Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ТИТЛЫ ЫСТЭМ ГОЖТЭТЭЗ

Глава 1

1-тӥ ЛЮКЕТ

1Павел, Инмарлэн ляльчиез, Иисус Христослэн апостолэз мон луи Инмарлэсь быръем муртъёссэ оскон пала ваён понна. Шонер осконлы тупась зэмлыкез тодон,2пумтэм вапумъёсы улон басьтонлы оскиськон сётэ. Аслэсьтыз верам кылзэ котьку но быдэсъясь Инмар тае вапумъёс кутсконлэсь азьвыл ик сӥзиз.3Нош тупатэм дырыз вуиз но Аслэсьтыз кылзэ Со калыклы ивортӥз. Кылзэ тодытонэз Инмарлэн, асьмелэн Утисьмылэн, косэмезъя, мыным оскиз.4Титлы, монэн одӥг осконын улӥсь зэмос пилы, мылкыд карисько: Инмар Атайлэн но Кузё-Инмарлэн Иисус Христослэн, Утисьмылэн дэлетэз, гажан-жалянэз, каньыллыкез тон бордын мед улоз.

5Со понна мон тонэ Критэ кельтӥ, йылаз-пумаз вуттымтэ ужъёсты мед быдэстод но ваньмаз городъёсы вӧсяськисьёслы кивалтӥсьёс мед пуктылод шуыса. Мон тонэ кури:6со пуктэм адямиосыд дун-шектэмесь мед луозы, одӥг пол гинэ кышнояськемын мед луозы, нылпиоссы Инмарлы оскисесь мед луозы. Азыса-калгыса яке тэрытскытэк уло шуыса, калык пыкылоно медаз лу.7Епископ Инмар юртэз утись мурт бере, соин ик со дун-шектэм луыны кулэ. Вылтӥяськись, йыркуръяськись, юонэз яратӥсь, жугиськись, узырлыклы синмаськись со медаз луы.8Со мед луоз ёрмисьёсты сюдӥсь-вордӥсь, визьмо, дун-чылкыт улонэз яратӥсь, шонер лэсьтӥсь, вӧсяськыса шонер улӥсь, ассэ кутыны быгатӥсь.9Со шонер дышетон вылэ пыкиськыса, мукетъёссэ но шонер сюрес вылэ султыны мед дышетоз, нош пумитъяськисьёсты шарае поттыны быгатӥсь мед луоз.

10Вань уго трос тэрытскисьтэмъёс, юнме супыльтӥсьёс, ӧрекчаськисьёс, уката ик вандӥськон сямез ортчытэмъёс пӧлысь.11Сыӵеослэсь ымзэс ворсаны кулэ: соос быдэс семьяосты куашкатыло. Асьсэлы пайда поттон понна соос дышето солы, малы кулэ ӧвӧл дышетскыны.12Соослэн пӧлысьтызы ик одӥгез пророксы шуиз: «Критын улӥсьёс котьку но ӧрекчаськисесь вал, лек пӧйшуръёс, кӧттыростэмъёс, азьтэмъёс».13Та шонер веран. Соин ик тон соосты юн визьма-нодъя, осконзы зэмос, мур мед луоз шуыса,14Иудейёслэсь ӧрекчи мадёнъёссэс но зэмлыклэсь палэнскем адямиослэсь кылдытъям курон-косонъёссэс санэ медаз понэ.15Дун-чылкытъёс понна ваньмыз дун-чылкыт; нош саптаськемъёс но оскисьтэмъёс понна нокыӵе но чылкытлык ӧвӧл, малы ке шуоно соослэн визьзы но, сюлэмзы но саптаськемын.16Соос шуо ми, пе, Инмарез тодӥськомы, нош ужъёсынызы асьсэос Солэсь куштӥсько – кырсесь-юрӟымесь, кылзӥськисьтэмесь, нокыӵе но ӟеч уж лэсьтыны быгатӥсьтэмесь.


предыдущая глава Глава 1 следующая глава