Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОЛОССЫ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 1

1-тӥ ЛЮКЕТ

1Павел, Инмарлэн ӟеч эрикеныз быръем Иисус Христослэн апостолэз, но Тимофей братмы2Колоссы карысь вӧсяськисьёслы, Иисус Христос бордысь оскиськымон агай-вынъёслы:3Инмар Атаймылэн но Кузё-Инмарлэн Иисус Христослэн дэлетэз, каньыллыкез тӥ пӧлын мед улоз.

Тӥ понна вӧсяськыкумы, котьку но Инмарлы, Кузё-Инмармылэн Иисус Христослэн Атаезлы тау кариськомы.4Уго Христос Иисуслы осконды сярысь, вань вӧсяськисьёсты яратонды сярысь ми кылӥмы ни.5Осконды, яратонды кылдэмын, тӥледлы Инмын дасям ӟечлыкез басьтонлы оскиськыса. Со сярысь тӥ азьвыл кылӥды зэмлыклэн кылысьтыз – Ӟеч Иворысь.6Со тӥ доры но вуиз. Быдэс дунне вылын Ӟеч Ивор емыш вае ни, со паськытгес но паськытгес вӧлме, тӥ дорын кадь ик, со нуналысен, куке тӥ нырысьсэ кылӥды но зэмен ик тодӥды-шӧдӥды Инмарлэсь гажан-жалянзэ.7Со сярысь Епафрас тӥледлы тодытӥз, – милям яратоно ужасьмы, тӥ понна Христослэн оскиськымон ужасез-тыршисез.8Епафрас милемлы ивортӥз тӥляд Дух бордысь басьтэм яратонды сярысь.

9Соин ик ми но куке та сярысь кылӥмы, со нуналысен тӥ понна вӧсяськемысь ум дугдылӥське. Ялан куриськомы, Инмар тӥледлы мед усьтысал, мар Со тӥлесьтыд возьма-куре, Святой Дух бордысь потӥсь визьлыкез но тодон-валанэз Со тӥледлы мед сётысал шуыса.10Соку тӥ Инмарлы ярамон-тупамон улысалды; котьмар ласянь Солы тэрытскыса, котькыӵе ӟеч ужъёсыныды емыш вайыны тыршысалды, Инмарез тодонды будысал.11Аслаз данлыко кужыменыз тӥледыз мед юнматоз, куасаськыны сётскисьтэмесь, ваньзэ чидасесь мед луоды.

12Инмар Атайлы юрттэмез понна шумпотыса тау кароды, уго Со асьмеды югыт азе, святойёсын ӵош люкет басьтонэ пыриськыны ярамонэсь кариз.13Со асьмеды пеймыт кужымлэн киулысьтыз мозмытӥз но Аслаз яратоно Пиезлэн Эксэйлыказ пыртӥз.14Христос пыр, Солэн Вирыныз асьмеос сьӧлыкъёслэсь мозмытскимы, сьӧлыкъёсмы куштӥськизы.15Христос вань кылдытэм макеослэсь азьвыл вордскемын, Со адскисьтэм Инмарлэн тусбуез луэ.16Уго ваньмыз Со пыр кылдытэмын – мар вань Инмын, мар вань музъем вылын, адскисез но, адскисьтэмез но: престолъёс-а, кузёяськонъёс-а, кузёйыръёс-а, кужымъёс-а – ваньмыз Со пыр, Со понна кылдытэмын.17Со ваньмызлэсь азьло луэмын, ваньмыз Со бордын возиське.18Со – мугорлэн – Черклэн йырыз луэ. Со – кутскон, кулэмысь улӟыса султэмъёс пӧлысь Со – Нырысез, котьмар ласянь нырысь интыын луон понна.19Атайлы озьы кулэ вал уго: Инмар луонлэн маиз вань, Христос бордын но со ваньмыз мед луоз.20Христос пыр ваньзэ Асэныз тупаса улӥсь кариз. Христослэн кирос бордын кисьтӥськем вирыныз, Со пыр музъем вылысьсэ но, Инмысьсэ но Асэныз тупаса улӥсь кариз.

21Куке но тӥ урод ужъёсты, урод малпанъёсты понна Инмар азьын палэнтэм, тушмонъяськыса улӥсь калык вал.22Нош табере Пиезлэн мугорыныз кулонэз пыр Инмар тӥледыз Асэныз тупаса улӥсь кариз, тӥледыз Ас азяз дун-сьӧлыктэм, дун-чылкыт, дун-шектэм карыса султытон понна.23Азьланяз но осконды юн мед луоз. Ӟеч Иворлэн ваем оскиськонэзлэсь, кудзэ тӥ кылӥды, эн куштӥське. Со ин улын улӥсь вань калыкъёслы тодытэмын. Со Ӟеч Иворлэн ужасез-тыршисез луи мон, Павел.

24Шумпотӥсько, тӥ понна курадӟонъёс чидано луисько шуыса. Христослэн курадӟонъёсыз тырмыт ӧй ке вал, табере мон соосты аслам мугоры вылэ ватсасько, Солэн Мугорыз понна мон сое лэсьтӥсько, нош Христослэн Мугорыз – со Черк.25Инмарлэн эрикезъя мон Черклэн ужась-тыршисез луи. Тӥледлы Инмар кылэз быдэссэ ивортон-тодытон ужез Со мыным оскиз.26Пумтэм трос вапумъёс ӵоже адямиослэсь, выжыысь выжыосы ватӥськыса улэм зэмлык со. Табере Инмар сое вӧсяськись калыклы усьтӥз ни.27Со пыр Инмар возьматыны мылкыд кариз язычникъёс понна но та ватӥськыса улӥсь зэмлыклэн кыӵе данлыко узырлыкез вань, нош ватӥськыса улӥсь зэмлык – со Христос, Со тӥ пушкын улэ. Со тӥляд басьтоно данлыктылэн оскиськонэз луэ.

28Со сярысь ми тодытӥськомы, котькудзэ адямиез визьмаськомы, вань визьлыкмес сётыса дышетӥськомы, котькудзэ адямиез Христос бордын дун-шектэм луэм шуыса, Инмарлы возьматыны дасяськомы.29Со понна ик мон тыршисько но, Солэн мон пушкын улӥсь кужыменыз мон нюръяськисько.


предыдущая глава Глава 1 следующая глава