Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 5

5-тӥ ЛЮКЕТ

1Соку мон престол вылын Пукисьлэн бур киысьтыз книгазэ адӟи. Со мыд-мыд палтӥз гожъямын, сизьым печатен юнматэмын.2Собере мон кужмо Кылчинэз адӟи, со туж бадӟым куараен ивортылӥз: «Кин ярамон-сылӥсь луэ та книгаез усьтыны, солэсь печатьёссэ басьтыны?»3Нош нокин но Инмын но, музъем вылын но, музъем улын но та книгаез усьтыны, пушказ учкыны но ӧз быгаты.4Та книгаез усьтыны, лыдӟыны, пушсэ учкыны нокин но ярамонэз-сылӥсез сюрымтэ понна мон трос бӧрдӥ.5Соку пересь визьнодчиос пӧлысь одӥгез мыным шуиз: «Эн бӧрды. Тани, Давидлэн выжыысьтыз, Иуда выжыысь лев вормиз. Со быгатэ та книгаез усьтыны но солэсь сизьым печатьсэ басьтыны».

6Мон учки но, тани, адӟисько: престол шорын, ньыль улэп макеослэн шоразы, пересь визьнодчиос пӧлын сылэ Ыжпи, – Со вандэм ыжпилы укша вал. Сизьым сюрез, сизьым синмыз вань – со Инмарлэн быдэс дунне вылэ ыстэм сизьым духъёсыз луо.7Со лыктӥз но престол вылын Пукисьлэн бур киысьтыз книгаез басьтӥз.8Со книгаез басьтэм бере ньыль улэп макеос но кызь ньыль пересь визьнодчиос Ыжпи азе ымныр вылазы уськытскизы. Ваньзылэн киязы крезьзы вал, фимиамен тырмытэм зарни чашаоссы, – со луэ святойёслэн вӧсяськонзы.9Выль кырӟан мытыса веразы:

«Книгаез кутыны но солэсь печатьсэ басьтыны Тыныд яра;
Тон уго вандэмын вал, но Аслад Вирыныд
Инмарлы милемыз сьӧлыклэсь мозмытыса,
котькыӵе выжыос, котькыӵе кылъёсын вераськисьёс,
калыкъёс, улыос-бечеос пӧлысь поттӥд.
10Милемыз эксэйёс, Инмармылы священникъёс карид.
Музъем вылын ми эксэй луыса уломы».

11Адӟи мон, кылӥ престол котырысь трос Кылчинъёслэсь куаразэс, улэп макеосты но, пересь визьнодчиосты но, соослэн лыдзы дас сюрсъёс пол дас сюрсъёс, сюрсъёс пол сюрсъёс вал.12Соос бадӟым куараен вераллязы:

«Вандэм Ыжпи кужым басьтыны,
узырлык, бадӟым визьлык, юнлык, сӥ-сан, данлык басьтыны
ушъяны-данъяны ярамон-сылӥсь луэ».

13Собере мон кылӥ, кызьы Инмын но, музъем вылын но, музъем улын но, зарезь вылын но улӥсь вань кылдытэм макеос, – ваньмыз, мар соос пушкын вань, ваньзы шуылӥзы:

«Престол вылын Пукись, Ыжпи пумтэм вапумъёс ӵоже
бакельлыко, сӥё-сано, данлыко, кужымо мед луоз».

14Нош ньыль улэп макеос шуизы: «Аминь». Соку кызь ньыль пересь визьнодчиос пыдес вылазы уськытскизы но пумтэм вапумъёсы Улӥсьлы йыбырттӥзы.


предыдущая глава Глава 5 следующая глава