Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ГАЛАТИЯЫН УЛӤСЬЁСЛЫ ЫСТЭМ ГОЖТЭТЭЗ

Глава 3

3-тӥ ЛЮКЕТ

1Эй, нодтэм галатъёс! Кин тӥледлы син уськытӥз, зэмлыклы тэрытскисьтэм луыны дышетӥз? Тӥ дорын кортӵогам Иисус Христос тӥляд син азяды возьматэмын ӧй вал-а?!2Тае гинэ тӥлесьтыд тодэме потэ: Моисей законэз быдэсъямды понна-а яке Ӟеч Иворез кабыл басьтэмды понна-а тӥ Святой Духез басьтӥды?3Сокем-а тӥ нодтэмесь: Духлэн дэлетэныз улыны кутскиды, нош табере сое адями кужымен-а йылпумъяны малпаськоды?4Юнме гинэ шат тӥ сокем трос чидано луиды? Юнме гинэ ӧй вал, дыр.5Моисей законэз быдэсъямды понна-а яке Ӟеч Иворез кабыл басьтэмды понна-а Инмар тӥледлы Святой Духез сётэ, тӥ пӧлын паймымон ужъёс лэсьтэ?6Тани, Авраам Инмарлы оскиз, но та понна Инмар сое шонер улӥсь шуыса гожтӥз.

7Тодэлэ ук: Инмарлы оскись муртъёс Авраамлэн нылпиосыз луо.8Священной Гожтэмын азьпалзэ тодыса верамын вал, Инмар язычникъёсты оскон пыр шонере поттоз шуыса. Уго Авраамлы Инмар таӵе ӟеч ивор вераз: «Тон пыр вань калыкъёс бакель каремын луозы».9Озьыен, ваньмыз Инмарлы оскисьёс Инмарлы оскись Авраамен огазьын бакель каремын луозы.10Ваньмыз Моисей законэз быдэсъян вылэ оскиськыса улӥсьёс карган улэ сюремын. Священной Гожтэмын тазьы шуэмын уго: «Закон книгае гожтэмысь марзэ ке одӥгзэ быдэстӥсьтэм мурт каргамын луэ».11Инмар азьын нокин но Моисей законэн шонере потыны уг быгаты. Со валамон, малы ке шуоно шонер улӥсь оскон пыр пумтэм вапумъёс ӵоже улоз.12Нош Моисей закон оскон вылэ уг пыкиськы. Сое быдэсъясь мурт гинэ со пыр пумтэм вапумъёс улоз.13Асьме понна карган луыса, Христос асьмеды законлэн карган улысьтыз мозмытӥз. Моисей законын гожтэмын уго: «Котькудӥз но писпу бордын ошиськыса улӥсь мурт каргамын».14Инмарлэсь Авраамлы сӥзьыса сётэм бакель каронзэ Иисус Христос пыр язычникъёс но мед басьтозы. Инмарлэсь сӥзьыса сётэм Духсэ оскон пыр асьмеос но мед басьтомы.

15Агай-вынъёс! Адями визьмын верасько: адямилэсь сӥзиськон гожтэтсэ но, со шонер лэсьтыса юнматэмын ке, сое воштыны, отчы маке но ватсаны нокин но уг ни быгаты.16Нош Авраамлы но, солэн кидысэзлы-выжыезлы но сӥзиськонъёс сётэмын вал. Шуэмын ӧвӧл «кидысъёсыдлы» – трос муртъёслы кадь, нош шуэмын одӥг муртлы кадь: «тынад кидысэдлы», нош кидыс – со Христос.17Тани мон мае верасько: Христос сярысь Инмарлэсь азьвыл юнматыса сётэм сӥзёнзэ ньыль сю куамын ар ортчыса вуэм закон уг вошты, сӥзёнлэсь кужымзэ быдтыны со уг быгаты.18Уго Моисей закон пыр Инмар дорысь люкетэз басьтыны луысал ке, соку сое сӥзиськон пыр басьтыны ӧй ни луысал. Нош Авраамлы Инмар сӥзиськон пыр люкет сётӥз.

19Соку нош законлэн кыӵе кулэлыкез? Со берлогес сётэмын вал, йыружъёслы луыса, Кидыслэн лыктонэз дырозьлы, Кудӥзлы сӥзён сётэмын вал. Закон Кылчинъёс пыр, куспын сылӥсьлэн киыныз сётэмын вал.20Куспын сылӥсь огез пала гинэ уг пыры, нош Инмар – одӥг.

21Озьыен, Моисей закон Инмарлэн сӥзёнъёсызлы пумит сылэ? Уг. Озьы ӧвӧл! Уго улон вайыны быгатӥсь закон сётэмын луысал ке, соку, зэм ик, шонере потонэз закон пыр басьтыны луысал.22Нош Священной Гожтэм вера, кызьы быдэс дунне сьӧлыклэн жильыетаз улэ, соин ик, сӥзиськем Иисус Христослы оскисьёслы оскон пыр сётэмын луоз шуыса.

23Нош та оскон вуытозь, осконлэн усьтӥськон дырыз вуытозь, ми законлэн ворсэт улаз пытсамын вал.24Оскон пыр шонере мед потомы шуыса, Моисей закон ми понна Христос доры нылпиосты валтыса нуллӥсь кадь вал.25Нош оскон вуэм бере нылпиез валтыса нуллӥсьлэн киулаз ми ӧвӧл ни.

26Уго Иисус Христослы оскон пыр ваньды тӥ Инмарлэн нылпиосыз луиськоды;27ваньды тӥ, Христос бордын пылатӥськемъёс, Христосэн шобырскиды.28Ӧвӧл ни табере иудей но, эллин но; ӧвӧл ни ляльчи но, эрико мурт но; ӧвӧл ни пиосмурт но, кышномурт но: уго Иисус Христос бордын ваньды тӥ одӥг мугор луиды.29Нош тӥ Христослэн ке, соку тӥ Авраамлэн кидысэз, Инмарлэн сӥзиськонэзъя люкет басьтӥсьёс луиськоды.


предыдущая глава Глава 3 следующая глава