Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 8

8-тӥ ЛЮКЕТ

1Веранысьтымы ваньмызлэсь вылӥез-дуноез луэ со: асьмелэн вань Инмысь Быдӟым Инмарлэн престолэзлэн бурпалаз пуксем Архиереймы.2Вӧсяськон интыын, зэмос скинияын, Со вӧсяськон нуись луэ, сое адями ӧз, Кузё-Инмар пуктӥз-ӝутӥз.3Котькудзэ архиереез кузьымъёс, курбонъёс сётон понна пукто, соин ик асьмелэн Архиереймылэн но курбон сётонэз луыны кулэ вал.4Со музъем вылэ ик кыльысал ке, соку Со священник но ӧй луысал, малы ке шуоно татын Моисей законъя курбон сётӥсь священникъёс вань.5Та священникъёс вӧсясько Инмысь скиниялы укшась вӧсяськон интыын, – музъем вылысез скиния Инмысь скиниялэн вужерез луэ. Соин ик, скинияез лэсьтыны кутскыкуз, Моисейлы верамын вал: «Учкы, ваньзэ лэсьты, гурезь йылын тыныд возьматэм скиниялэн тусызлы укшатыса».6Но Таиз Архиерей музъем выл архиерейёс сярысь вылӥлэсь но вылӥлыко служить карон басьтӥз. Вылезлэн сӥзёнлэн Дурбасьтӥсез Со луиз, трослы вылӥын вужезлэсь сӥзёнлэсь. Уго со ӟечесь сӥзиськонъёс вылэ пыкиськыса юнматэмын.

7Нырысетӥез сӥзён-косон шектэм-янгыштэм луысал ке, мукетсэ сӥзёнэз утчаны кулэлыкез ӧй луысал.8Но соосты пыкылыса пророк шуэ:

«Тани вуо нуналъёс, – шуэ Кузё-Инмар, –
куке Мон Израиль юртэн-выжыен, Иудалэн юртэныз-выжыеныз
выль сӥзён пыр кусып кылдыто.
9Таиз сыӵе кусып ӧвӧл, кыӵезэ Мон соослэн атайёсынызы кылдытӥ,
соосты, китӥзы кутыса, Египет музъемысь поттыкум.
Созэ сӥзён-косон пыр кылдытэм кусыпме соос ӧз уте,
соин ик Мон соосты кулэтэм кари, – шуэ Кузё-Инмар.
10Со нуналъёс бере тани кыӵе сӥзён-косон
Израиль юртлы-выжылы сёто, – шуэ Кузё-Инмар, –
Аслэсьтым законъёсме соослэн малпанъёсазы пырто,
соосты соослэн сюлэм вылазы гожто.
Соослы Мон Инмар луо, нош соос Мынам калыке луозы.
11Нокинлы но кулэ уз ни луы мукет муртэ дышетыны,
агайлы но вынзэ тазьы вераса дышетыны кулэ уз луы:
”Тод-тодма Кузё-Инмарез”, малы ке шуоно ваньмыз,
пичиысен кутскыса бадӟымозь, ваньмыз Монэ тодозы.
12Соослэсь шонертэм улэмзэс Мон кушто,
соослэсь сьӧлыкъёссэс, законлы пумит улэмзэс тодам уг ни вайы».

13Таизэ сӥзёнэз Со «выль» шуыса нимаз, нош нырысетӥзэ сӥзёнэз вужмемын шуыса возьматӥз. Мар вань вужмемез, пересьмемез – со быронлы матын улэ.


предыдущая глава Глава 8 следующая глава