Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 12

12-тӥ ЛЮКЕТ

1Ушъяськыса мон нокыӵе но пайда уг басьтӥськы. Кузё-Инмарлэн сётэм адӟонъёсыз, усьтӥськонъёсыз сярысь верало.2Христослы оскись одӥг адямиез тодӥсько, кудӥз дас ньыль ар талэсь азьвыл, мугорын-а – уг тодӥськы, мугортэк-а – уг тодӥськы: Инмар тодэ, куинетӥ инбаме ӝутэмын вал.3Та адями сярысь тодӥсько, уг гинэ тодӥськы – мугорын-а яке мугортэк-а: Инмар тодэ, –4со рае ӝутэмын вал. Со кылӥз адями кылын вераны луонтэм кылъёсты.5Таӵе адямиен ушъяськыны быгатӥсько, нош асэным уг ушъяськы. Аслам ляблыкъёсыным гинэ ушъяськи ке ушъясько шат.6Шонерзэ вераса, ушъяськеме потӥз ке, ушъясько, но мон визьме ыштэм мурт кадь соку уг луы, малы ке шуоно зэмлыкез верало; но мон уг ушъяськиськы. Мынам уг поты уго, мон шоры учкыкуз, мар адӟемзэ яке мон сярысь мар кылэмзэ, солэсь умойгес луисько шуыса, сое малпатэме.7Мыным сыӵе паймымонэсь адӟонъёс усьтэмын вал, но мон йырме укыр вылэ медам ӝуты, укыр медам вылтӥяськы шуыса, монэ курадӟытон понна мынам мугорам ши бышкалскиз – шайтанлэн кылчинэз.8Монэ солэсь мед мозмытоз шуыса, куинь пол кутскыса, мон Кузё-Инмарлы вӧсяськи.9Нош Кузё-Инмар мыным шуиз: «Мынам гажан-жалянэ – со тыныд мед тырмоз, уго тон лябӟыса улон дыръя Мынам кужыме юнгес шарае потэ». Соин ик мон золгес аслам ляблыкъёсыным ушъяськисько, Христослэн кужымез мон пушкы мед пыроз шуыса.10Христос понна лябӟыса, ӝожомонэ сюрыса, ёрмыса улыкум, улляса, ӝикатыса возьыкузы, шумпотыса улӥсько: уго, куке мон лябӟемын, соку мон кужмо.

11Визьме ыштэм мурт кадь мон аслым потӥсько, уго тӥ монэ со калэ вуттӥды. Тӥледлы кулэ вал монэ ушъяны, уго со ”вылӥ апостолъёсын” ке ӵошатоно, мон номырин но соослэсь улӥын ӧвӧл, нокин ке но мон ӧвӧл.12Мынам апостол луонэ трос чиданъёс, паймымон тодметъёс, ужъёс, кужымъёс пыр тӥ пӧлын возьматэмын вал.13Мукет черкъёсын ӵошатыса, мар тӥледлы уг тырмы? Со гинэ ке шат: тӥледыз мон номырин ёртыса ӧй возьы. Со понна монэ простить каре.14Тани, мон куинетӥ ползэ тӥ доры лыктыны дасяськисько. Тӥледыз ёртыса уг возьы, мон уго тӥлесьтыд ваньбурдэс уг утчаськы, тӥледыз асьтэдыз утчасько. Нылпиос анай-атайёссылы ваньбур люканы кулэ ӧвӧл, анай-атайёс нылпиослы ваньбур люканы кулэ.15Маи мынам вань, сое шумпотыса сёткало, тӥлесьтыд лулдэс утён понна номыртэк кыльыны дась. Мон тӥледыз туж яратӥсько ке, нош тӥ монэ малы ӧжытгес яратыны кулэ?16Шуомы, мон тӥледыз ёртыса ӧй возьы, но кескич адями кадь кескич амалэн тӥледыз киулам басьтӥ.17Тӥ доры ыстылэм адямиосы пыр басьтылӥ-а мон тӥлесьтыд аслым барыш-люкет?18Мон Титэз тӥ доры мыныны косӥ, соин ӵош агай-вынъёс пӧлысь одӥг муртэ ыстӥ. Тит тӥлесьтыд аслыз барыш-люкет басьтӥз-а? Одӥг духен ми соин ӧм улэ-а? Одӥг сюрестӥ ӧм ветлэ-а?

19Эшшо уд малпаське на-а, ми тӥ азьын асьмемыз шонере поттыны гинэ выриськомы шуыса? Инмар азьын, Христос понна ми вераськомы: ваньмыз та, гажаноосы, тӥледыз визьман-нодъян понна.20Мон уго тани малэсь кышкасько: лыктэм берам медам адӟы вал тӥлесьтыд мыным яратыны ярасьтэм луэм дырдэс. Озьы ик тӥ но монэ медад адӟе кыӵе луон дырме тӥ уд яратӥське. Медам адӟы вал тӥ пӧлысь керетонъёсты, вожъяськонъёсты, лекъяськонъёсты, кыл сётканъёсты, кыл нуллонъёсты, урттылӥськонъёсты, вылтӥяськонъёсты, туркам-таркам радтэм улонэз.21Лыктӥ ке, нош ик тӥ дорын Инмаре монэ кулэтэм медаз кары вал. Тӥ пӧлысь тросэз понна мыным бӧрдоно медаз луы вал – азьвыл кырсь ужъёс лэсьтыса, азыса-калгыса, юрӟым ужъёс лэсьтыса улэмъёс понна ӧпкельыса сьӧлыкъёссылэсь куштӥськымтэ муртъёс понна.


предыдущая глава Глава 12 следующая глава