глава Глава 6 следующая глава