Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 3

3-тӥ ЛЮКЕТ

1Ми нош ик асьмеды асьмеос ӵектыны кулэ-а? Куд-огъёс кадь ик, оло, ми но тӥледлы яке тӥлесьтыд оскытӥсь гожтэмъёсты кулэ кариськомы?2Тӥ – милям гожтэтмы. Со милям сюлмамы гожтэмын; сое вань адямиос тодо, лыдӟо.3Тӥ асьтэос возьматӥськоды: тӥ – Христослэн гожтэтэз луиськоды шуыса. Со гожтэмын милям ужаммы-тыршеммы пыр. Чернилаен ӧвӧл, улэп Инмарлэн Духеныз, изпулъёс вылын ӧвӧл, сюлэмлэн мугоро пулъёсыз вылын гожтэмъёс тӥ луиськоды.

4Христос пыр Инмар азьын милям таӵе оскиськонмы вань.5Асьме бордысь потэм малпанэн маке но ӟечсэ лэсьтыны быгатӥсесь мед луысалмы, – озьы ӧвӧл, милям вань быгатонлыкмы Инмар бордысь потэ.6Со милемлы Выль Сӥзёнлэн ужась-тыршисьёсыз луыны быгатонлык сётӥз, букваен гожтэм сӥзён-косонлы ӧвӧл, Духен сётэм сӥзён-косонлы ужась-тыршись луыны, малы ке шуоно буква вие, нош Дух улэп улон сётэ.

7Букваен изъёс вылэ гожтэм законлы ужан-тыршон, кудӥз кулонэ нуэ, сокем данлыко ке вал – уго израиль пиослэн Моисейлэн данлыкен пиштӥсь ымныр шораз учкемзы ик ӧз луы, нош со пиштон вакчи дырлы гинэ сётэмын вал ке но;8нош соку Духлэн ужан-тыршонэз эшшо но даногес уз луы-а?9Уго суд улэ нуись законлы ужан-тыршон данлыко ке, Инмар азьын шонере потонлы ужан-тыршон уката но данолэсь но даногес луэ.10Бӧрысь вуисезлэн данэз туж бадӟым луэмен азьвыл вылӥ данъямлэн данэз табере дан кадь но ӧвӧл ни.11Уго ортчисез-кошкисез сокем дано ке, соку ортчисьтэм-кошкисьтэмлэн данэз уката но бадӟым.

12Таӵе оскиськонмы вань бере, ми чик кышкатэк тыршиськомы.13Но Моисей кадь ум, кудӥз ортчись-кошкись данлыклэсь йылзэ-пумзэ израиль пиос медаз адӟе шуыса, ымнырзэ шобыртылӥз.14Соин ик соослэн визьзы ӵоксаськемын: уго самой со шобрет та дырозь Вуж Сӥзёнэз чирдыку ӝутэмын уг луы, малы ке шуоно со шобретэз Христос гинэ басьтыны быгатэ.15Моисей законэз чирдыкузы, та нуналозь соослэн сюлэм вылазы шобрет кылле;16нош адямиослэн сюлэмъёссы Кузё-Инмар пала берытске ке, соку со шобретэз басьто.17Кузё-Инмар – со Дух, нош кытын ке Кузё-Инмарлэн Духез вань, отын эрик.18Нош асьмеос ваньнамы шобыртымтэ ымнырын, синучконын кадь Кузё-Инмарлэн пиштӥсь данлыкез шоры учкыса воштӥськиськомы, Солы укшасесь луиськомы. Асьме пушкын Солэн данэз эшшо но эшшо йылэ. Та ваньмыз Кузё-Инмарлэн Духез бордысь потэ.


предыдущая глава Глава 3 следующая глава