Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 9

9-тӥ ЛЮКЕТ

1Нырысетӥ сӥзёнлэн вӧсяськон ортчытон сярысь пуктон-косонъёсыз но, музъем вылын вӧсяськон интыез но вал.2Пуктэмын вал нырысез скиния, отын лампадаез, фимиам возён ӝӧкез но вӧсям нянь тырон ӝӧкез вал. Та инты «Святой» шуыса нимаськылӥз.3Нош ынэн возъям кыкетӥ люкетлэн сьӧраз «Святойлэсь но Святой» шуыса нимаськись мукетыз скиния интыяськемын вал.4Отын зарни кадило но котыр ласянь зарниен шобыртэм сӥзён-косонэз возён ковчег возиськиз. Ковчег пушкын зарни сосудын манна возизы, Ааронлэсь бодызэ, кудӥз улӟыса сяська поттӥз, но сӥзёнэн гожтэм изпулъёсты.5Ковчег йылын сылӥзы данлыклэн херувимъёсыз; соос бурдъёсынызы шобыртыса улӥзы «сьӧлыкъёслэсь мозмытскон интыез». Нош али вань люкетъёс сярысь пыр-поч вераны кулэлыкез ӧвӧл.

6Тазьы пуктэм-интыям бере нырысетӥяз скинияе вӧсяськон ортчытыны священникъёс пырыло,7нош кыкетӥяз – арлы одӥг пол огназ архиерей гинэ пырыны быгатэ, отын ачиз понна, нош озьы ик калыклэн тодытэк лэсьтэм сьӧлыкъёсыз понна курбон сётэм пудолэсь вирзэ вайыса, со лыктэ.8Тазьы Святой Дух тани мае возьматэ: нырысетӥез скиния сылытозь, Святойлэсь но Святой интые сюрес усьтэмын ӧвӧл на.9Та мадён туала дырлы верамын: саламъёс-кузьымъёс, курбонъёс уг быгато вӧсяськисьёслэсь сюлэмзэс дун-чылкыт карыны.10Сиён-юонъёс, мисьтӥськон-чылкытатӥськонъёс, лулмугор понна пӧртэм сямъёсты быдэсъян чакламын вал выльдӥськон дыр вуытозьлы гинэ.11Нош али лыктӥз Христос, азьпал улонысь ӟечлыклэн Архиереез. Бадӟымгес но чылкак дун-шектэм, киын лэсьтымтэ скиния пыр Со лыктӥз, таизлэн дуннелэн но со ӧвӧл.

12Кечъёслэн, кунянъёслэн вирынызы Со отчы ӧз пыры, Аслаз Вирыныз одӥг пол Святойлэсь но Святой интые пыриз но пумтэм вапумъёслы сьӧлыкъёслэсь мозмытскон асьмелы вайиз.13Мугор вылэ пазьгем ошъёслэн, кечъёслэн вирзы но курбон ветыллэн сутэм пенез саптаськем лулмугорез дун-чылкыт карыны быгатэ ке,14соку нош Христослэн Вирыз кыӵе! Со Святой Дух пыр Ассэ, самой Дун-Шектэмез, курбон карыса, Инмарлы вайиз. Солэн Вирыз асьмелэсь сюлэммес быронэ нуись ужъёслэсь уката но зол сузялоз, улэп, зэм Инмарлы мед ужаломы-тыршомы шуыса!

15Соин ик Христос выль сӥзёнлэн Дурбасьтӥсез луэ. Солэн кулонэз пыр, кудӥз нырысетӥ сӥзён-косон дыръя адямиосын лэсьтэм йыружъёслэсь мозмытскон понна луиз, пумтэм вапумъёслы люкет басьтыны ӧтиськемъёс, мар соослы сӥземын вал, сое мед басьтозы шуыса.16Сӥзиськон гожтэт вань ке, соку сӥзиськон гожтӥсь кулэмын ке, со кинюртыса юнматэмын луыны кулэ.17Малы ке шуоно сӥзиськон гожтэт сое гожтӥсь кулэм бере гинэ кужым басьтэ; сӥзиськон гожтӥсь улэп дыръя солэн кужымез ӧвӧл.18Со понна ик уго нырысетӥ сӥзён но виртэк юнматэмын ӧй вал.19Законлэсь вань курон-косонъёссэ калык азьын верам бераз Моисей, ошъёслэсь, кечъёслэсь вирзэс басьтыса, вуэн сураз но нап-горд ыжгонэн, иссоп турынэн законэн книгаез но, вань калыкез но пазяз.20Со шуиз: «Та сӥзён-косонлэн вирыз, сое тӥледлы Инмар сӥзиз».21Озьы ик вирен пазьгиз скинияез но вань вӧсяськон сосудъёсты.22Моисей законъя ваньмыз кадь ик вир пыр сузяське, виро курбон сётытэк, сьӧлык уг куштӥськы.

23Ваньмыз, мар Инмысьлы укшатыса лэсьтэмын, – ваньмыз соос тазьы сузяськыны кулэ вал, нош ваньмыз Инмысез сузямын луыны кулэ таослэсь но ӟечгес курбонъёсын-саламъёсын.24Уго Христос киын лэсьтэм вӧсяськон интые, зэмос вӧсяськон интылы тупатыса пуктэмаз ӧз пыры, Со Инме ӝутӥськиз асьме понна Инмарлэн азяз султыны.25Ассэ трос пол курбон сётон понна Со Инме ӧз ӝутӥськы, кызьы архиерей арлы быдэ аслазэн ӧвӧл, пудо-живот вирен вӧсяськон интые пыре.26Соку Солы дунне кылдон дырысен трос пол курадӟон чидано луысал. Нош Со вапумъёслэн пумазы лыктӥз, одӥг пол кутскыса, пырак ӵожелы сьӧлыкъёсты быдтон понна Ассэ курбон карыса сётӥз.27Кызьы адямиослы одӥг пол кулыны кылдэмын, нош собере – судэ султыны,28озьы ик Христос но, тросэзлэсь сьӧлыкъёссэс быдтон понна Ассэ одӥг пол курбонлы сётӥз. Кыкетӥзэ Со лыктоз, но сьӧлыклэсь сузяны уз, Сое возьмасьёслы утиськон сётыны Со лыктоз.


предыдущая глава Глава 9 следующая глава