Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ФИЛИППЫ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 2

2-тӥ ЛЮКЕТ

1Озьыен, Христос бордысь мылкыддэс ӝутон шедьтӥськоды ке, солэн яратонэз тӥледыз буйгатэ ке, Дух пыр куспады герӟаськиськоды ке, гажан-жалянды, ӟеч карыны сюлмаськонды вань ке,2соку тӥ монэ пумтэм юн шумпоттӥськоды; одӥг малпанэн улэ, ог-огдэс яратэ, огмылкыдын, тупаса улӥсесь луэ.3Номыре но эн лэсьтэ, асьтэлы гинэ пайда басьтыны турттыса, ушъян-данъянэз эн яратэ. Асьтэдыз покчи каре, нош мукетъёссэ асьтэ сярысь умоесьгес шуыса лыдъялэ.4Нокин но ас сярысьтыз гинэ медаз сюлмаськы, мукетъёс сярысь но мед сюлмаськоз.5Тӥ сыӵе ик мылкыдын улэ, кыӵе мылкыдын Иисус Христос улэ:6Со Инмарлэн тусыз-образэз луыса вылысь Инмарен огкадь луон борды кутӥськыса ӧз улы.7Со Ассэ Ачиз покчи кариз, ляльчи кариськиз, адями луыса вордскиз, вылтусызъя адями кадь луиз.8Ассэ зӥбыт-востэм кариз, тэрытскыса виёнлы сётӥськиз – кирос бордын кулонлы.9Соин ик Инмар Сое ваньмызлэсь вылӥ кариз, Солы котькыӵе но нимлэсь вылӥ ним сётӥз,10Иисуслэн нимыз азьын Инмын но, музъем вылын но, дунне пыдэсын но улӥсьёс пыдесъяськыса мед йыбырттозы шуыса.11Инмар Атайлэсь данзэ ӝутон понна ваньзы соос ватытэк-танытэк мед вералозы, Иисус Христос Кузё-Инмар луэ шуыса.

12Озьыен, гажаноосы, кызьы тӥ котьку но кылзӥськисесь вал, мон тӥ пӧлын луыку гинэ ӧвӧл, нош али уката но мон тӥ пӧлын луымтэ дыръя. Асьтэлэн утиськонды понна кышкаса, куалекъяса тырше.13Аслыз ярамон луон понна Инмар тӥлесьтыд мылкыддэс ӝутэ, ӟеч ужъёс тӥледыз лэсьтытэ.14Ваньзэ керӟегъяськытэк, керетытэк лэсьтэ.15Сьӧлыко, сӧриськем калык пӧлын тӥ Инмарлэн дун-шектэм пиналъёсыз мед луоды. Соос понна тӥ шунды кадь пиштыса улэ.16Евангелиея улэ, Христослэн лыктон нуналаз мон данъяськыны мед быгатысал, юнме ӧй тыршы, юнме ӧй ужа шуыса.17Тӥляд оскондылы ужаме-тыршеме понна курбонлы ке но пӧрми, мон шумпотӥсько, тӥледын огазьын шумпотӥсько.18Тӥ но шумпотэ, монэн валче шумпотэ.

19Кузё-Инмар Иисус эриксэ сётӥз ке, ӝоген тӥ доры Тимофеез ыстыны малпасько, тӥляд улон югдурды сярысь иворъёс тодэм берам мон но лулыным-духеным мед буйгасал.20Мынам ӧвӧл уго мукетыз со кадь тыршисез, тӥ сярысь сокем юн сюлмаськисез, –21уго ваньзы асьсэлы ярамонзэ утчало, Иисус Христослы ярамонзэ уг утчало.22Нош Тимофейлэсь оскиськымон луонзэ тӥ тодӥськоды, малы ке шуоно со монэн ӵош атаеныз кадь Ӟеч Ивор тодытыса ветлӥз.23Азьпалан асэным мар луонэз тодӥ ке, мон малпасько, соку ик сое ыстыны.24Кузё-Инмарлэн эрикез вань ке, ачим но ӝоген тӥ доры вуо шуыса малпасько.

25Нош мон Епафродитэз тӥ доры берен ыстыны кулэ шуыса лыдъясько, аслэсьтым братме, ӵош ужан, ӵош тыршон эшме, тӥлесьтыд ыстэм мурттэс, ёрмыса улон дыръям со мыным юрттӥськыса ужаз.26Солэн ваньдэс тӥледыз туж адӟемез потэ, со юн куректэ, висёнэз сярысь ивор тӥ доры вуэм шуыса.27Со уго кулоно кадь висе вал, нош Инмар сое жаляз. Сое гинэ ӧз жаля, монэ но жаляз – куректон-кайгу вӧзам куректон-кайгу ӧз ватса.28Соин ик мон сое ӝоггес тӥ доры берыктӥсько, сое выльысен адӟыса, тӥ мед шумпотоды, мынам но сюлэмшугъяськонэ ичигес мед луоз шуыса.29Сое, Кузё-Инмарлэсь адямизэ, шумпотыса пӧлады кутэ, со кадь адямиосты гажаса, сӥлы карыса возе,30со уго Христослэн ужез понна кулӥське вал ни. Ас улонзэ жалятэк, мыным юрттӥськыса лэсьтӥз сое, мае тӥ мыным лэсьтыны ӧд быгатэ.


предыдущая глава Глава 2 следующая глава