Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 3

3-тӥ ЛЮКЕТ

1Соин ик, вӧсяськись калык пӧлысь агай-вынъёсы, Инмын ӵош улонэ ӧтиськемъёс, учкелэ асьмелэсь осконмес тодытыны Ыстэм, Архиерей, Иисус Христос шоры,2Кудӥз Сое Пуктӥсь Инмарлы оскиськымон ужа-тырше, кызьы Солэн быдэс юртаз ужаз-тыршиз Моисей но.3Но Со Моисей сярысь бадӟымгес дан басьтыны ярамон луэ, кызьы юрт пуктӥсьлэн но сӥ-санэз бадӟымгес луэ юртлэн сярысь.4Котькуд коркаез кин ке но пуктэ; нош ваньзэ пуктӥсь-лэсьтӥсь луэ – Инмар.5Инмарлэн быдэс юртаз Моисей оскиськымон ужась-тыршись вал, со ивортыны кулэ вал, мар верамын луоз азьпалан.6Христос – Инмарлэн юртысьтыз Пи, Солэн юртэз – асьмеос, оскиськонмес, кудӥныз данъяськиськомы, пумозяз кышкатэк, юн возьыны быгатӥмы ке.

7Соин ик, кызьы Святой Дух шуэ:

«Туннэ Солэсь куаразэ кылӥды ке,
8асьтэлэсь сюлэмъёстэс эн лекомытэ,
кызьы кыр дуннеын визь сынаськон нуналэ,
ӟургетыса-бугыръяськыса улыкуды, тӥ лэсьтӥды.
9Отысен тӥляд атайёсты Мынэсьтым визьме сыназы,
Монэ эскерыса-чакласа улӥзы,
ньыльдон ар ӵоже Мынэсьтым ужъёсме адӟыса улӥзы.
10Со понна ик Мон та выжылы вожме поттыса шуи:
”Чик дугдылытэк соос сюлмынызы янгышало,
Мынэсьтым сюресъёсме соос ӧз тодэ-валалэ”.
11Соин ик вожпотон дыръям Мон кыл сётӥ: ”Каньылэн улон интыям соос уз пыре”».

12Агай-вынъёсы, чакласькелэ, тӥ пӧлысь нокуддылэн но кескич, оскисьтэм сюлмыз медаз луы, Улэп Инмар бордысь усёно медад луэ шуыса.13Нуналлы быдэ ог-огдэс дышетэ-нодъялэ, – «туннэ» шуыны луытозь на: сьӧлык улэ сюрыса, нокудды но тӥ пӧлысь медад лекоме вал.14Уго асьмеос кутсконысеныз ик кабыл басьтэм осконмес пумозяз юн возьыны быгатӥмы ке, Христосэн огазьын улӥсьёс луомы,15кызьы шуо:

«Туннэ Солэсь куаразэ кылӥды ке,
ӟургетыса-бугыръяськыса улон дыръяды кадь
сюлэмъёстэс эн лекомытэ».

16Кылӥсьёс пӧлысь кинъёс бугырскизы? Ваньзы ик соос Египетысь Моисеен ӵош потэмъёс ӧй вал-а?17Ньыльдон ар ӵоже кинлы Инмар вожзэ поттыса улӥз? Сьӧлыке пыремъёслы ӧвӧл-а, кудъёсызлэн лыоссы кыр дуннее бырыны кылизы?18Кинъёс пумысен Инмар кыл сётӥз? Тэрытскисьтэмъёс пумысен Солэн каньыллыказ уз пыре шуыса, Со кыл ӧз-а сёты?19Озьыен, оскымтэзы понна Солэн каньыллыказ пырыны соос ӧз быгатэ шуыса, асьмеос адӟиськомы.


предыдущая глава Глава 3 следующая глава