Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ЕФЕС КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 6

6-тӥ ЛЮКЕТ

1Нылпиос! Кузё-Инмарлы ярамон мед луоды шуыса, анай-атайёстылы тэрытске, уго тазьы улон – со шонер улон.2«Атайдэ но анайдэ сӥлы кар – тазьы вера сӥзиськонэз ванё нырысетӥез курон-косон, –3тыныд умой мед луоз, музъем вылын кема мед улод».4Тӥ но, атайёс, асьтэлэсь нылпиостэс эн керӟегъяськытэ, Кузё-Инмарлэн дышетонэз, валэктон-визьманъёсыз вылэ пыкиськыса, соосты будэтэ.

5Ляльчиос! Асьтэлэн музъем вылысь кузёостылы Христослы кадь чылкыт сюлмыныды, кышкаса, куалектыса тэрытске.6Адямиослы возьматскон понна гинэ ӧвӧл, кызьы адямиослы кельшыны тыршисьёс лэсьто, нош тӥ, Христослэн ляльчиосыз, Инмарлэсь эриксэ лулысь-сюлмысь быдэсъялэ.7Адямиослы кадь ӧвӧл, Кузё-Инмарлы кадь лулысь-сюлмысь тыршыса улэ.8Тодэлэ, котькудӥз но адями ӟеч ужез понна Кузё-Инмарлэсь кузьым басьтоз – ляльчи-а со яке эрико адями-а со.9Тӥ но, кузёос, ляльчиосыныды тазьы улэ: кышкатыса-курдатыса соосты эн возе. Тодэ: тӥляд но, соослэн но Инмын одӥг Кузё-Инмарды. Со ваньзэ одӥг кадь яратэ, огзэ но улӥё-вылӥё уг кары.

10Эшшо тае верало на: агай-вынъёсы, Кузё-Инмар бордын, Солэн туж бадӟым кужмыныз юнматске.11Диаволлэн кескич ужъёсызлы пумит сылыны тӥ мед быгатоды шуыса, Инмарлэсь вань ожмаськон тӥрлыкъёссэ вылады дӥсялэ,12малы ке шуоно асьмеос ум нюръяськиське адями луллы, мугорлы пумит, асьмеос нюръяськиськомы сьӧд кужымъёслы, соослэн кузёоссылы пумит – пеймыт дуннеен кивалтӥсьёслы, инмысь урод духъёслы пумит.13Соин ик Инмарлэсь ожмаськон тӥрлыкъёссэ дӥсялэ, урод нунал вуиз ке, соослэн пумитазы султыны, ваньзэ чиданы но пумозяз возиськыны мед быгатоды.14Султэ, юн сылэ, кусъёстэс зэмлыкен думе, шонер улонлэсь корт дӥсьсэ дӥсялэ.15Тупаса улон сярысь Ӟеч Иворез тодытыны пыдысьтыды пыдкутчанды дась мед луоз.16Эшшо осконлэсь щитсэ кияды басьтэ, соин кескичлэсь ӟырдатыса лэзьям вань ньӧлъёссэ кысыны быгатоды.17Эшшо, утиськонлэсь корт изьызэ басьтэ, Духлэсь мечсэ – Инмар Кылэз – кияды кутэ.18Духен тыр луыса, ялан вӧсяськыса, молитваос лыдӟыса, сэзь-йыгмыт улэ. Вань вӧсяськись калык понна сюлмысьтыды вӧсяське.19Инмар кыл сярысь вераськыны кутски ке, соку ик мон кышкатэк Ӟеч Иворлэсь ватӥськыса улӥсь зэмлыксэ усьтыны мед быгатом шуыса, мон понна но вӧсяське.20Жильые дурылыса ыстэм мурт мон, Ӟеч Ивор понна ужасько-тыршисько. Кызьы кулэ, озьы, кышкатэк Ӟеч Иворез мед тодытысал шуыса, мон понна вӧсяське.

21Нош тӥляд мынэсьтым югдурме, ужъёсме тодэмды потӥз ке, ваньмыз сярысь тӥледлы Тихик ивортоз, – гажано братмы, Кузё-Инмарлы оскымон ужась-тыршись.22Сое мон тӥ доры со понна ыстӥсько: ми сярысь иворъёсты тӥ мед тододы но тӥлесьтыд сюлэмдэс со мед буйгатоз шуыса.

23Инмар Атайлэсь но Кузё-Инмарлэсь Иисус Христослэсь агай-вынъёслы каньыллыко, яратыса, оскыса улон сӥзисько.24Кузё-Инмармес Иисус Христосэз ваньмызлы пумтэм мур яратӥсьёслы Инмар дэлетсэ мед сётоз. Аминь.


предыдущая глава Глава 6 следующая глава