Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 10

10-тӥ ЛЮКЕТ

1Моисей закон бордын вуоно ӟечлыклэн вужерез гинэ вань, нош ачиз зэмлыкез отын ӧвӧл. Арлы быдэ ялан курбонъёс вайисьёсты но Моисей закон дун-шектэм карыны ноку но уз быгаты.2Закон соосты дун-шектэм карыны быгатысал ке, курбон сёткамысь ӧй дугдысалзы шат? Уго вӧсяськисьёс одӥг пол чылкытатӥськысалзы но сьӧлыкъёссы сярысь нокыӵе но сюлмаськонзы ӧй ни луысал.3Нош та курбонъёс арлы быдэ сьӧлыкъёсты тодэ вайыто.4Ошъёслэн но кечъёслэн вирзы адямилэсь сьӧлыкъёссэ быдтыны уг быгаты.

5Соин ик Христос дунне вылэ лыктыкуз шуэ:

«Виро сётонэз, кузьым сётонэз Тон кулэ ӧд кары,
Тон Мыным мугор дасяд.
6Тылын сутӥськись курбонъёс, сьӧлык понна курбонъёс
Тыныд ярантэмесь.
7Соку Мон шуи: ”Тани Мон лыктӥ,
кызьы бинялтэм книгаын Мон сярысь гожтэмын,
Тынэсьтыд эриктэ быдэстыны Мон лыктӥ, Инмаре”».

8Нырысь ик шуиз: Курбонъёс но, кузьымъёс но, тылын сутэм курбонъёс но, виро сётонъёс но сьӧлыкъёсты куштон понна, кудъёссэ Моисей законлэн куронэзъя ваё, Тыныд кулэ ӧвӧл, соос Тонэ уг шумпотто.9Собере ватсаз: «Тани, Тынэсьтыд эриктэ быдэстыны Мон лыктӥ, Инмаре». Выльзэ юнматон понна вужзэ воштэ.10Тани та эрикъя, Иисус Христослэсь одӥг пол Мугорзэ сётыса, асьмеос дун-сьӧлыктэм каремын.11Нуналлы быдэ священник султыса аслэсьтыз ужзэ быдэсъя вал, трос пол огвыллемесь курбонъёс сётэ вал, но соос сьӧлыкъёсты быдтыны чик но ӧз быгатэ.12Нош Христос сьӧлыкъёс понна одӥг курбон сётӥз но пырак ӵожелы Инмарлэн бурпалаз пуксиз.13Со дырысен Со возьма, кызьы Солэн тушмонъёсыз Солэн пыд улаз понэмын луозы.14Одӥг пол сётэм курбонэн Со аслэсьтыз адямиоссэ пырак ӵожелы дун-чылкытэсь кариз.

15Та сярысь ик асьмелы Святой Дух но шара ивортэ. Шуэмын уго:

16«Тани со нуналъёс бере соослы Мынам сётоно сӥзён-косонэ, –
шуэ Кузё-Инмар, –
Аслэсьтым законъёсме соослэн сюлмазы поно,
соослэн малпаназы соосты пырто.
17Соослэсь сьӧлыкъёссэс, законлы пумит улэмъёссэс
тодам уг ни вайы».

18Нош сьӧлыкъёс куштэмын ни ке, соку соос понна курбонъёс сётыны кулэ ӧвӧл ини.

19Озьы, агай-вынъёсы, Иисус Христослэн Вирыз пыр табере асьмеос Святойлэсь но Святой интые кышкатэк пырыны быгатӥськомы; асьмелы Со выль, улэп улонэ нуись сюресэз усьтӥз.20Со сюрес ын пыр – Солэн мугорыз пыр – Святойлэсь но Святой интые нуэ.21Асьмелэн быдӟым Священникмы вань, Со Инмар коркалы кузё луэ.22Ваелэ Инмарлэн матаз чылкыт сюлэмын, мур осконэн, урод малпанэн улӥсь сюлэмъёсмес чылкытатыса, чылкыт вуэн мугормес миськыса мыноме.23Палэнэ кожылытэк, возиськоме оскиськыса улонэз тодытон бордын, уго оскиськымон Кыл Сётӥсь.24Огмылы огмы юрттӥськыса уломе, яратыса, ӟеч ужъёс лэсьтыса улыны мылкыдмес ӝутоме.25Огазьын вӧсяськонъёсы ветлытэк ум улэ, кызьы вырыны даурто куд-огъёсыз. Огмылэсь огмы мылкыдмес лӧпкытыломе, уката ик, Солэн нуналэзлэсь матэгес вуэмзэ шӧдӥськоды ке.26Уго асьмеос зэмлыкез тодэм берамы но эшшо сьӧлыкаса улӥськомы на ке, соку нокыӵе курбонэн сьӧлыкъёслэсь мозмытскыны уд ни быгаты.27Соку судэз но ваньзэ ньылӥсь тылэз кышкаса возьман гинэ кыле на, со ваньзэ Инмарлы пумитъяськыса улӥсьёсты ньылыны дась.28Моисей законлэсь куштӥськись муртэ, кык яке куинь адӟисьёслэн шара ивортэмзыя, чик жалятэк виыны сёто вал.29Соку асьтэос малпалэ ай, макем секыт вӧсь карон улэ сётэмын луоз Инмар Пиез сантэмась мурт, кин сӥзёнлэсь Вирзэ святыня шуыса уг лыдъя, кудӥныз со дун-сьӧлыктэм каремын вал, кин дэлетлэсь Духсэ ултӥя?30Асьмеос тодӥськомы Сое, Кин шуиз:

«Мон киын пунэм берыктон, Мон пунэмзэ берыкто».

Кузё-Инмар эшшо шуиз на:

«Кузё-Инмар Аслэсьтыз калыксэ судить кароз».

31Улэп Инмарлэн киулаз сюрыны кышкыт!

32Валляна нуналъёстэс тодады вае ай: Ӟеч Иворен югдытэмын бере, кӧня курадӟонъёс чидано луиды.33Вань калык азьын тӥледыз серем карылӥзы, ултӥязы, асьтэос кадь ик курадӟонэ сюремъёслы тӥ эшъёс луылӥды34Уго тӥ, мон пытсэтын пукыку но, гажась-жалясь луэмдэс возьматӥды, ваньбурдэс лушкакузы но, шумпотыса улӥды, – тӥ тодӥськоды уго, Инмын ӟечезгес, бырисьтэмез узырлыкты вань шуыса.35Оскиськондэс эн ыштэ, со понна тӥ бадӟым мед-кузьым басьтоды.36Инмарлэсь эриксэ быдэсъяны но Солэсь сӥзем люкетсэ басьтон понна тӥ котьмае чидаса улыны кулэ.

37Уго эшшо ӧжытак, туж ӧжыт гинэ, Лыктӥсь вуоз, уз ӝега.
38Шонер улӥсь осконэз пыр улэп улоз;
нош солань-талань шонаськыны кутскиз ке,
со Мынам лулылы ярамон уз луы.

39Нош асьмеос быронэ мынӥсь солань-талань шонаськисьёс пӧлысь ӧвӧл, асьмеос лулэз утён понна оскон бордын сылӥсьёс пӧлысь.


предыдущая глава Глава 10 следующая глава