Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 4

4-тӥ ЛЮКЕТ

1Ваелэ чакласькыса, сак уломе: Инмарлэн каньыллыказ пырыны сӥзиськемлы оскиськон вань на бере, тӥ пӧлысь нокин но отчы пырыны быгатытэк медаз кыльы вал.2Уго асьмелы кадь ик израиль калыклы но Ӟеч Ивор тодытэмын вал, но кылэм кылзы соослы пайда ӧз вайы, малы ке шуоно со осконэн ӧз герӟаськы.3Нош асьмеос, оскисьёс, каньылэн улон интые пыриськомы, уго Инмар шуиз:

«Вожпотон дыръям Мон кыл сётӥ,
соос Мынам каньылэн улон интыям уз пыре»,

Солэн ужъёсыз дунне кылдытэм дырысен ик быдэстэмын ке но вал.4Кытын ке но сизьыметӥ нунал сярысь тазьы шуэмын: «Вань ужъёссэ быдэстэм бере сизьыметӥ нуналаз Инмар шутэтскиз».5Эшшо шуэмын на: «Соос Мынам каньылэн улон интыям уз пыре».6Озьы, куд-огъёсызлы отчы пырыны луонлык кыле на, нош кинъёслы азьвылгес ӟеч ивор тодытэмын вал, тэрытскись луымтэзы понна соос отчы ӧз пыре.7Инмар эшшо нимысьтыз нунал тупатӥз – «туннэ». Трос аръёс ортчем бере та сярысь Давид пыр вераз, кызьы вылӥын верамын:

«Туннэ Солэсь куаразэ кылӥды ке, сюлэмъёстэс эн лекомытэ».

8Уго соослы Иисус Навин ке каньыллык вайысал, соку Инмар мукет нунал сярысь кылпум ӧй ни поттысал.9Соин ик Инмар калыклэн шутэтсконэз азьпалан ай.10Уго ваньмыз, кин Инмарлэн каньыллыказ пыре, со ужамысь дугдыса шутэтске озьы ик, кызьы Инмар но Аслаз ужъёсыз бере шутэтскиз.11Озьыен, ваелэ Инмарлэн каньыллыказ пырыны тыршоме, тэрытскытэк улӥсьёслэсь адӟем карыса, нокин но тэрытскытэк улон пӧлы медаз усьы вал шуыса.

12Инмарлэн кылыз улэп, со ӝоглыко, мыд-мыд палтӥз вандӥсь мечлэсь но со лэчытгес: лулэз но духез, мугор ёзъёсты но виымез люкытозь пыдло пыре; сюлэм малпанъёсты, мылкыд каронъёсты со судить каре.13Нокыӵе кылдытэм макелэн но Солэсь ватӥськемез уг луы. Со азьын ваньмыз усьтэмын, гольык каремын. Со азьын ваньмы асьмеос кыл кутомы.

14Инъёс пыр потэм Инмарлэн Пиез Иисус, быдӟым Архиереймы вань бере, ойдолэ, осконмы бордын юн возиськоме.15Асьмелэн Архиереймы лябӟыса улон дыръямы асьмеды жалясь луэ. Уго Со асьмеос сямен ик визь сынаськонъёс пыр потэмын, озьы ке но Со ноку но ӧз сьӧлыка.16Соин ик асьмеос дэлетлэн престолэз доры кышкатэк мыныны быгатӥськомы, кулэ дыръя отысь гажан-жалян, дэлет басьтыны быгатӥськомы.


предыдущая глава Глава 4 следующая глава