Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕВРЕЙЁСЛЫ ЫСТЭМ ГОЖТЭТЭЗ

Глава 1

1-тӥ ЛЮКЕТ

1Вашкала вапумъёсы асьмелэн атайёсынымы пророкъёс пыр Инмар пӧртэм амалъёсын трос пол вераськылӥз.2Берпуметӥ аръёсы вань люкетэз басьтӥсь карыса пуктэм Пиез пыр Со асьмелы вералляз. Со пыр Со быдэс дуннеез кылдытӥз.3Пи – Со Инмар данлыклэн пиштонэз, Со Инмарлэн улонэзлэн образэз луэ. Аслаз кылызлэн кужыменыз ваньзэ уте-возе. Ачиз пыр асьмеды сьӧлыкъёсмылэсь мозмытэм бераз Быдӟымлыклэн бурпалаз вылӥе пуксиз.4Кылчинъёслэсь Со трослы вылӥегес луиз, Солэн люкетлы басьтэм нимыз но уго соослэн нимъёссылэсь эшшо но данлыкогес.

5Кылчинъёс пӧлысь кудзылы ке но куке но Инмар шуиз-а:

«Тон Мынам Пие, туннэ Мон Тонэ вордскытӥ»?

Эшшо:

«Мон Солы Атай луо, Со Мыным Пи луоз»?

6Нош озьы ик, Нырысьсэ Вордскем Пизэ дунне вылэ поттыкуз, Со шуэ:

«Вань Инмар Кылчинъёс Солы мед йыбырттозы».

7Кылчинъёс сярысь Инмар шуэ:

«Тон Аслэсьтыд Кылчинъёстэ духъёс кариськод,
Аслэсьтыд ужась-тыршисьёстэ гомась тыллы пӧрмытӥськод».

8Нош Пи сярысь Со шуиз:

«Инмаре, Тынад престолэд пумтэм вапумъёс сылэ;
шонерлыклэн кивалтэт бодыез –
Тынад эксэйлыкедлэн кивалтэт бодыез.
9Тон шонерлыкез яратӥд,
нош законлы пумит улонэз адӟонтэм карид;
соин ик Тонэ, Инмар, Тынад Инмаред вань эшъёсыд пӧлысь
шумпотонлэн вӧйыныз золгес зырӟиз».

10Со шуиз на:

«Кутсконаз ик Тон, Кузё-Инмаре, музъемез кылдытӥд,
инъёс но – Тынад киыдлэн ужъёсыз.
11Соос бырозы, нош Тон улод;
ваньзы соос выл дӥсь кадь сурыкмозы,
12дӥськутэз кадь соосты куасалтод но соос воштӥськозы.
Нош Тон – сыӵе ик, воштӥськисьтэм, Тынад улон аръёсыд уз быре».

13Кылчинъёс пӧлысь кудзылы ке но куке но Инмар тазьы шуиз-а:

«Тушмонъёстэ пыд улад понытозям, бурпалам пук»?

14Ваньзы ик соос утиськон люкет басьтоноос понна ужаны-тыршыны ыстэм ужась-тыршись духъёс ӧвӧл-а?


предыдущая глава Глава 1 следующая глава