Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 8

8-тӥ ЛЮКЕТ

1Агай-вынъёсмы, Македонияысь черкъёслы Инмарлэн сётэм дэлетэз сярысь милям тӥледлы ивортэммы потэ.2Туж секытэсь куректон-кайгуос пӧлын но соос шумпотонэн пачылмыса уло; туж куанер-начар улонзы дыръя но шырыт сямзэс возьмато.3Мон ачим адӟи, кызьы соос, нокин косытэк, кӧня быгатӥзы, сомында юрттэт сётказы, солэсь но тросгес.4Македонияысь вӧсяськисьёс милемыз сюлмысьтызы куризы бичам юрттэтсэс басьтыны но милемын ӵош Иерусалимысь вӧсяськись калык понна юрттӥськыса ужаны.5Тазьы луоз шуыса, ми ум но оскиськиське вал. Соос асьсэзыз асьсэос, нырысь ик Кузё-Инмарлы, нош собере Инмарлэн эрикезлы тэрытскыса, милям киуламы сётӥзы.6Соин ик Титэз ми куримы, таизэ но кутскем ӟеч ужзэ тӥ дорын мед быдэстоз шуыса.

7Тӥляд ваньмыз тырмыт – осконды но, кыллы устолыкты но, тодон-валанды но, тыршонды но, тӥляд милемыз яратонды но. Озьы бере, та ужады но шырыт сямоесь луэ.8Косон та ӧвӧл. Мукетъёслэн тыршонзы сярысь вераса, тӥляд яратондылэсь оскиськымон луонзэ эскерисько.9Тӥ уго тодӥськоды Кузё-Инмармылэсь Иисус Христослэсь гажан-жалянзэ. Со узыр вал, но тӥ понна начар луиз: Аслаз начар луонэныз тӥледыз узыр карон понна.10Та пумысен мон визь-кенеш сётӥсько: со тӥледлы пайда ваёз. Но кылем арысен ик ини сое мылкыдады возем гинэ ӧвӧл, но, сюлэмдэс поныса, тае лэсьтыны кутскиды ини.11Нош табере кутскем уждэс пумозяз вуттэ ни. Мае сюлмысьтыды лэсьтыны мылкыд кариды, сое ас моӵтыя быдэстыны тырше.12Уго тӥляд сюлмаськон-тыршонды вань ке, ваньлыктыя-моӵтыя сётэм кузьымдэс Инмар кабыл басьтоз, нош марды ӧвӧл, сое Со кулэ уг кары.13Озьы луыны кулэ ӧвӧл: огъёсызлы капчи мед луоз, нош тӥледлы – секыт; ваньмызлы огкадь луыны кулэ.14Та дыре тӥляд мултэсмем ваньлыкты соослэсь ӧвӧллыксэс тырмытонэ мынӥз; нош бӧрысь, кулэ ке луиз, соослэн мултэсмем ваньлыксы тӥлесьтыд ӧвӧллыктэс тырмытонэ мыноз, ваньмызлы огкадь луыны кулэ.15Тазьы гожтэмын:

«Кин трос бичаз, солэн мултэсэз ӧй вал;
нош кин ӧжыт бичаз, солэн но ёрмон-ӟудонэз ӧй вал».

16Инмарлы тау Титлэн но сюлмаз тӥ сярысь сыӵе сюлмаськон-тыршон понэмез понна.17Тит – сюлмо адями, со ачиз мылкыд карыса, нокин косытэк, тӥ доры мыныны потӥз; милесьтым куронмес но пеляз понӥз.18Соин ӵош одӥгзэ братмес ыстӥськомы, Ӟеч Иворез быгатыса тодытэмез понна сое вань черкъёс ушъяло.19Та ӟеч ужез быдэсъян дырмылы та братэз милемлы сьӧрамы юрттӥськыса ветлыны черкъёс бырйыса пуктӥзы. Юрттэт бичанэз Кузё-Инмарлэн данэз понна быдэсъяськомы, ӟеч мылкыд карыса, та бордын ми ужаськомы-тыршиськомы.20Чакласькиськомы но, – нокин но милемыз пыкылыны медаз быгаты таӵе уно коньдон люкаммы но сое кытчы кареммы пумысен.21Ми уго Кузё-Инмар азьын гинэ ӧвӧл, адямиос азьын но ваньмыз ӟеч мед луоз шуыса сюлмаськиськомы.22Соосын ӵош мукетсэ братмес но ми ыстӥськомы, солэсь тыршись луэмзэ трос пол, трос учыръёсы эскеримы ни. Со али эшшо но тыршисьгес луэмын, со уго тӥледлы туж юн оскиське.23Тит сярысь ке верано, со – мынам эше, тӥ дорын ӵош ужан муртэ; нош верано ке мукет агай-вынъёсмы сярысь, соос черкъёслэн ыстэм муртъёссы, Христослэн данэз.24Черкъёс азьын возьматэ-тодытэ ук асьтэлэсь со ыстэм муртъёсты яратэмдэс, мед тодозы, ми тӥледыз юнме ум ушъяське шуыса.


предыдущая глава Глава 8 следующая глава