Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИОАНН АПОСТОЛЛЫ УСЬТӤСЬКОН

Глава 2

2-тӥ ЛЮКЕТ

1Ефес черклэн Кылчинэзлы гожты: «Сизьым кизилиосты Аслаз бур кияз Возись, сизьым зарни лампадаос пӧлтӥ Ветлӥсь тазьы шуэ:2Тодӥсько тынэсьтыд ужъёстэ, тыршыса ужамдэ но, чидандэ но. Тодӥсько сое но, кызьы тон кескич адямиосты адӟонтэм кариськод; чаклад-эскерид асьсэды ”апостолъёс” шуыса нимасьёсты, нош соос апостолъёс ӧвӧл, тон валад, соос ӧрекчи дышетӥсьёс луо шуыса.3Тон трос секытэз адӟоно луид, чиданы быгатӥсь луид. Мынам нимы понна ужад-тыршид, жадёнлы ӧд сётӥськы.4Но тыныд пумит Мынам таӵе веранэ вань: кутсконаз кыӵе тынад яратонэд вал, нош табере со тынад сӥяз.5Тодад вай, кытысен тон усид! Ӧпкельыса сьӧлыкъёсыдлэсь куштӥськы но азьвыл кадь ӟеч ужъёстэ лэсьтыса ул. Нош озьы ӧд ке улы, ӝоген тон доры лыкто но лампададэ интыысьтыз вырӟыто, ӧпкельыса сьӧлыкъёсыдлэсь ӧд ке куштӥськы.6Но тынад соиз умой: николаитъёслэсь ужъёссэс тон адӟемпотостэм кариськод, Мон но соослэсь ужъёссэс адӟонтэм карисько.7Кылыны пельыз вань мурт – мед кылоз. Кылзы, Дух мар вера черкъёслы: ”Вормись муртлы Инмар райлэн шорысьтыз улон писпулэсь емышсэ сиыны сёто”».

8Смирна черклэн Кылчинэзлы гожты: «Нырысетӥез но, Берпуметӥез но, Кин кулэмын вал, но улӟыса султӥз, тазьы шуэ:9Тодӥсько тынэсьтыд ужъёстэ, куректон-кайгудэ но, начар-куанер улэмдэ но, нош шонерзэ ке верано, тон узыр, лек кылъёсты но, кудъёссэ асьсэды иудей шуисьёс верало, со чылкак озьы ӧвӧл ке но, – соос шайтанлы тэрытскыса улӥсь адямиос.

10Мае тыныд азьпалан чиданы кулэ луоз, солэсь огезлэсь но эн кышка. Тани, визьдэс сынан понна диавол куд-огдэс пытсэтэ ворсатоз. Дас нунал ӵоже куректыса-кайгырыса улоды. Кулоно ке но луиз, осконлэсь эн куштӥськы, соку Мон тыныд улонлэсь кузьым венецсэ сёто.11Кылыны пельыз вань мурт – мед кылоз. Кылзы, Дух мар вера черкъёслы: ”Кин вормиз, солы кыкетӥ кулонлэсь изъян уз луы”».

12Пергам черклэн Кылчинэзлы гожты: «Мыд-мыд палтӥз лэчыт шерем мечез ванё тазьы шуэ:13”Тодӥсько тынэсьтыд ужъёстэ, тодӥсько тон улӥськод отын, кытын шайтанлэн престолэз сылэ. Но тон Мынэсьтым нимме юн санэ поныса улӥськод, Мыным осконлэсь со нуналъёсы но ӧд куштӥськы, куке тӥ дорын, шайтанлэн улон городаз, Мынам оскымон адӟисе-ивортӥсе Антипа виемын вал.14Но ӧжытак Мынам тыныд пумит веранэ но вань, малы ке шуоно тӥ дорын Валаамлэсь дышетонзэ утисьёс вань. Валаам израиль пиослэсь визьзэс туганы – сульдэръёслы ваем курбон сӥлез сиыны, азыса-калгыса улыны – Валакез дышетӥз.15Николаитъёслэсь дышетонзэс утисьёсыд но тынад вань, со дышетонэз Мон адӟемпотостэм карисько.16Ӧпкельыса сьӧлыкъёсыдлэсь куштӥськы, нош ӧд ке куштӥськы, ӝоген тон доры лыкто но ымысьтым потӥсь мечен со адямиосын ожмасько.17Кылыны пельыз вань мурт – мед кылоз. Кылзы, Дух мар вера черкъёслы: ”Вормем муртлы ватӥськыса улӥсь маннаез сиыны сёто. Солы ик тӧдьы из сёто, со из вылын выль ним гожтэмын, но со нимез нокин но уг тоды, басьтӥсь мурт гинэ сое тодэ”».

18Фиатира черклэн Кылчинэзлы гожты: «Инмар Пи, Кинлэн синъёсыз ӝуась тыл кадесь, пыдъёсыз Ливан ыргонлы укшасесь, тазьы шуэ:19”Тодӥсько тынэсьтыд ужъёстэ, яратондэ но, ужан-тыршондэ но, оскондэ но, чидандэ но тодӥсько. Тодӥсько сое но: кутсконаз сярысь, берло дыре тон бадӟымесьгес-вылӥесьгес ужъёс лэсьтӥськод.20Но ӧжытак Мынам тыныд пумит веранэ но вань, малы ке шуоно тон эрик сётӥськод Иезавель нимо кышномуртлы, кудӥз ассэ ачиз пророк шуыса нима. Мынэсьтым ляльчиосме аслаз дышетонэныз йыромонэ нуэ, азыса-калгыса улыны, сульдэръёслы курбон сётэм сӥлез сиыны сюрес усьтэ.21Мон солы дыр сётӥ азыса-калгыса улэмез понна ӧпкельыса сьӧлыкъёсызлэсь куштӥськыны, нош со ӧз ӧпкельы.22Тани Мон сое курадӟонлэн валес вылаз погыртӥсько, нош соин ӵош азыса-калгыса улӥсьёсты туж бадӟым куректон-кайгу пӧлы куштӥсько, асьсэлэн ужъёссы понна ӧз ке ӧпкеле.23Солэсь нылпиоссэ кулон-быронлэн киулаз сёто; вань черкъёс тодозы-валалозы, Мон сюлэмъёсты, сюлэм пушкын ватӥськыса улӥсь малпанъёсты эскерись-чаклась луисько шуыса; ваньдылы лэсьтэм ужъёстыя пунэмзэ берыкто.24Нош али ваньдылы, Фиатираын улӥсьёслы, кудъёсыз та дышетонэз кабыл уг басьто, уг но тодо, кызьы шуо, шайтан дышетонлэсь мурдалазэ, – тӥледлы верасько: тӥ вылэ мукет зӥбет уг ни поны.25Но марды вань, Мон лыктытозь, со бордын возиське.26Вормисьлы, Мынэсьтым ужъёсме пумозяз быдэсъяса улэм муртлы, язычникъёсын кивалтыны эрик сёто.27Соосты со корт бодыен возьмалоз, горд сюйлэсь лэсьтэм сосудъёс кадь соос куашкалозы-пырдылозы, кызьы Мон но Аслам Атаелэн киысьтыз кивалтыны эрик басьтӥ.28Солы ӵук кизили сёто.29Кылыны пельыз вань мурт – мед кылоз. Кылзы, Дух мар вера черкъёслы”».


предыдущая глава Глава 2 следующая глава