Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 11

11-тӥ ЛЮКЕТ

1Оскон – со азьпал возьманмылэн быдэсмонэз, адскисьтэмезлы юн оскиськон.2Таӵе осконэн улэмзы понна вашкалаос Инмарлы ярамон луизы.

3Оскон пыр асьмеос тодӥськомы, Инмарлэн кылыныз дуннеос-вапумъёс кылдытэмын шуыса. Ваньзэ, мае асьмеос адӟиськомы, со ваньмыз адӟыны луонтэмысь кылдытэмын.

4Оскон пыр Авель, Каин сярысь, Инмарлы ӟечгес курбон сётӥз. Осконэз понна со шонер улӥсь луэ шуыса, шара ивортэмын вал, солэсь кузьымъёссэ Инмар кабыл басьтӥз. Оскон пыр Авель кулэм бераз но асьмелы вера.5Оскон пыр Енох мукет азе улыны нуэмын вал – кулонэз со ӧз тоды, бӧрысь сое нокин но ӧз ни адӟы, малы ке шуоно Инмар сое мукет азе улыны нуиз. Мукет азе улыны нуэмлэсь азьло, со Инмарлы ярась мурт луэ шуыса, шара ивортэмын вал.6Нош осконтэк Инмарлы ярамон луыны уг луы. Инмар доры лыктӥсь мурт оскыны кулэ, Инмар вань шуыса, Ассэ утчасьёслы Инмар мед-кузьым сётэ шуыса.7Оскон пыр Нойлы усьтэмын вал со, мар солэсь ватӥськыса улӥз. Инмарлэсь кышканэн улыса, со ас семьязэ утён понна ковчег-пыж дасяз. Солэн осконэз возьматӥз, дунне судэ сюрымон луэмын шуыса, оскон пыр ик со шонер улонлэн люкет басьтӥсез луиз.

8Оскон пыр Авраам мукет шаере мыныны Инмарлэн косонэзлы тэрытскиз но люкетлы басьтоно тодмотэм музъеме мыныны потӥз.9Оскон пыр Инмарлэн сӥзьыса сётэм музъемаз мурт музъемын кадь со улӥз. Со сӥзёнлэсь ик люкетсэ басьтоно муртъёсын Исаакен но Иаковен валче ынлэсь возъям балаганъёсын улӥз.10Уго Со бырисьтэм инъет вылэ пуктэм городлэсь вуэмзэ витиз, со городэз суредаз, лэсьтӥз-пуктӥз Ачиз Инмар.11Оскон пыр ачиз Сарра но, нылпи вайыны быгатӥсьтэм мурт, кидысэз пушказ пыртыса возьыны кужым басьтӥз но, арлыдыз шоры учкытэк, нылпи вайиз; со тодэ вал уго, Сӥзён Сётӥсьлэн кылыз оскиськымон луэ шуыса.12Одӥг пиосмуртлэсь, кудӥзлэн мугорыз пумемын вал ни, сокем трос адямиос вордскизы, – инмысь кизилиос мында, зарезь дурысь луо мында.

13Ваньзы соос кулытозязы оскыса улӥзы, сӥзиськонэз басьтыса ӧз вуэ, Инмарлэсь сётыны сӥземзэ соос кыдёкысен гинэ адӟылӥзы но шумпотылӥзы. Асьсэ сярысь шуылӥзы: «Музъем вылын ми пыдйылчиос, огдырлы лыктэм муртъёс гинэ луиськомы».14Уго кинъёс тазьы верало, соос озьы возьмато, дор музъемзэс утчало шуыса.15Со дор музъемзы сярысь, кудысьтыз соос потӥзы, малпаса улысалзы ке, соку соос отчы берытскыны быгатысалзы на.16Но соос ӟечазгес дор музъеме сюрыны тыршизы – Инмысяз. Соин ик Инмар Ассэ соослэн Инмарзы шуыны соослэсь уг возьдаськы: соослы Со город дасяз уго.

17Осконзэ чаклан-эскерон дыръя осконэз ванен Авраам Исаакез курбонлы сётыны мынӥз. Инмар дорысь сӥзиськонъёс басьтэм бераз но одӥг вордэм пизэ курбонлы сётыны со дась луиз.18Солы верамын вал: «Исаак бордысь потэмъёс тынад кидысэд-выжыед шуыса нимаськозы».19Авраам оске вал, Инмарлэн кулэмысь но улӟытыны кужмыз вань шуыса. Оскемез понна со Исаак пизэ берен улэп куен басьтӥз. Вуоно улӟыса султонлэсь луонзэ Инмар тазьы возьматӥз.20Оскон пыр Исаак бакель кариз Иаковлэсь но Исавлэсь азьпал улонзэс.21Оскон пыр Иаков кулыкуз Иосифлэсь кыксэ ик пиоссэ бакель кариз но кивалтэт бодыезлэн йылыз шоры йыбырттӥз.22Оскон пыр Иосиф кулыкуз израиль калыклэн Египетысь потонэз сярысь тодазы вайытӥз но аслаз лыосыз пумысен косон сётӥз.

23Оскон пыр Моисеез вордскем бераз анай-атайёсыз куинь толэзь ӵоже ватыса возизы, соос уго адӟизы, пиналзы чебер-йӧно шуыса, эксэйлэн косонэзлэсь но соос ӧз кышкатске.24Оскон пыр Моисей быдэ вуэм бераз ни фараонлэн нылызлэн пиез луонлэсь куштӥськиз.25Вакчи дыр ӵоже сьӧлыко ужъёс пӧлын эзылыса улон интые, со Инмар калыкен огазьын курадӟон чидаса улыны мылкыд кариз.26Христос понна ултӥян улэ сюронэз со Египетысь вань байлыкъёс сярысь дуногес луэ шуыса лыдъяз. Со уго азьпалась пунэм берыктон шоры учкыса улӥз.27Оскон пыр со, эксэйлэн лекъяськонэзлэсь кышкатэк, Египетысь кошкиз. Со Адӟиськисьтэм Инмарез адӟыса улӥсь кадь юнматскыса улӥз уго.28Оскыса со Пасха сямез ортчытыны косӥз, нырысь вордскем пиосты быдтӥсьлэн киыз израиль пиос борды медаз йӧтӥськы шуыса, вирен пазьгытытӥз.29Осконзы ванен соос, музъем вылтӥ кадь, Горд Кам зарезь вамен выжизы, – тазьы ик лэсьтыны ӝутскизы Египетлэн адямиосыз, но выйыса быризы.30Оскон пыр сизьым нунал ӵоже котыртӥз ветлэм бере Иерихонлэн борддоръёсыз куашказы.31Оскон пыр Раав, калгись кышномурт, ивор тодыны лушкемен лыктэм израиль пиосты ватэмез понна (соосты со мукет сюрестӥ келяз) утиськиз, оскисьтэмъёсын огазьын ӧз быры.

32Эшшо мар верало на? Мыным дыр уз тырмы Гедеон сярысь, Варак сярысь, Самсон сярысь, Иеффай сярысь, Давид сярысь, Самуил сярысь, пророкъёс сярысь вераны.33Соос осконзы ванен эксэйлыкъёсты вормылӥзы, шонерлыкез юнматылӥзы, Инмарлэсь сӥзиськонъёссэ басьтылӥзы, урод пӧйшуръёслэсь ымзэс ворсаллязы,34тыллэсь кужымзэ кысылӥзы, мечлэн лэчыт йылызлэсь утиськылӥзы. Лябӟыса улонысь кужым поттӥзы, ожмаськонын кужмоесь вал, тушмонлэсь полкъёссэ берлань чигнатӥзы.35Кышноослэн кулэм ӵыжы-выжыоссы улӟыса соос доры улэпен берытскылӥзы. Куд-огъёсыз курадӟытыса виемын вал, соос мозмытонэз кулэ ӧз каре улӟыса султон дыръя ӟечгес люкет басьтон понна.36Мукетъёсыз сантэман-ултӥянъёсты, жугон-чабкылонъёсты, нош озьы ик жильыетъёсты но пытсэтэз чидано луизы.37Соосты изъёсын зӥръяса жугылӥзы, мугорзэс бычкыен шори вандылӥзы, курадӟытылӥзы, тӥр-пурт улын кулылӥзы; ыжку дӥськутэн, кечкуэн шобырскыса ветлӥзы; ёрмон-курадӟон, куректон-кайгу пӧлын улӥзы, соосты улляса-ӝикатыса возизы.38Быдэс дунне соослэсь чӧльы йылзэс но уг сылы вал, нош соос озьы ке но кыр дуннеостӥ, гурезьёстӥ, пещераостӥ, гопъёстӥ-нюкъёстӥ ватӥськыса ветлоно луизы.

39Ваньзы соос тодытэмын вал, осконзы понна Инмарлы ярамонэсь луо шуыса, но озьы ке но Инмарлэсь сӥземзэ соос ӧз басьтэ,40малы ке шуоно Инмар асьмелы эшшо маке но ӟечсэгес малпаз-чаклаз, – асьмемын ӵош гинэ соос дун-шектэм луонэ вуозы.


предыдущая глава Глава 11 следующая глава