Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН ГАЛАТИЯЫН УЛӤСЬЁСЛЫ ЫСТЭМ ГОЖТЭТЭЗ

Глава 2

2-тӥ ЛЮКЕТ

1Дас ньыль ар ортчыса, Титэз сьӧрам басьтӥ но Варнаваен ӵош мон нош ик Иерусалиме ветлӥ.2Отчы мыныны кулэ шуыса, Инмар мыным валан сётэм бере мон отчы мынӥ но язычникъёс пӧлын тодытоно Ӟеч Иворез соослы верай. Сӥё-даноосын нимысьтыз вераськи, тодыны кулэ вал уго, юнме гинэ уг-а тыршиськы, юнме гинэ ӧй-а тыршы шуыса.3Монэн ӵош лыктэм Титэз, со грек ке но вал, солы но одно ик вандӥськон сямез ортчытыны кулэ шуыса ӧз ёртэ.4Зэм, асьмеды ляльчи-медо карон понна асьме пӧлы ӧрекчи агай-вынъёс чуртнаськыса пыризы. Соос лушкемен чакланы кутскизы Иисус Христос бордын асьмелы сётӥськем эрикмес.5Ӟеч Иворысь зэмлык воштытэк тӥ пӧлын мед улоз шуыса, соослы ми пичи но ӧм сётске, ӧм тэрытске.6Сӥё-даноос шуыса лыдъяськисьёс ласянь, олокыӵеесь ке но, оло, соос вал, нош мон понна соос номыр кадь но уг пото: Инмар адямиез ымныр чеберезъя уг дунъя уго. Та сӥё-даноос мыным номыр но выльзэ ӧз сётэ.7Соос валазы, мыным язычникъёслы, нош Петрлы – иудейёслы Ӟеч Ивор тодытон оскемын шуыса.8Уго Со ик, Кин Аслаз кужыменыз Петрез иудейёслы апостол кариз, Со ик монэ язычникъёслы апостол кариз.9Инмарлэн мыным сётэм дэлетэз сярысь тодэм беразы Иаков, Петр, Иоанн – вӧсяськисьёслэн осконлэн пыкъетэз луо шуыса сӥлы кароно муртъёссы – валче ужаломы-тыршомы шуыса, Варнавалы но мыным кизэс сётӥзы. Ми язычникъёс доры мед мыномы, нош соос иудейёс доры мынозы шуыса, соглаш луэмзэс веразы.10Начар улӥсьёслы юрттӥськыны ми ноку медам вунэтэ шуыса, соос милемыз куризы. Та ужез мон котьку но сюлмысьтым тыршыса быдэсъялляй.

11Петр Антиохияе лыктэм бере, соин соглаш уг луиськы шуыса, мон солы шонерак верай. Уго со янгыш вал:12Иаков дорысь ыстэм муртъёс вуытозь, Петр язычникъёсын валче сиськиз, нош куке та муртъёс татчы вуизы, иудейёслэсь кышкаменыз, со язычникъёслэсь палэнскылыны кутскиз.13Соин валче мукет иудейёс но чеберъяськыны выризы. Варнава гинэ но соослэн чеберъяськонзылы сётскиз.14Нош Евангелилэн куронъёсызъя кызьы кулэ, озьы соос уг лэсьто шуыса адӟем берам мон ваньмыз азьын Петрлы шуи: «Тон иудей луыса вылысь иудейёс кадь уд улӥськы. Язычникъёс кадь улӥськод ке, малы соку язычникъёсты иудейёслэн сямъёссыя улыны ёртӥськод?»

15Вордскеммыя ми иудейёс луиськомы, ”сьӧлыко язычникъёс” пӧлысь потэмын ӧвӧл.16Моисей законэз быдэсъян пыр адями шонере уг поты, Иисус Христослы оскон пыр гинэ со шонере потэ шуыса тодэммы бере ми но Иисус Христослы оскыны кутскимы, – законэз быдэсъян пыр ӧвӧл, нош Христослы оскон пыр шонере потон понна. Уго Моисей законэз быдэсъяса, одӥг адями но шонере уз поты.17Нош Христос пыр шонере потон утчаса, милемды но сьӧлыкоесь луиськомы шуо ке, соку, оло нош Христос но сьӧлыклы ужась луэ шат? Нокызьы но озьы ӧвӧл!18Мон нош ик лэсьтӥсько-кылдытӥсько ке сое, мае куашкатӥ, соку мон та уженым йыруж лэсьтӥсь луэмме возьматӥсько.19Инмарлы яраса улон понна закон пыр мон законлы кулӥ. Мон Христосэн ӵош кортӵогаськи,20табере мон уг ни улӥськы, мон пушкын Христос улэ. Лулын-мугорын улӥсько ке, улӥсько Инмар Пилы осконэн, Кудӥз монэ яратӥз но Ассэ мон понна курбонлы сётӥз.21Инмарлэсь дэлетсэ мон кулэтэм уг кариськы. Шонере потон Моисей закон пыр луысал ке, соку Христос юнме кулэмын луысал.


предыдущая глава Глава 2 следующая глава