Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ТИМОФЕЙЛЫ ЫСТЭМ НЫРЫСЕТӤ ГОЖТЭТЭЗ

Глава 4

4-тӥ ЛЮКЕТ

1Нош Инмарлэн Духез валамон вера: берпум аръёсы периос дорысь потэм дышетонъёсты санэ поныса но визез тугась духъёслэсь кылзӥськыса, куд-огъёсыз осконлэсь куштӥськозы2возьытлыксэс ыштэм пӧяськисьёслэн чеберъяськонзы пыр.3Соос бызьыны-басьтыны уг лэзё, соизэ я таизэ сиёнэз сиыны уг косо, нош соосты Инмар сиыны кылдытӥз – оскыса, зэмлыкез тодыса улӥсьёс соосты тау карыса мед сиёзы шуыса.4Уго мае Инмар кылдытӥз, ваньмыз со ӟеч, тау карыса кабыл басьтӥське ке, номыре но кулэтэм карыны кулэ ӧвӧл.5Уго Инмар кыл пыр, вӧсяськыса со дун-чылкыт луэ.

6Тае тон агай-вынъёслы валэктӥд ке, соку тон Иисус Христослэн ӟеч ужасез луод, осконлэн кылъёсыныз но со кабыл басьтэм ӟеч дышетонэн тыр улод.7Нош нылкышноослэн ярантэм-кулэтэм супыльтонъёссылэсь палэнскылы; Инмар азьын шонерлыко улонлы астэ кыдаты.8Мугор кыдатонлэн ӧжыт пайдаез, Инмар азьын шонер улон гинэ самой бадӟым пайда вае. Со бордын возиське туалаез но, вуоноез но улон.9Та кыл шонер но котькуд ласянь кабыл басьтыны ярамон.10Асьмеос улэп Инмарлы оскиськомы. Со понна ужаськомы, сантэманъёсты чидаськомы – Со вань адямиос понна Утись луэ, уката ик Солы оскисьёс понна.

11Тодыты, дышеты талы калыкез.12Нокин но тонэ, пинал-еж шуыса, санэ понытэк медаз улы; вераськонэд, улонэд, яратонэд, духен улонэд, осконэд, дун-чылкыт улонэд оскись калыклы адӟем карымон мед луоз.13Мон лыктытозь, калыклы Священной Гожтэмез лыдӟы, визь-нод сёткаса, дышетыса ул соосты.14Тыныд сётэм ӟечлыкез кулэтэм эн кар. Со тыныд Инмарлэсь кылзэ ивортон пыр, вӧсяськонэн кивалтӥсьёслэн тон вылэ кизэс понон дыръя сётэмын вал.15Ваньзэ тае сюлэмдэ поныса быдэсъя, та бордын ул, тынад азинсконэд ваньмызлы адӟиськымон мед луоз.16Астэ ачид чакласа ул, адямиосты дышетонэз но. Та удысын дугдылытэк тыршы. Уго тазьы лэсьтыса, астэ ачид утёд, тонэ кылзӥськисьёсты но.


предыдущая глава Глава 4 следующая глава