Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 3

3-тӥ ЛЮКЕТ

1Сардис черклэн Кылчинэзлы гожты: «Со, Кинлэн кияз Инмарлэн сизьым духъёсыз вань, сизьым кизилиез вань, тазьы шуэ: тодӥсько тынэсьтыд ужъёстэ, улэп шуыса нимаськиськод, но тон кулэмын.2Сайка! Мукетъёссэ но кулонлы матэ вуэмъёсты юнматы. Мон уго Инмаре азьысь тынэсьтыд дун-шектэмесь ужъёстэ уг шедьтӥськы, уг адӟиськы.3Тодад вай, мае тон кабыл басьтӥд, мае кылӥд, уть сое, ӧпкельыса сьӧлыкъёсыдлэсь куштӥськы. Нош ӧд ке сайка, соку Мон тон доры шӧдтэк шорысь лушкаськись кадь лыкто, тон уд но тоды кыӵе часын дорад вуэмме.4Но тон дорын, Сардисын, кӧня ке но адямиос вань, кудъёсыз асьсэлэсь дӥськутсэс ӧз сапталэ. Соос Монэн огазьын тӧдьы дӥськутэн ветлозы, – соос тӧдьы дӥськутэн ветлыны ярамонэсь луизы уго.5Вормись мурт тӧдьы дӥськутэн дӥсямын луоз. Солэсь нимзэ улон книгаысь уг ӵушы, солэсь нимзэ Аслам Атае азьын, Солэн Кылчинъёсыз азьын ватытэк верало.6Кылыны пельыз вань мурт – мед кылоз. Кылзы, Дух мар вера черкъёслы».

7Филадельфия черклэн Кылчинэзлы гожты: «Дун-Сьӧлыктэм, Зэмлыко, Давидлэсь усьтонзэ Возись, – Со усьтэ ке, сое нокинлэн но ворсамез уз ни луы, нош ворса ке, нокинлэн но усьтэмез уз ни луы, – тазьы шуэ:8Тодӥсько тынэсьтыд ужъёстэ. Тани, Мон тон азьысь ӧсэз усьтӥ но, сое нокин но ворсаны уг ни быгаты. Тынад трос кужымед ӧвӧл ке но, Мынэсьтым кылме утид, Мынам нимылэсь ӧд куштӥськы.9Тани, шайтанлы тэрытскыса улӥсьёсын, асьсэды иудейёс шуисьёсын, – нош зэмзэ ке верано, соос иудейёс ӧвӧл, соос ӧрекчаськисьёс, – тани, Мон лэсьто озьы, соос лыктозы но тынад пыд выжыяд йыбырттозы, соос тодозы, Мон тонэ яратӥ шуыса.10Тон Мынэсьтым чиданы косэм кылме санэ понӥд, соин ик Мон тонэ визь сынаськон вакытэ утьыса возё, кудӥз быдэс дунне вылэ лыктоз музъем вылын вань улӥсьёсты чаклан-эскерон понна.11Тани, Мон ӝоген лыкто. Уть, маид вань, тынэсьтыд венецтэ нокин но медаз лушка.12Вормисез Инмарелэн храмезлы юбо каро, отысь собере со уз ни поты. Со вылэ Инмарелэсь нимзэ, Инмарелэн городэзлэсь, Инмысь, Инмаре дорысь васькись выль Иерусалимлэсь, нимзэ гожто, Аслэсьтым выль нимме гожто.13Кылыны пельыз вань мурт – мед кылоз. Кылзы, Дух мар вера черкъёслы».

14Лаодикия черклэн Кылчинэзлы гожты: «Тазьы шуэ Аминь, оскиськымон, зэмос тодытӥсь, Инмарлэн кылдытонэзлэн кутсконэз:15Тодӥсько тынэсьтыд ужъёстэ; тон кезьыт но ӧвӧл, пӧсь но ӧвӧл. Э, луысалыд ке тон кезьыт яке пӧсь!16Но тон шуныт гинэ бере, пӧсь но ӧвӧл, кезьыт но ӧвӧл, соин ик тонэ кылам-ымам но уг ни поны – педло кушто.17Тон шуиськод уго: ”Мон узыр, узырми, номырлы но ёрмыса уг улӥськы”, нош ачид уд тодӥськы, тон шудтэм, мискинь, куанер, синтэм, гольык кылем мурт луиськод шуыса.18Мед узырмод шуыса, Тыныд ӵектӥсько Мынэсьтым тылын сузям-чылкытатэм зарниме дунэн басьтыны. Дӥсяны тӧдьы дӥськут басьты, – гольыкедлэн юрӟымез медаз адӟиськы. Адӟыны быгатӥсь мед луод шуыса, син зырӟон эмъюмен синдэ зырӟы.19Кинъёсты Мон яратӥсько, соосты шарае поттӥсько, вӧсь но карисько. Озьыен, тыршись лу, ӧпкельыса сьӧлыкъёсыдлэсь куштӥськы.20Тани, Мон ӧс дорын йыгаськыса сылӥсько: кин, Мынэсьтым куараме кылыса, ӧсэз усьтӥз ке, со доры пыро но соин ӵош ӝыт нянь сиё, со но Монэн ӵош ӝыт нянь сиёз.21Вормисьлы Асэным ӵош Аслам престол вылам пуксьыны луонлык сёто, кызьы Мон но вормем берам Аслам Атаеным ӵош Солэн престол вылаз пукси.22Кылыны пельыз вань мурт – мед кылоз. Кылзы, Дух мар вера черкъёслы».


предыдущая глава Глава 3 следующая глава