Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ТИМОФЕЙЛЫ ЫСТЭМ НЫРЫСЕТӤ ГОЖТЭТЭЗ

Глава 1

1-тӥ ЛЮКЕТ

1Павел, Иисус Христослэн апостолэз, Инмарлэн, асьмелэн Утисьмылэн но асьмелэн оскиськонмылэн Кузё-Инмарлэн Иисус Христослэн косэмезъя,2Тимофейлы, монэн одӥг кадь осконэн улӥсь зэмос пиелы. Инмарлэсь, Атаймылэсь но Кузё-Инмармылэсь Иисус Христослэсь дэлетсэ, гажан-жалянзэ, каньыллыксэ тыныд сӥзисько.

3Македонияе кошкон азям мон тонэ Ефесэ кыльыны косӥ, куд-огезлы тон отын мед вералод, ӧрекчи дышетонъёсты вӧлмытонлэсь соос мед куштӥськозы шуыса.4Соос медаз ни выре ӧрекчи веросъёс кылдытъянэн, ӵыжы-выжыоссылэсь кытысь но ку потэмзы сярысь пумтэм-йылтэм гожъянъёсын. Соос адямиосты куспазы куаретонэ-ченгешонъёсы вутто, нош Инмарлэн ужез оскон пыр адӟиське.5Курон-косонмылэн шорсюлмыз – яратон, кудӥз потэ чылкыт сюлмысь, возьытлыкез тодон-валанысь, зэмлыко осконысь.6Куд-огез, та бордысь палэнскыса, юнме кыл тэкшерон пала кариськиз.7Соослэн законлы дышетӥсь кариськемзы потэ, нош асьсэос уг валало мар сярысь верамзэс, сое кужмысь валэктыны выро ке но.

8Нош ми тодӥськомы: закон умой соку, куке сое уж вылын шонер кутӥськод.9Тодӥськомы сое но: закон шонер улӥсьёс понна поттэмын ӧвӧл, со поттэмын законлы пумит улӥсьёс, Инмар законлы тэрытскисьтэмъёс понна, сьӧлыклэсь кышкасьтэмъёс, сьӧлыкаса улӥсьёс, юрӟым, кырсь ужъёс лэсьтӥсьёс, анайзэс но атайзэс быдтӥсьёс, адями виылӥсьёс понна;10азыса-калгыса улӥсьёслы, пиосмурт пиосмуртэн кӧласьёслы, адямиен вузкарисьёслы, ӧрекчаськисьёслы, сётэм кылзылэсь куштӥськисьёслы – ваньмызлы, кинъёс Инмар дышетонлы пумитъяськыса, мыдлань лэсьтыса уло.11Нош Инмарлэн дышетонэз данлыко Ӟеч Ивор вылэ пыкиське, сое тодытыны бакельлыко Инмар мыным ӟеч эриксэ сётӥз.

12Мыным кужым сётӥсь Кузё-Инмармылы Иисус Христослы тау карисько: Со монэ оскиськымон луисько шуыса лыдъяз но та ужез быдэсъяны пуктӥз, –13монэ, азьвыл Аслыз пумитъяськисез, вӧсяськисьёсты улляса-ёртыса, ӝоже уськытъяса возисез. Инмар монэ жаляз, уго мон та ужъёсты тодытэк-валатэк, осконэ ӧвӧлысь лэсьтылӥ.14Иисус Христос бордысь потэм осконэн но яратонэн ӵош Кузё-Инмармылэн дэлетэз мон пушкын пачылмыса улыны кутскиз.15Шонер верамын но ваньмызлы кабыл басьтыны ярамон луо та кылъёс: Иисус Христос дунне вылэ сьӧлыкоосты утьыны-мозмытыны лыктӥз, нош соос пӧлысь ваньмызлэсь сьӧлыкоез луисько мон.16Со понна ик уго жаляса Со мынэсьтым сьӧлыкъёсме куштӥз: адӟем карон понна Иисус Христос нырысь ик мон вылын Аслэсьтыз кема чиданзэ мед возьматоз быронтэм улон басьтэмзы потыса Солы оскыны кутскисьёслы.17Пумтэм вапумъёсысь Эксэйлы, ноку но бырисьтэм, адӟыны луисьтэм одӥг гинэ визьмолэсь но визьмо Инмарлы пумтэм вапумъёсы сӥ-сан но дан. Аминь.

18Тимофей, пие, Инмарлэсь кылзэ ивортон пыр тон сярысь веранъёсыз лыдэ басьтыса, тыныд таӵе курон-косон сётӥсько: соос вылэ пыкиськыса, ӟечлыко ожмаськись кадь тон мед нюръяськод.19Осконэд, чылкыт сюлмыд мед луоз, уго куд-огез сое кулэтэм каризы но, соин сэрен осконзылэн инъетэз куашказ.20Сыӵеесь луо Именей но Александр. Инмарез сантэмаса медаз ни улэ шуыса, соосты мон шайтан киулэ сётӥ.


предыдущая глава Глава 1 следующая глава