Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ФИЛИМОНЛЫ ЫСТЭМ ГОЖТЭТЭЗ

Глава 1

1Павел, Иисус Христослэн пытсэтын пукисез, но Тимофей брат, гажано Филимонлы – милемын ӵош ужасьлы,2гажано Апфия сузэрлы, Архипплы – милемын одӥг удысын ужась-тыршисьлы, тынад гуртад люкаськись черк калыклы:3Инмар Атаймылэсь но Кузё-Инмарлэсь Иисус Христослэсь тӥледлы дэлет но каньыллык сӥзиськомы.

4Котьку вӧсяськонам тонэ тодам вайисько но Инмарелы тау карисько.5Кузё-Инмарлы Иисуслы осконэд но вань вӧсяськись калыкез яратонэд сярысь мон кылылӥ ни уго.6Мон вӧсяськисько милемын огкадь осконэд юн мед луоз, со тыныд мед тодытысал, Иисус Христос бордысь кыӵе ӟечлыкез асьмеос басьтӥськомы.7Тынад яратонэд монэ туж шумпоттӥз, мылкыдме лӧпкытӥз, малы ке шуоно тон пыр, брат, вӧсяськисьёслэн сюлэмъёссы буйгазы.

8Христос бордын мон тонэ вордӥ бере, соин ик табере мон кышкатэк тынэсьтыд курыны быгатысал сое, мар тыныд лэсьтыны кулэ.9Но мон косонэн уг, тонэ яратыса куронэн тыныд вазиськисько, – мон со, Павел, вӧсяськисьёслэн валтӥсьсы, нош али Иисус Христослэн нимыз понна пытсэтын пукись,10Онисим пие пумысен мон тыныд куронэн вазиськисько. Пытсэтын пукыкум, со мыным пи луиз.11Куке но со тыныд ярантэм луиз вал, нош табере со тыныд но, мыным но кулэ мурт луиз. Мон сое берен тон доры ыстӥсько,12аслэсьтым сюлэмме сётэм кадь луисько, но тон сое бордад кут.13Мынам сое ас бордам воземе потэ вал, Ӟеч Ивор понна пытсэтын пукыкум, тон интые со мыным мед ужасал-тыршысал.14Но тынэсьтыд мылкыддэ тодытэк, номыр но лэсьтэме ӧз поты. Тынад ӟеч ужед кужмысь карытэмын медаз луы, аслад ӟеч мылкыд каремедъя лэсьтэмын мед луоз.15Оло нош, тон сое пырак ӵожелы ас бордад мед карод шуыса, со кӧня ке дырлы тон дорысь кошкылӥз?16Табере со тыныд ляльчи-медо ӧвӧл, ляльчилэсь-медолэсь со вылӥынгес ини, – табере со гажано брат, уката ик мон понна. Нош тон понна со адями кадь но, Кузё-Инмар бордын улӥсь агай-вын кадь но эшшо но дуногес луэ.

17Озьыен, тон монэ эш шуыса лыдъяськод на ке, соку тон сое, кызьы монэ бордад кутӥськод, озьы ик сое но бордад кут.18Нош со тонэ маин ке ӝоже уськытӥз ке яке тыныд солэн пунэм тыронэз вань ке, тод, мон вылын со тырон шуыса.19Мон, Павел, тае аслам киыным гожтӥсько: мон солэсь пунэмзэ тыро, мон уг ни вераськы, тон ачид но мыным пунэм тыроно шуыса. Быдэс улонэд понна.20Бен, брат, табере тон но монэ Кузё-Инмар понна шумпотты, Кузё-Инмар понна мынэсьтым сюлэмме буйгаты.

21Тон монэ кылзӥськод шуыса, осконэн мон тыныд гожтӥсько. Мон тодӥсько, та куронэ сярысь но эшшо тросгес лэсьтод на шуыса.22Огкутскемен, мыным улон инты дася. Мон оскиськисько, тӥляд вӧсяськемдыя Инмар монэ тӥледлы ”кузьмалоз” шуыса.

23Тыныд Епафрас салам вера, Иисус Христос понна со но мон кадь ик пытсэтэ ворсамын;24озьы ик салам верало Марк, Аристарх, Димас, Лука – монэн ӵош ужась-тыршисьёс.

25Кузё-Инмармылэн Иисус Христослэн дэлетэз тӥляд духеныды валче мед улоз. Аминь.


предыдущая глава Глава 1 следующая глава