Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ФИЛИППЫ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 1

1-тӥ ЛЮКЕТ

1Иисус Христослэн ляльчиосыз Павелэн Тимофей Филиппы карысь епископъёслы, диаконъёслы, Иисус Христос бордын вань вӧсяськисьёслы салам верало.2Инмар Атаймылэн но Кузё-Инмарлэн Иисус Христослэн дэлетэз, каньыллыкез тӥ пӧлын мед улоз.

3Тӥледыз тодам вайыкум, мон ялан Инмарлы тау карисько.4Котьку вӧсяськыкум, ваньды понна шумпотыса вӧсяськисько,5уго нырысетӥ нуналысен кутскыса туннэ нуналозь ик Ӟеч Иворез тодытонэ тӥ пыриськиськоды.6Мон юн оскисько, тӥ пушкын ӟеч ужез мытӥсь Инмар Иисус Христослэн лыктоно нуналозяз сое пумозяз вуттоз шуыса.7Ваньды сярысь тазьы малпаны мынам муге вань уго, малы ке шуоно тӥ – мынам сюлэмам, мон жильыетын пукыкум но, Ӟеч Иворез утьыкум-вӧлмытыкум но, тӥ ваньды мон кадь ик, Инмар дорысь ӟечлык-дэлет басьтӥсьёс луиськоды.8Одӥг Инмар тодэ, кызьы мон тӥледыз ваньдэс Иисус Христослэн яратонэныз яратӥсько.9Мон вӧсяськисько, тодон-валан, визьлык басьтыса, тӥляд яратонды эшшо но эшшо мед будоз,10ӟечсэ бырйыны быгатӥсесь мед луоды, Христослэн лыктон нуналаз тӥ чылкытэсь, шектэмесь мед луоды шуыса.11Инмарез данъян, ушъян понна Иисус Христос тӥледыз шонер улонлэн емышеныз тыр мед кароз.

12Но мынам потэ, агай-вынъёсы, тӥ мед тододы, Ӟеч Иворез тодытонын мынам кылдэм югдуре берекетлы луиз шуыса.13Озьы Христос понна мынам жильыетэ сюреме эксэй юртын возьмаськисьёслы, ваньмызлы мукетъёсызлы но тодмо луиз.14Агай-вынъёс пӧлысь тросэз мынам жильыетын пукеменым сэрен, Кузё-Инмар бордын юнматскыса, чик кышкатэк, эшшо но золгес Инмар кылэз тодытыны кутскизы.

15Зэм но, куд-огъёсыз вожъяськыса, куд-огъёсыз вожпотон мылкыдын улыса, нош мукетъёсыз ӟеч мылын-кыдын Христос сярысь тодыто.16-17Одӥгъёсыз ӟеч мылын-кыдын тодыто, уго соос тодо, мон Евангелиез утьыны пуктэмын шуыса; нош мукетъёсыз, вожпотон мылкыдын улӥсьёс, мынэсьтым зӥбетме секытгес карыны малпаса, Христосэз чылкыт сюлэмен уг тодыто.18Нош мар-о бен? Ӟеч мылкыдтэк-а яке ӟеч мылын-кыдын-а – котькызьы Христос сярысь мед тодытозы, – мон солы шумпотӥсько, шумпото но.19Тодӥсько уго, тӥляд вӧсяськеменыды но Иисус Христослэн Духезлэн юрттэтэз пыр та мыным утиськонлы луоз.20Мон чидатэк витисько но оскиськисько, номырин возьытэ уськытэмын уг луы шуыса, кышкасьтэм луыса, улон-вылонэ пыр Христос данэ потоз али но, котьку но – я мон улэп-а луо, я кулэмын-а луо.21Христос – со мынам улонэ, нош кулон – мынам ӟеч адӟонэ.22Та дуннее улыны кылёно ке, со мынам ужелы емыш вае. Но соку мон уг тодӥськы, мае мыным бырйыны, –23соиз но, таиз но мынэсьтым мылкыдме лӧпкытэ. Таисьтыз дуннеысь кошкыса, Христосэн огазе кариськеме потэ, – тазьы ке луоно, со вераны луонтэм умойгес.24Но тӥ понна умойгес луоз, мон улэп ке кыли.25Но мон тае ӟеч тодӥсько: осконын тӥляд азинлыкты, шумпотонды мед луоз шуыса, мон тӥ пӧлы улэпен кылё но тӥледын ваньмыныды огазьын уло.26Тӥ доры эшшо одӥг пол лыктоно луи ке, мон пыр Иисус Христосэн ушъяськонды эшшо но мед йылоз шуыса.

27Христослэн Ӟеч Иворезлэн куронэзлы ярамон улэ. Дорады лыктыса, тӥледыз адӟи ке, ӧй ке но лыкты тӥ доры, – мон тӥ сярысь мед кылысал, одӥг духен улӥськоды, Евангелие понна, оскон понна огкылысь нюръяськиськоды шуыса.28Тушмонъёслэсь чик эн кышкалэ. Соос понна та быронзылэн тодметэз луэ, нош тӥ понна – утиськонлэн тодметэз. Та Инмарлэн сётэмез луэ.29Малы ке шуоно тӥледлы Христос понна Солы оскон гинэ ӧвӧл, Со понна курадӟон адӟон но сётэмын.30Кыӵезэ нюръяськонэз мон нуи, сыӵезэ ик тӥ но нуиськоды. Ас синмыныды адӟиды сое, али но кылӥськоды, нюръяськисько шуыса.


предыдущая глава Глава 1 следующая глава