Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ФЕССАЛОНИКА КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 2

2-тӥ ЛЮКЕТ

1Агай-вынъёсы, Кузё-Инмармылэн Иисус Христослэн лыктонэз но асьмелэн Соин огазе кариськонмы пумысен тӥледыз туж куриськомы:2Куалектыса визьдэс эн ыштэ, дух пыр, кыл пыр, ыстэм гожтэт пыр но визьдэс медаз тугалэ, – со гожтэтэз, пе, ми ыстӥськеммы, Христослэн нуналыз вуэ ни шуыса, пе, отын гожтэмын.3Нокин но нокызьы но тӥледыз медаз пӧя: уго со нунал вуэмлэсь азьло адямиос Инмарлэсь куштӥськозы. Соку сьӧлыклэн адямиез, быронлэн пиез ассэ шара возьматоз –4пумитъяськись, ассэ ваньмызлэсь вылӥе пуктоз, адямиослэсь Инмар яке святыня шуонзылэсь но ассэ вылӥе пуктоз. Со Инмарлэн храмаз пуксёз но ассэ Инмар шуыса ялоз.

5Уд ни тодӥське-а, эшшо тӥ дорын улыкум, та сярысь тӥледлы вералляй?6Табере тӥ тодӥськоды, мар сое калык пӧлы потыны уг на лэзьы.7Уго али ик ини законлы пумит улон лушкемен ужа ини, но мар луоно, со уз луы со дырозь – пӧлысьтызы кутыса возись басьтӥськытозь.8Соку законлы пумит улӥсь калык азе потоз, нош Кузё-Инмар Иисус, шораз шокчыса, сое виёз, Аслаз лыктонэныз сое пыраклы быдтоз.9Законлы пумит улӥсьлы лыктыны шайтан юрттоз. Олокыӵе но кужмоесь, паймымон тодметъёс, пӧяськон пыр паймымон ужъёс лэсьтэмын луозы.10Быронэ мынӥсьёс олокыӵе но шонертэм улонъёслэн визез суран-пожаназы сюрозы – утён вайись зэмлыкез яратонлэсь куштӥськемзы понна.11Соин сэрен Инмар соослы йыромон уж лэзёз, соин ик соос ӧрекчаськонлы оскыны кутскозы.12Зэмлыклы оскымтэос, шонертэм улонэз яратӥсьёс – ваньзы судить каремын луозы.

13Нош ми, Кузё-Инмарен яратэм агай-вынъёсмы, тӥ понна ялан Инмарлы тау карыны кулэ, малы ке шуоно кутсконысеныз ик Дух пыр дун-сьӧлыктэм карыса, зэмлыклы оскон пыр Инмар тӥледыз утиськон басьтон понна бырйиз.14Милям Ӟеч Иворез тодытонмы пыр Кузё-Инмармылэн Иисус Христослэн пиштӥсь данлыказ пыриськыны Со тӥледыз ӧтиз уго.

15Озьыен, агай-вынъёсы, юн сылэ, кылынымы вераса, ыстэм гожтэтъёсмы пыр дышетэммы бордын зол кырмиськыса улэ.16Нош табере Ачиз Кузё-Инмармы Иисус Христос но асьмемыз яратӥсь Инмар Атаймы, Аслаз гажан-жалянэныз пумтэм вапумъёслы буйгатскон но оскиськон сётӥсь,17сюлэмъёстэс мед каньылатоз, ӟеч кыл вераны, ӟеч уж лэсьтыны тӥледыз мед юнматоз.


*а 2:4 пумитъяськись – татын: антихрист


предыдущая глава Глава 2 следующая глава