Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ФИЛИППЫ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 4

4-тӥ ЛЮКЕТ

1Озьыен, адӟем потоно, гажано агай-вынъёсы, тӥ мынам шумпотонэ, мынам данъяськонэ. Кузё-Инмар бордын юн сылэ, кызьы мон тӥледыз дышетӥ, мусо агай-вынъёсы.

2Еводияез сюлворыса курисько, Сӥнтихияез сюлворыса курисько: Кузё-Инмарлы тыршыса, огмылкыдын улэ.3Тонэ но, монэн ӵош ужась эше, курисько: юртты та кышномуртъёслы. Соос уго монэн ӵош, Климентэн но мынам мукет ужасьёсыным ӵош, кинъёслэн нимъёссы улон книгаын гожтэмын, Ӟеч Иворез тодытонын тыршисьёс луо.

4Котьку но Кузё-Инмар бордын шумпотыса улэ. Эшшо шуисько на: шумпотыса улэ.5Вань адямиос мед адӟозы, тӥ лякыт сюлэмоесь шуыса. Кузё-Инмар матын.6Номыр понна но эн сюлмаське, но ялан вӧсяськыса, тау карыса, Инмар азьын мар куронды вань, курелэ.7Инмарлэн каньыллыкез котькыӵе визьлэсь но вылӥын, со тӥлесьтыд сюлэмдэс но, малпанъёстэс но Иисус Христос бордын утьыса возёз.

8Эшшо но, агай-вынъёсы, малпаське зэмлыкоез, сӥё-даноез, шонерлыкоез, чылкытэз, гажамонэз, данъяны луымонэз, ӟечлыкоез, ушъяны ярамонэз сярысь гинэ.9Мынэсьтым тӥ малы дышиды, мынэсьтым мае адӟем кариды, мон сярысь мар кылӥды но тодӥды, сое ик быдэсъялэ, соку каньыллык вайись Инмар тӥледын валче луоз.

10Тӥляд мон сярысь нош ик сюлмаськыны кутскемды понна Кузё-Инмар бордын мон туж шумпотыса улӥсько. Тӥ азьло но мон сярысь сюлмаськиськоды вал, нош кылдэм югдуръёс тӥледлы юрттӥськыны люкетыло вал.11Ёрмыса улэменым сэрен тае уг вераськы, мон уго дышемын ни, маи вань, соин тыр луыны:12начар улонэз но тодӥсько, узырлык пӧлын но улонэз тодӥсько, котьмалы но, котькыӵе улон-вылонлы мон дышемын: кӧт тырен улыны, кӧт сюманэз но чиданы, пачыллык-узырлык пӧлын, ёрмон пӧлын но улыны, –13монэ юнматӥсь Иисус Христос бордын ваньзэ чиданы быгатӥсько.14Нош тӥ ӟеч уж лэсьтӥды: куректон-кайгуосы дыръя мыным юрттӥськиды.

15Тӥ, Филиппы карын улӥсьёс, тодӥськоды: мон, Македонияысь потыса, Ӟеч Иворез тодытыны кутскем берам, тӥ сяна, одӥг черк но мыным ӧз юрттӥськы, кабыл но ӧз басьты.16Мон ёрмыса улыку, Фессалоника каре мыным огпол гинэ ӧвӧл, кык пол тӥ юрттэт ыстылӥды.17Юрттэт утчай шуыса, тае уг вераськы, верасько соин: тӥляд ӟеч ужды тӥледлы ик Инмар азьын ӟеч емыш мед сётоз шуыса сюлмаськисько.18Епафродит пыр ыстэм саламдэс ваньзэ басьтӥ, табере мон номырлы но ӟудыса уг улӥськы. Ческыт зыно ӵын поттон кадь, Инмарлы ярамон курбон кадь тӥляд ыстэм саламды.19Мар тӥледлы кулэ, Инмаре тӥледлы Христос Иисус пыр Аслаз данлыко узырлыкез пӧлысь ваньзэ пачылмытыса сётоз.20Инмарлы, Асьмелэн Атаймылы пумтэм вапумъёсы дан! Аминь.

21Ваньзэс Иисус Христос бордын вӧсяськыса улӥсьёсты ӟечкылалэ. Монэн ӵош улӥсь агай-вынъёс тӥледлы салам верало.22Вань вӧсяськисьёс тӥледлы салам верало, уката ик эксэй юртын улӥсьёс.

23Кузё-Инмармылэн Иисус Христослэн дэлетэз ваньды вылын мед улоз. Аминь.


предыдущая глава Глава 4 следующая глава