Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 7

7-тӥ ЛЮКЕТ

1Гажаноосы, тӥни кыӵеесь сӥзёнъёс асьмелы сётэмын! Ойдолэ ук, лулмугорез но духез саптась вань юрӟым макеослэсь асьмеды сузяломе но Инмарлэсь кышканэн дун-сьӧлыктэм уломе.

2Усьтэлэ милемлы сюлэмдэс. Ми нокинэ но ӝоже ӧм уськытэ, нокинлы но урод уж ӧм лэсьтэ, нокин бордысь но пайда басьтон утчаса ӧм улэ.3Тӥледыз куаретыса-пыкылыса тае уг вераськы. Азьвыл ик уго верай ни – тӥ милям сюлмамы улӥськоды. Тӥледын валче улыны но, кулыны ми дасесь.4Мон тӥледлы туж оскиськисько, тӥледын туж данъяськисько; трос куректон-кайгуосмы дыръя но мон тӥ пумысен буйгамын, шумпотонэн пачылмемын.

5Македония музъеме вуэммы бере лулмы-сюлэммы, каньыллык шедьтытэк, улӥз; ми котыр ласянь ёртэмын вал: сьӧрласянь – керетон-даллашонъёс, нош асьмелэн сюлэм пушкамы кышкан-курданъёс улӥзы.6Нош востэмъёсты гажась-жалясь Инмар милемыз шумпоттӥз: ми доры Тит вуиз.7Солэн вуэмезлы гинэ ӧвӧл, но тӥляд со сярысь сюлмаськемды понна но шумпотомы. Со милемлы вераз, кызьы тӥляд монэ адӟемды потэ, кызьы тӥ мон понна бӧрдӥськоды, кызьы тӥ мон сярысь сюлмаськиськоды. Та понна мон туж зол шумпотӥ.8Соин ик, ыстэм гожтэтэным мон тӥледыз ӝожомытӥ ке но, уг жаляськы. Ӧжытак жаляй, куке адӟи, со ыстэм гожтэт ӧжыт дырлы ке но тӥледыз ӝоже уськытӥз шуыса.9Табере мон шумпотӥсько, тӥ ӝоже усиды шуыса уг, но со понна: ӝоже усиды но ӧпкельыса сьӧлыкъёстылэсь куштӥськыны кутскиды. Ӝоже усиды ке но, Инмар понна ӝоже усиды. Озьыен, ми тӥледлы нокыӵе но изъян ӧм вае.

10Уго Инмар понна ӝоже усён утиськонэ нуись ӧпкельыса сьӧлыкъёслэсь куштӥськонэз вордӥськытэ, нош та дунне понна ӝоже усён кулонэ нуэ.11Учке ук, Инмар понна ӝоже усёнды тӥ пушкын кыӵе тыршон, кыӵе шонере потон, кыӵе вожпотон, кыӵе кышкан, кыӵе мӧзмон, кыӵе сюлмаськон, урод ужъёс понна кыӵе кылзэс юан вордӥськытӥз! Котькуд ласянь та ужын асьтэлэсь чылкыт луэмдэс тӥ возьматӥды.12Озьыен, мон тӥледлы гожтӥ ке но, ултӥясь мурт понна но, ултӥяськем мурт понна но ӧй гожты, милям тӥ сярысь сюлмаськеммы Инмар азьын тӥледлы мед усьтӥськоз шуыса мон гожтӥ.

13Соин ик тӥляд шумпотэмды понна ми но шумпотӥмы. Нош эшшо но зол шумпотӥмы Титлэн шумпотонэзлы, малы ке шуоно тӥ ваньды солэсь духсэ буйгатӥды.14Мон со азьын тӥледыз туж ушъяй ке но, но со понна мон возьытэ ӧй усьы. Ми тӥледлы ӧрекчатэк, ваньзэ шонер вераллямы бере, озьы ик Тит азьын ушъяськонмы юнме ӧй вал.15Солэн лулыз-сюлмыз табере эшшо но зол тӥ пала берытске, куке со тодаз вае, кызьы тӥ солэсь верамзэ кабыл басьтӥды, кызьы тӥ сое мур гажаса, сюлэмдэс сётыса куно кариды.16Шумпотӥсько, котьмар пумысен но табере тӥледлы оскиськыны быгатӥсько ни шуыса.


предыдущая глава Глава 7 следующая глава