Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 2

2-тӥ ЛЮКЕТ

1Соин ик асьмеос, осконысь медам усе шуыса, верам кылэз санэ поныны тужгес но сакесь луыны кулэ.2Кылчинъёс пыр верам кыл но юн вал, котькыӵе йыруж лэсьтэм, кылзӥськытэк улэм понна шонерен пунэм берыктӥськылӥз бере,3табере нош сыӵе бадӟым утиськон сярысь чик сюлмаськытэк, кызьы бен пунэм берыктонлэсь утиськыны быгатомы? Сое нырысь ик Ачиз Кузё-Инмармы тодытӥз, нош собере Солэсь тодытонзэ кылӥсьёс сое асьме пушкы юнматыны юрттӥзы.4Ваньзэ тае Инмар паймымон тодметъёсын, паймымон ужъёсын, трос кужмо ужъёсын Аслаз эрикеныз Святой Духлэсь дэлето кузьымъёссэ сёткаса юнматӥз.

5Вуоно дуннеез, кудӥз сярысь али вераськиськомы, Инмар Кылчинъёслы тэрытскыны ӧз сёты,6нош кин ке но кытын ке но тазьы шуэм:

«Ма со адями, кудзэ Тон тодад возиськод?
Ма со адями пи, кудӥз доры Тон ветлӥськод?
7Кылчинъёсын ӵошатыса,
Тон сое ӧжытлы гинэ покчи карид,
данэн, сӥ-санэн изьыяд Тон сое,
Аслад киыныд лэсьтэм ужъёслы сое кузё карыса пуктӥд;
8ваньзэ солэн пыд улаз тэрытскись карыса понӥд».

Нош куке ваньзэ солы Со тэрытскись кариз, номыре но солы, тэрытскисьтэм карыса, Со ӧз кельты. Нош али ум на адӟиське, ваньмыз солы тэрытскись луэмын шуыса.9Иисус Кылчинъёс азьын ӧжытак дырлы улӥегес каремын вал, нош али Сое кулонэз чидам понназ данэн но сӥ-санэн изьыямын шуыса адӟиськомы. Инмарлэн сётэм дэлетэныз ваньмыз понна Солы кулонэз веръяно луиз.

10Инмар трос нылпиосты пиштӥсь данлыказ вайыны мылкыд кариз. Соин ик Со – Кин понна ваньмыз, Кин пыр ваньмыз – соослэн утиськонзылэсь Кузёзэ курадӟонъёс пыр поттыны кулэ вал.11Дун-сьӧлыктэм Карись но, дун-сьӧлыктэм кароноос но Одӥг Атай бордысь пото. Соин ик Иисус соосты агай-вынъёс шуыны уг возьдаськы. Со шуэ:

12«Тынэсьтыд нимдэ агай-вынъёсылы тодыто,
люкаськем калык пӧлын Тонэ данъяса кырӟало».

13Эшшо шуэ на:

«Мон Со вылэ оскиськыса уло».

Эшшо но:

«Тани Мон но, Мыным Инмарен сётэм нылпиосы но».

14Кызьы нылпиос вирын, лулмугорын уло, Со но озьы ик вир, лулмугор басьтӥз, – кулон пыр кулонлэсь кузёяськисьсэ – диаволэз – быдтыны15но мозмытыны соосты, кудъёсыз, кулонлэсь кышкаса, быдэс улон даурзэс ляльчиос-рабъёс кадь улоно луылӥзы.16Со уго Кылчинъёс сярысь уг, Авраамлэн кидысэз сярысь сюлмаське.17Соин ик Со котьмар ласянь агай-вынъёслы тупась-укшась кариськыны кулэ вал, калыкез сьӧлыкъёсызлэсь мозмытон понна Инмар азьын гажась-жалясь но оскиськымон Архиерей луыны кулэ вал.18Со Ачиз визь сынаськонэ сюрылӥз, курадӟон чидано луиз бере, соин ик Со визь сынаськонэ сюремъёслы но юрттыны быгатэ.


предыдущая глава Глава 2 следующая глава