Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОЛОССЫ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 2

2-тӥ ЛЮКЕТ

1Мынам тодытэме потэ, макем мон трос сюлмаськоно луисько тӥ понна, озьы ик Лаодикияын но Иерапольын улӥсьёс понна. Сюлмаськисько мынэсьтым ымнырме но та дырозь адӟымтэос понна.2Соослэн мылкыдзы мед ӝутскоз, яратон соосты огазе мед кароз, тодон-валанэн мед узырмозы но Инмар Атайлэсь, Христослэсь ватӥськыса улӥсь зэмлыксэ валаны мед кутскозы.3Со бордын вылӥлыко визьлыклэн, тодон-валанлэн ваньмыз узырлыкъёсыз ватэмын.4Тае мон соин верасько, нокин но тӥледыз кескич кылъёсын ӧрекчаны медаз быгаты вал шуыса.5Мугорыным мон тӥ пӧлын ӧвӧл ке но, духеным тӥледын валче улӥсько. Шумпотӥсько, улондылэсь ӟечен радъяськемзэ адӟыса, Христослы юн оскондэс адӟыса.6Соин ик, Кузё-Инмарез Иисус Христосэз кабыл басьтӥды бере, Со бордын улэ.7Со борды выжыдэс лэзе, ӝужалэ-пушъе, оскондэс юнматэ. Солы тӥ дышетэмын уго. Оскон бордын азинлык басьтыса, Инмарлы тау карыса улэ.

8Чаклаське, агай-вынъёс, нокин но тӥледыз Христос бордысь потымтэ ӧрекчи дышетонъёс пала медаз кыскы вал. Соос луо та дуннелэн, адямиослэн мадён-веранэнызы герӟаськем дышетонъёс.9Уго Инмар луон быдэскыныз Христос бордын мугорын улэ.10Тӥ но Христос бордын тыр луон басьтӥды. Со котькыӵе кузёйыръёслы, кивалтӥсьёслы йыр луэ.11Со бордын тӥ вандӥськемын, но киын лэсьтэм вандӥськонэн ӧвӧл, Христослэн вандӥськонэныз тӥ сьӧлыко луэмдылэсь мозмытскиды.12Пылатыку Христосэн огазе тӥ ватэмын вал. Сое кулэмысь улӟытыса султытӥсь Инмарлэн кужымезлы осконды пыр тӥ но Христосэн ӵош улӟытыса султытэмын вал.13Инмар тӥледыз но, сьӧлыкъёсыныды сэрен лулмугордылэн вандӥськымтэ дыръяз кулэмъёсты, Христосэн ӵош улӟытӥз но асьмелэсь вань сьӧлыкъёсмес куштӥз.14Асьмеды янгыше уськытӥсь косонъёсын гожтэтэз Со ӵушиз, со уго асьмелы пумит гожтэмын вал. Сое пӧлысьтымы басьтӥз но кирос борды кортӵогаз.15Урод кылчинъёслэсь пумитъяськон кужымзэс быдтӥз, соосты вань калыклы адӟиськон интые возьытэ вуттыны султытӥз но, вормон басьтӥсь мурт кадь, Аслаз киросэз сьӧры нуиз.

16Озьыен, нокин но тӥледыз медаз пыкылы, мар сииськоды, мар юиськоды шуыса, яке кыӵе ке праздникез утьымтэды понна, яке выль толэзь потонэз, яке суббота нуналэз сӥлы карымтэды понна.17Та ваньмыз вуонолэн-лыктонолэн вужерез гинэ луэ, нош солэн мугорыз уго Христос луэ.18Одӥгзы но соос, кинъёс асьсэдыз зӥбыт-востэм каремъясько но Кылчинъёсты вылӥ-сӥлы карыса соослы йыбыртъяса уло, тӥлесьтыд визьдэс медаз тугалэ. Мае ӧз адӟе, отчы чуртнаськыса, соос адями визьмынызы юнме вылтӥяськыса уло.19Нош соос асьсэос Йыр бордын уг возисько, нош Йыр бордын быдэс Мугор аслаз ёзъёсыныз, герӟетъёсыныз думиськыса, юнматскыса улэ, Инмарлэн сётэм будонэныз будэ.

20Та дуннелэн законъёсыз понна тӥ Христосэн огазьын кулӥды ке, соку малы тӥ, таяз дунне вылын улӥсьёс кадь, таӵе пуктон-косонъёсты санэ понӥськоды:21«Бордаз эн йӧты!», «Сое эн сиы!», «Со борды эн йӧтӥськы!» –22Ваньмыз таос огпол вужмозы, бырозы, уго та пуктон-косонъёс адямиослэн кылдытэм дышетонъёссы гинэ луо.23Ваньмыз та адями визьмын малпам синпӧет гинэ: адями ас тодэмъяз малпа Инмарез сӥлы карыны, нош возьматыны тырше, ачиз со зӥбыт-востэм, ас киулаз юн кутыса возе шуыса, нош зэмзэ ке, таӵе улонлэн нокыӵе но дунлыкез ӧвӧл, со лулмугорлэсь кулэяськонзэ быдэсъян гинэ луэ.


предыдущая глава Глава 2 следующая глава