Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 15

15-тӥ ЛЮКЕТ

1Тӥледлы, агай-вынъёсы, Ӟеч Иворез тодады вайыто, кудзэ мон тӥледлы тодытылӥ, кудзэ тӥ кабыл басьтӥды, кудӥз бордын тӥ возиськиськоды.2Со пыр тӥ утиськоды мынам дышетыса вераме бордын возиськиды ке, нош ӧд ке, соку осконды юнме гинэ луоз.3Нырысь кутскыса ик уго мон тӥледлы тодытӥ сое, мае ачим кабыл басьтӥ: Христос асьмелэн сьӧлыкъёсмы понна кулӥз, кызьы верамын вал Священной Гожтэмын,4Со ватэмын вал но куинетӥ нуналаз улӟыса султӥз, кызьы верамын вал Священной Гожтэмын.5Кифалы возьматскиз, собере – дас кыкназылы;6собере вить сюлэсь трос агай-вынъёслы ваньзылы ӵош возьматскиз. Соос пӧлысь тросэз туннэ нуналозь улэпесь на, нош куд-огез кулӥзы но ини.7Собере возьматскиз Иаковлы, озьы ик вань апостолъёслы.8Нош ваньмыз бере возьматскиз мыным – пӧрмостэм, дырыз вуытэк вордӥськем нунылы.9Мон уго апостолъёс пӧлысь ваньмызлэсь пичиез, апостол шуыса лыдъяны но сылӥсьтэм, малы ке шуоно Инмарлэсь Черксэ улляса ветлӥ.10Нош Инмарлэн сётэм дэлетэныз-ӟечлыкеныз мон луи сыӵе, кыӵе али вань. Солэн мон борды сётэм дэлетэз юнме ӧз луы. Мон ваньзылэсь соослэсь тросгес ужай; шонерзэ вераса, мон ӧй, мон бордын улӥсь Инмарлэн дэлетэз ужаз.11Мон-а, соос-а тодыто, – ми ваньмы Ӟеч Иворез тодытӥськомы, тӥ солы оскиськоды.

12Христос сярысь, Со кулэмысь улӟыса султӥз шуыса, ми тодытӥськомы ке, нош тӥ пӧлысь куд-огез кызьы быгато, кулэмысь улӟыса султон ӧвӧл шуыса вераны?13Кулэмысь улӟыса султон ӧвӧл ке, соку Христос но улӟыса ӧз султы;14нош Христос улӟыса ӧз ке султы, соку милям тодытонмы но юнме, юнме тӥляд осконды но.15Соку ми Инмарлы пумит мынӥсь ӧрекчи тодытӥсьёс луысалмы, малы ке шуоно Инмар сярысь Со Христосэз улӟытыса султытӥз шуыса тодытӥськомы. Зэмзэ но кулэмъёс шайгуысь улӟыса уг султо ке, соку Инмар Иисусэз но улӟытыса ӧз султыты?16Кулэмъёс улӟыса уг ке султо, соку Христос но улӟыса ӧз султы?17Нош Христос улӟыса ӧз ке султы, тӥляд осконды юнме: тӥляд сьӧлыкъёсты тӥ бордын ик уло на?18Озьы ке, Христослы оскыса кулэмъёс но соку кулӥзы-быризы.19Таяз дуннеын улон понна гинэ Христослы оскиськом ке, соку асьмеос вань адямиослэсь но шудтэм адямиос.

20Зэм ик, Христос кулэмысь улӟыса султӥз, кулэмъёс пӧлысь Со нырысетӥез, Кин улӟыса султӥз.21Уго кызьы кулон адями пыр лыктӥз, озьы ик кулэмъёслэн улӟыса султонзы но адями пыр лыктӥз.22Адам пыр ваньмыз кулылӥзы, нош Христос пыр ваньмыз улӟыса султозы.23Нырысь ик Христос улӟыса султӥз, собере, Христос лыктэм бере, Солэн адямиосыз но улӟыса султозы.24Нош собере пум вуоз. Уродлэсь котькыӵе кузёяськонзэ-кивалтонзэ, котькыӵе властьсэ но кужымзэ быдтэм бераз Христос Эксэйлыкез Инмарлы, Атайлы сётоз.25Вань тушмонъёссэ Аслаз пыд выжыяз уськытытозяз, Солы эксэйын пукыны кулэ уго.26Вань тушмонъёс пӧлысь самой пумаз быдтэмын луоз кулон.27Инмар ваньзэ Христослы тэрытскись кариз уго. ”Ваньмыз” пӧлы Инмар уг пыры, малы ке шуоно Со Ачиз ваньзэ Христослы тэрытскись кариз.28Нош ваньзэ Христослы тэрытскись кариз ке, соку Пи но тэрытскоз Аслыз ваньзэ тэрытскись карись Атайлы – Инмар ваньмызлы Кузё мед луоз, ваньмыз бордын мед улоз.

29Соку ма карозы кулэмъёс понна пылатӥськисьёс? Кулэмъёс чик улӟыса уг султо ке, соку малы кулэмъёс понна пылатӥськонэз?30Мар понна часлы быдэ курадӟонъёсын пумиськоно луиськомы?31Нуналлы быдэ мон кулон азьын сылӥсько. Зэмзэ но, агай-вынъёсы, тӥляд азинсконъёсыныды мон ушъяськисько, со Кузё-Инмармы Иисус Христос бордысь потэ.32Огшоры адями сямен малпано ке, Ефесын лек пӧйшуръёсын нюръяськеме но юнме уж гинэ ӧвӧл-а, кулэмъёс улӟыса уг ке султо? «Ваелэ, сиёме-юоме, ӵуказе асьме доры кулон вуэ ук!»33Ӧрекчаськон киулэ эн сётске: «Урод эшъёс ӟеч сямъёсты саптало-сӧро».34Сазьтӥське, дугдэ сьӧлыкамысь. Тӥледлы возьыт мед луоз шуыса, тае верасько: тӥ пӧлысь куд-огез Инмарез та дырозь уг тодо.

35Кин ке но, оло, юалоз: «Кызьы кулэмъёс улӟыса султыны быгатозы? Кыӵе мугорын соос лыктозы?»36Валасьтэм! Кизем кидысэд ӧз ке кулы, со уз улӟы ук!37Кизиськод ке, куроез шепеныз уд кизиськы ук, юэз огназзэ кизиськод, мар сюроз: чабей-а яке кыӵе ке мукетыз-а кидыс.38Нош Инмар солы мугор сётӥз, кызьы мылыз потӥз, котькудӥзлэн кидыслэн аслаз мугорыз.39Одӥгез лулмугор мукетызлы уг укша: адямиослэн одӥг лулзы-мугорзы, пудоослэн – мукет, чорыгъёслэн – мукет, тылобурдоослэн – нош мукет.40Вань ин мугоръёс, вань музъем мугоръёс: инмысьёслэн одӥг данзы-чеберзы, нош музъемысьёслэн – мукет.41Шундылэн одӥг данэз-чеберез, толэзьлэн – мукет данэз-чеберез, кизилиослэн – нош мукет; кизили но кизилилэсь данэныз-чебереныз пӧртэм луэ.42Озьы ик кулэмъёслэн но улӟыса султонзы: сисьмонлы кизиське, сисьмонтэмлы султэ;

43дантэм луыса кизиське, данэн султэ; лябӟемен кизиське, кужымен султэ.44Кизиське луло мугор, султэ духовной мугор. Вань луло мугор, вань на духовной мугор.

45Тазьы ик гожтэмын: «Нырысетӥ адями Адам улэп улӥсь лул», нош Берпуметӥез Адам улэп карись Дух луэ.46Духлэсез азьвыл ӧвӧл, луллэсез азьвыл; собере ини духлэсез.47Нырысетӥ адями – музъемысь, сюйлэсь; кыкетӥ Адями – Кузё-Инмар, Инмысь.48Кыӵе сюйлэсез адями, сыӵеесь ик сюйлэсьёсыз – музъем вылын улӥсьёс; кыӵе Инмысез Адями, сыӵеесь ик луозы Инмысьёсыз адямиос.49Кызьы асьмеос сюйлэсезлэсь адямилэсь тусбуйзэ нуллӥмы, озьы ик Инмысезлэсь Адямилэсь но тусбуйзэ нулломы.

50Агай-вынъёсы, тае верало тӥледлы: лулмугор но, вир но Инмар Эксэйлыкез люкет басьтыны уг быгато. Сисьмоноез но сисьмисьтэмез люкет басьтыны уг быгаты.51Тӥледлы ватӥськыса улӥсь зэмлыкез верало: асьмеос ваньмы ум кулэ, нош ваньмы воштӥськомы52туж ӝог, син куспын ик, берпуметӥ гумы куара потэм бере ик. Гумы куара кылӥськем бере кулэмъёс сисьмымтэ куен султозы, – асьмеос воштӥськомы.53Уго ваньмызлы сисьмисезлы сисьмонтэмлы дӥсяськыны кулэ; вань кулоноез-быроноез ноку быронтэмлы дӥсяськыны кулэ.54Сисьмоно сисьмонтэмлы дӥсяськиз ке, кулоно-быроно ноку быронтэмлы дӥсяськиз ке, соку гожтӥськем кыл быдэсмоз:

«Кулон вормемын, кулон ньылэмын».
55«Кулон! Кытын тынад шиед? Ад! Кытын тынад вормонэд?»

56Кулонлэн шиез – сьӧлык; нош сьӧлыклэн кужымез – закон.57Инмарлы тау. Кузё-Инмармы Иисус Христос пыр Со асьмелы вормон сётӥз!58Озьыен, гажано агай-вынъёсы, юнэсь, шонаськисьтэмесь луэ, Кузё-Инмарлы ужаны берекетты мед луоз. Тодэлэ: Кузё-Инмар азьын тӥляд ужамды юнме ӧвӧл.


предыдущая глава Глава 15 следующая глава