Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 7

7-тӥ ЛЮКЕТ

1Мелхиседек – Салимлэн эксэез, Вылысь Инмарлэн священникез вал. Эксэйёсты ожын вормыса бертӥсь Авраамез со пумитаз но сое бакель кариз.2Ожын киултэм пӧлысьтыз дасэтӥ люкетсэ Авраам Мелхиседеклы сётӥз. Мелхиседеклэн нимыз «зэмлыклэн эксэез» шуыса берыктӥське, со ик луэ Салимлэн эксэез, мукет сямен вераса, «тупаса улонлэн эксэез».3Атаез, анаез, выжы-кумыез но тодмо ӧвӧл; кытын, ку вордскемез но, кулэмез но тодмо ӧвӧл. Инмар Пи кадь ик со пырак дауръёс ӵожелы священник луэ.

4Адӟиськоды-а, макем со быдӟым вал! Авраам патриарх ожын мар басьтӥз, самой ӟечъёсыз пӧлысь дасэтӥ люкетсэ солы сётӥз.5Моисей законъя Левий пиос пӧлысь священник ним басьтӥсьёслэн курон-косонзы вань – калыклэсь дасэтӥ люкет бичан – асьсэ агай-вынъёссылэсь, Авраамлэн кидыс бордысьтыз потэмъёслэсь ик.6Нош Мелхиседек соослэн выжыысьтызы потэмын ке но ӧй вал, Авраамлэсь дасэтӥ люкет басьтӥз но Инмарлэсь сӥзиськон басьтэм муртсэ (Авраамез) бакель кариз.7Меӵак вераны быгатӥськомы: бакель карись мурт вылӥынгес бакель кароно муртлэсь.8Татын кулоно адямиос дасэтӥ люкет басьто, нош отын Мелхиседек сярысь со ялан улэп шуыса тодытон вань.9Но, кызьы шуо, ачиз, дасэтӥ люкет басьтӥсь Левий, Авраам пыр Мелхиседеклы дасэтӥ люкет сётӥз:10Мелхиседек Авраамез пумитаку, Левий атаез пушкын на вал.

11Озьыен, дун-шектэм луон левий священникъёс пыр быдэсмысал ке (уго соослэн священник луонэнызы герӟаськемын калыклы закон сётонлэн мугез), – соку, Ааронлэн чинэзъя нимаськытэк, малы кулэ на вал Мелхиседеклэн чинэзъя мукет священниклы потыны-ӝутскыны?12Священник чинэз басьтон воштӥське ке, соку ик закон но воштӥськыны кулэ.13Христос, Кин сярысь али та вераськон мынэ, мукет выжыысь вал. Солэн выжыысьтыз нокин но курбон сётон ӝӧк доры ӧз султылы.14Тодмо уго, асьмелэн Кузё-Инмармы Иуда выжыысь потӥз шуыса, нош та выжыысь священникъёс пумысен Моисей номыр но ӧз вера.15Но та эшшо но яркытгес адӟиське, куке Мелхиседеклы укшась мукет священник потэ ке.16Со адямиослэн курон-косон законзыя священник ӧз луы, бырылӥсьтэм улонлэн кужыменыз священник луиз.17Уго Со сярысь тазьы ивортэмын:

«Мелхиседеклэн чинэзъя
пумтэм вапумлы Тон священник луиськод».

18Вашкалаез курон-косон воштэмын, уго со ляб, пайдатэм, –19Моисей закон номыре но дун-шектэм луон дырозь ӧз вутты. Али асьмелы ӟечгес оскиськон сётэмын, со пыр асьмеос Инмарлы матэ кариськиськомы.

20Иисусэз Архиерей карыкуз, Инмар кыл сётӥз, нош мукетъёсыз, кыл сётытэк, священник луизы,21нош Таиз, кыл сётыса, священник луиз, уго Со сярысь тазьы шуэмын:

«Кыл сётӥз Кузё-Инмар, нош сётэм кылызлэсь Со уз куштӥськы:
Мелхиседеклэн чинэзъя пумтэм вапумлы Тон священник луиськод».

22Со ӟеч сӥзён-косонэз юнматӥсь, солэн дурбасьтӥсез луиз Иисус.23Священникъёс трос вал, малы ке шуоно одӥг муртлы священникын кема возиськыны кулон маза ӧз сётылы.24Нош Со пумтэм вапумъёс ӵоже улӥсь, священник луонэз но Солэн пумтэм вапумъёс ӵоже улэ.25Соин ик Со Ачиз пыр Инмар доры лыктӥсьёсты котьку но утьыны быгатэ. Со котьку но улэп бере, соос понна Со дурбасьтэ.

26Сыӵе ик луыны кулэ вал уго асьмелэн Архиереймы: дун-сьӧлыктэм, урод ужъёсты лэсьтӥсьтэм, дун-шектэм. Со сьӧлыкоослэсь висъямын, Инъёслэсь вылӥе ӝутэмын.27Солы мукет архиерейёслы кадь нуналлы быдэ, нырысь ик аслаз сьӧлыкъёсыз понна, собере калыклэн сьӧлыкъёсыз понна, курбон сётыны кулэ ӧвӧл. Уго тае Со одӥг пол лэсьтӥз ни – Ассэ Ачиз курбон сётӥз.28Закон архиерее огшоры, ляблыкен курадӟись адямиосты пуктэ; нош закон бере вуэм кыл сётон пумтэм вапумъёс ӵожелы дун-шектэм луись Инмар Пиез Архиерее пуктӥз.


предыдущая глава Глава 7 следующая глава