Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 11

11-тӥ ЛЮКЕТ

1Э, мынэсьтым нодтэм луэмме ӧжыт ке но чидасалды ке! Чидалэ монэ.2Тӥ понна уго мон Инмарлэн сётэм сюлмаськонэныз сюлмаськисько, малы ке шуоно мон тӥледыз одӥг гинэ Пимуртлы, Христослы курай. Со азе тӥледыз, сьӧлыкамтэ дун-чылкыт вылькенэз кадь дун-чылкыт карыса, султытэме потэ.3Но кышкасько, кызьы кескич амалэн кый Еваез ӧрекчаз, озьы ик тӥляд но визьёсты медаз тугаське вал, Христослы дун-чылкыт оскон бордысь медад палэнске вал.4Уго кин ке но лыктыса мукет Иисус сярысь тодытыны кутске ке, кудӥз сярысь ми ӧм тодытэлэ, яке мукет духез вае ке, кудзэ ми ӧм вае, яке мукет ”ӟеч иворез”, кудзэ ми ӧм тодытэ, – сыӵе муртъёсын тӥ туж тупаса улӥськоды.5Но мон малпасько, со ”вылӥ апостолъёстылы” номырин но мон уг сётскы.6Вераськон ласянь мон олокыӵе ик усто ӧвӧл ке но, со понна тодон-валанэ вань. Котьмар ласянь но ми тӥледлы туж тодмоесь луиськомы.

7Тӥледыз ӝутон понна, асме ачим ултӥяса, Инмарлэсь Ӟеч Иворзэ тӥледлы дунтэк-кузьымтэк тодытыса, оло нош мон сьӧлык лэсьтӥ?8Тӥледлы юрттӥськон понна, мукет черкъёслэсь талам кадь уждун бичаса, соосты шуге-леке вуттылӥ; тӥ дорын улыкум, ёрмонэ сюрылӥ ке но, нокинлы но акыльтыса ӧй улы.9Ёрмыса улыкум, монэ сюдӥзы-вордӥзы Македонияысь вуэм агай-вынъёс; мон ачим но уго тырши, тыршисько но тӥледлы акыльтытэк улыны.10Христослэн нимыныз, кыл сётыса, зэмлыкез верасько: Ахаия шаерын та пумысен ушъяськемысь нокин но дугдытыны уз быгаты.11Малы? Оло, мон тӥледыз уг яратӥськы шуыса-а? Инмар тодэ, кызьы мон тӥледыз яратӥсько.

12Но кызьы лэсьтӥ, озьы ик лэсьто азьланяз но. Инмар ужез милемын одӥг кадь лэсьтӥськом шуисьёслы ушъяськыны муг уг сёты.13Соос – ӧрекчи апостолъёс, кескич ужасьёс. Христослэн апостолъёсыз шуыса, асьсэды возьматыны тыршо ке но.14Паймонэз ӧвӧл: уго ачиз шайтан югытлэн Кылчинэз тусъем кариськыны быгатэ.15Соин ик туж бадӟым уж ӧвӧл, шайтанлы ужасьёс асьсэды шонер улонлэн ужасьёсыз шуыса возьматыны тыршо ке. Но соослы пум вуоз, соос асьсэлэн ужзыя пунэмзэс басьтозы.

16Эшшо верало на: нокин но монэ визьзэ ыштэм мурт шуыса медаз лыдъя. Озьы малпаськоды ке, соку визьзэ ыштэм муртэ кадь ке но монэ кабыл басьтэ, ӧжыт ке но ушъяськыны мед быгатом шуыса.17Мар али верасько, уг вераськы Кузё-Инмарлэн сётэм эрикезъя, зэмзэ но, визьзэ ыштэм мурт кадь мон али ушъяськыса верасько.18Кызьы таяз дуннеын тросэз улӥсьёс адями кадь асэнызы ушъясько, мон но ушъяськоно кариськи.19Тӥ уго, визьмо-валась адямиос, нош нокыӵе кариськытэк визьзэс ыштэмъёсты чидаса кылзӥськиськоды.20Тӥ чидаськоды сое, кин тӥледыз зӥбет улэ пыртэ, кин тӥлесьтыд люкеттэс сие, кин тӥледыз тала-кыска, кин ассэ вылӥе пуктэ, кин тӥляд ымнырады мыжге-чабке.21Возьдаськыса верано луисько: асьмелэсь кужымтэм луэммес возьматӥмы. Нош кин ке, маин ке ушъяськыны уг кышка, – визьзэ ыштэм мурт кадь верасько, – мон но дӥсьтӥсько ушъяськыны.22Соос еврейёс? – Мон но еврей. Соос израиль пиос? – Мон но. Соос Авраамлэн кидысэз? – Мон но.23Соос Христослэн ужасьёсыз? Визьме, оло, ыштӥ, но шуисько: «Мон соослэсь ӟечгес ужась». Мон соослэсь тросгес ужай-тырши, лыдъянтэм пол яраё, вӧсь каремын вал; трос пол пытсэтъёсын монэ возизы, трос пол бырон калэ вуылӥ.24Иудейёс монэ, вить пол кутскыса, куамын укмыс пол ньӧрен шуккизы;25куинь пол кутскыса, монэ бодыен жугизы; одӥг пол изэн лэзьяса тышказы. Куинь пол корабль куашканэ-выёнэ учыралляй, уй но нунал ӵоже зарезь ву вылын улоно луи.26Мон ялан сюрес вылын вал. Шуръёс вылын кышкыт учыръёсы сюрылӥ; йырвандӥсьёслэсь, ас иудей калыкелэн лек муртъёсызлэсь, язычникъёслэсь кышкаса улоно луылӥ. Нош городъёсын, кыр дуннеосын, зарезь вылъёсын кӧня чидано луылӥз?! Ӧрекчи агай-вынъёс пӧлын но кӧня куректон-кайгу вал;27ужаса, катьтэммыса, ӵем дыръя изьылытэк, сютэм, сю куасьмыса, ӵем визяса, кезьыт азьын, гольык но кӧня улӥ?!28Вань та верам учыръёс сяна, мон доры нуналлы быдэ трос калык люкаське, вань черкъёс сярысь но мыным сюлмаськыны кулэ.29Кин ке но катьтэммыку, мон уг катьтэммиськы ке шат? Кин ке но визь сынаськонэ сюрыку, мон со понна тылын уг ӝуаськы ке шат?

30Мыным маин ке но ушъяськыны кулэ ке, соку мон ушъясько аслам кужымтэм-кынартэм луэменым.31Пумтэм вапумъёсы данъямын мед луоз Инмар, Кузё-Инмармылэн Иисус Христослэн Атаез, Со тодэ, мон уг ӧрекчаськиськы шуыса.32Дамаскын дыръям Арета эксэйлэн ёросэн кивалтӥсез Дамаскын монэ кутон понна возьмаськыса улӥз; нош монэ укноысен борддор кузя корзинае поныса лэзизы. Озьы мон солэн киулысьтыз мозмытскыны быгатӥ.


предыдущая глава Глава 11 следующая глава