Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ КЫКЕТӤ ГОЖТЭТЭЗ

Глава 1

1-тӥ ЛЮКЕТ

1Павеллэсь, Инмарлэн эрикеныз быръем Иисус Христослэн апостолэзлэсь но Тимофей братлэсь – Коринфысь черклы, быдэс Ахаияысь ваньмызлы вӧсяськисьёслы:2асьмелэн Инмар Атаймылэсь но Кузё-Инмарлэсь Иисус Христослэсь тӥледлы дэлето улон, каньыллык сӥзисько.

3Дан Инмарлы, Кузё-Инмармылэн Иисус Христослэн Атаезлы, гажан-жалянлэн Атаезлы, котькыӵе буйгатсконлэн Инмарезлы.4Котькыӵе куректон-кайгуосмы дыръя Со асьмеды буйгатэ, асьмеос но котькыӵе куректон-кайгуэ сюремъёсты Инмарлэн асьмелы сётэм буйгатонэныз буйгатыны мед быгатомы шуыса.5Уго кызьы асьме пушкын Христослэн курадӟонъёсыз йыло, озьы ик Христос пыр басьтэм буйгатсконмы но йылэ.6Куректӥськомы-кайгыриськомы-а ми, – тӥляд буйгатсконды, утиськонды понна куректӥськомы-кайгыриськомы, кудӥз тӥледлы юрттэ ми кадь ик курадӟонъёсты чиданы.7Тӥ вылэ ми юн оскиськиськомы. Буйгатскиськомы-а ми – тӥляд буйгатсконды, утиськонды понна буйгатскиськомы, уго ми тодӥськомы курадӟонъёсмы гинэ ӧвӧл, буйгатсконмы но асьмелэн одӥг кадь.

8Агай-вынъёсы, милям уг поты Асиын милемын луэм секытлыкъёс пумысен тӥледыз тодытытэк кельтэммы, малы ке шуоно ми туж зол, чиданы луонтэм куректон-кайгу адӟоно луимы. Ум но малпаське ни вал, улэп кылёмы шуыса.9Виыны сётэм муртъёс кадь ми асьмелы асьмеос потӥськомы ни вал, соин ик ми асьме вылэ ӧм ни оскиське, кулэмъёсты улӟытӥсь Инмарлы гинэ оскиськимы на.10Шимес кулонлэсь Инмар милемыз мозмытэ. Азьланяз но мозмытоз, ми Со вылэ оскиськиськомы, Со милемыз уте.11Тӥ но милемлы вӧсяськыса юрттӥськиды ке, соку трос адямиос ми понна Инмарлы тау карон кылъёс вералозы, уго Инмар, трос муртлэсь вӧсяськемзэ кылзӥськыса, милемлы туж бадӟым гажан-жалянзэ возьматӥз.

12Тани ми маин ушъяськиськомы: чылкыт сюлмын вераны быгатӥськомы, кызьы ми тӥ дорын сямен ик дунне вылын пӧяськытэк, огшоры гинэ, кызьы кулэ Инмарлы, озьы улӥськомы; та дуннелэн визьлыкеныз ӧвӧл, Инмарлэн сётэм дэлетэныз улӥськомы.13Мае тӥ лыдӟиськоды, мае валаськоды – сое ук ми тӥледлы гожтӥськомы, мукетсэ ум гожтӥське. Мон оскисько, тӥ милемыз пумозяз валалоды шуыса,14ӧжытак валады ни бере. Соку Кузё-Инмармылэн Иисус Христослэн лыктон нуналаз тӥ милемын, ми тӥледын ушъяськыны мед быгатомы.

15Соин ик, талы оскыса, мон азьвылгес тӥ доры лыктыны малпасько вал ни, кыкетӥ ползэ дэлет мед басьтоды шуыса.16Македонияе мыныкум, Македонияысь берытскыкум но, тӥ доры пыраны малпасько вал. Собере тӥ монэ Иудеяе келясалды.17Та малпанме, оло, капчи визьем мурт кадь-а мон лэсьтӥ? Мар ке лэсьтыны кутскисько ке, оло нош ас тодэмъям лэсьтӥсько, – одӥг дыре ик, «вань, вань!», соку ик «ӧвӧл, ӧвӧл» шуисько?18Инмар оскиськымон бере, ми ноку но одӥг дыре ик «вань!» но «ӧвӧл!» тӥледлы ум шуэ.19Уго тӥ дорын – монэн, Сӥлуанэн но Тимофеен тодытэм Инмар Пи Иисус Христос огдыре ик луыны уг быгаты «вань» но, «ӧвӧл» но. Иисус Христослэн котьку но «вань!», –20Инмарлэн вань сӥземъёсызлы Христос котьку «вань!». Соин ик Христос пыр асьмеос Инмарлэн данэзлы «аминь» шуиськомы.21Инмар асьмеды Христос бордын юнматэ, Со асьмеды вӧйын зырӟиз.22Аслаз печатеныз асьмеды пусйиз но асьмелэн сюлмамы Духсэ ыстӥз – сётэм кылзэ быдэстоз шуыса оскытӥз.

23Инмарез лулылы адӟись луыны ӧтисько; тӥледыз жаляса, мон та дырозь Коринфе ӧй ни вуылы.24Та уг возьматы, тӥляд осконэныды ми кузёяськыны кутскиськомы шуыса; тӥ осконын юн сылӥськоды, ми юрттӥськомы тӥледлы шумпотон вайыны.


предыдущая глава Глава 1 следующая глава