Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 14

14-тӥ ЛЮКЕТ

1Тужгес тырше яратыса улыны; мукет духовной кузьымъёсты но басьтыны сюлмаське, уката ик, Инмарлэсь кылзэ ивортонэз.

2Уго кин ке тодмотэм кылын вера ке, со адямиослы уг, Инмарлы вера, малы ке шуоно сое нокин но уг вала, ватӥськыса улӥсь зэмлыкъёсты со Духлэн кужыменыз-дэлетэныз вера.3Нош кинлэн ке Инмарлэсь кылзэ ивортыны Инмарлэн сётэм дэлетэз вань, со адямиослы валэктон, оскытон, буйгатон понна вера.4Кин ке тодмотэм кылын вера ке, со ассэ ачиз валэктэ; нош кин ке Инмарлэсь кылзэ ивортэ ке, со черклы валэктэ.5Мылкыд карисько, ваньды тӥ кылъёсын мед вераськоды; но умойгес луоз Инмарлэсь кылзэ ивортӥды ке, уго Инмарлэсь кылзэ ивортӥсь кылъёсын верасьлэсь вылӥынгес. Мукет ужпум, куке со, черк мед валалоз шуыса, ачиз ик валэктэ ке.

6Табере, агай-вынъёсы, мон тӥ доры лыкто но тодмотэм кылъёсын вераськыны кутски ке, соку тӥледлы кыӵе мон пайда ваё, мынам тӥледын вераськонам ӧз ке луы усьтыса веранэз, яке валэктонэз, яке Инмарлэсь кылзэ ивортонэз, яке дышетонэз?7Лултэм, куара поттӥсь арбериос – чипчирган яке крезь – висъяськись куара уг ке сёто, кызьы тодмалод, чипчирганэн-а яке крезен-а мае ке шудо шуыса?8Труба шудӥсь но валантэм куара поттӥз ке, кин ожмаськонэ дасяськыны кутскоз?9Озьы ик тӥ но валантэм кылъёс верады ке, кин валалоз, мар тӥ вераськоды? Тӥ тӧллы вералоды.10Кылсярысь, дунне вылын кӧня пӧртэм пумо кылъёс, нош соос пӧлын одӥгез но номыр возьматӥсьтэмез ӧвӧл.11Нош мон кылъёслэсь пуштроссэс уг ке валаськы, соку мон вераськись мурт понна мурт кунысь адями луисько, вераськись мурт но мон понна мурт кунлэн адямиез луэ.12Озьы ик тӥ но духовной кузьымъёсты басьтыны сюлмаське, черкез валэктон-дышетон понна тыршелэ со кузьымъёсын узырмыны.

13Мурт кылын вераськись! Валэктыны быгатонлык басьтон понна вӧсяськы.14Уго, куке мон тодмотэм кылын вӧсяськисько, соку мынам духе вӧсяське ке но, нош визьмы-валанэ емыштэк кыле.15Мар-о бен? Кутско духеным вӧсяськыны, кутско визьмыным но вӧсяськыны; духеным кырӟало, визьмыным но кырӟало.16Уго тон духен тау карид ке, нош верамдэ валасьтэм мурт тыныд тау карон дыръяд кызьы шуоз «аминь»? Со уг вала уго, мар тон вераськод.17Тон сюлмысьтыд тау кариськод, нош со мукетызлы нокыӵе пайда уг вайы.18Инмарлы тау карисько: мон тӥ пӧлын ваньмызлэсь трос кылъёсын вераськыны быгатӥсько.19Нош черкын, мукетъёссэ но валэктон понна, эсьмаса, вить кыл вераме потэ аслам визьмыным, тодмотэм-валантэм кылын сюрс кылъёс вератозь.

20Агай-вынъёс! Визьдыя пичи мурт кадь эн луэ: уродлы-леклы пумит валасьтэм нуны кадесь луэ, нош визьдыя быдэ вуэмъёс кадесь луэ.21Законын гожтэмын: «Мукет кылъёсын, мукет ымъёсын та калыклы верало, соос соку но Монэ уз кылзӥське, – шуэ Кузё-Инмар».22Озьы кылъёс паймымон тодмет луо оскымтэос понна, оскисьёс понна ӧвӧл, нош Инмарлэсь кылзэ ивортон оскисьёс понна паймымон тодмет луэ, оскымтэос понна ӧвӧл.23Быдэс черк огазе люкаськиз но, ваньзы тодмотэм кылъёсын вераськыны кутскизы ке, соку тӥ доры палэнысь лыктэм адямиос яке оскисьтэм адямиос пыризы ке, уз шуэ-а: «Мар-о тӥ визьтэмъяськиськоды?»24Нош ваньзы Инмарлэсь кылзэ ивортон дыръя оскисьтэм яке палэнысь лыктэм адями пыриз ке, соку соос та адямилэсь лушкем сьӧлыкъёссэ шарае потто но судить каро.25Но солэн сюлмызлэсь ватӥськыса улӥсь лушкемлыкъёсыз ваньмызлы тодмо луозы. Соку со кымин уськытскоз но Инмарлы йыбырттыса шуоз: «Зэмзэ ик, Инмар тӥ пӧлын».

26Озьыен, агай-вынъёсы, мар-о бен? Куке тӥ огазе люкаськиськоды, котькуддылэн тӥляд псаломды вань, дышетонды вань, кылды вань, усьтӥськонды вань, валэктонды вань – ваньмыз та тӥледыз юнматонлы мед луоз.27Кин ке тодмотэм кылын вераське ке, кык ӵошен вераське, тужгес троссэ – куинь ӵошен, но ваньзы – огзы бере огзы, черодэн, нош одӥгез тӥ пӧлысь мед валэктылоз.28Нош валэктӥсь мурт ӧз ке луы, соку черкын шыпыт ул, ас поннад вӧсяськы Инмарлы.29Пророкъёс но кыкез яке куинез огзы бере огзы, черодэн мед вераськозы, нош мукетъёсыз верам кылзэс мед эскерозы-чаклалозы.30Пукисьёс пӧлысь одӥгезлы усьтӥськон луиз ке, нырысетӥез шыпыт мед кариськоз.31Ваньды мед дышетскоды но ваньды буйгатскон мед басьтоды шуыса, огды бӧрсьы огды – ваньнады Инмарлэсь кылзэ ивортыны быгатӥськоды.32Пророкъёслэн духъёссы пророкъёслэсь кылзӥськись луыны кулэ.33Малы ке шуоно Инмар куям-пазям улонлэн ӧвӧл, Со тупаса улонлэн Инмарез. Тазьы луыны кулэ вӧсяськисьёслэн вань черкъёсазы.34Кышноосты черкын шыпыт мед улозы: соослы уго вераськыны лэземын ӧвӧл. Инмар законъя но соос тэрытскыса улыны кулэ.35Соослэн малы ке дышетскемзы потэ ке, со сярысь гуртысенызы кузпалъёссылэсь мед юалозы. Кышномуртлы черкын вераськыны чебер ӧвӧл.36Оло, тӥ бордысь потӥз шат Инмар кыл? Яке одӥг тӥ доры гинэ со вуиз-а?

37Кин ке ассэ пророк яке духовной адями шуыса лыдъя ке, со мед тодоз: мон тӥледлы Инмарлэсь курон-косонъёссэ гожтӥсько;38нош кинлэн валамез уг ке поты, медаз вала.39Озьы, агай-вынъёсы, Инмарлэсь кылзэ ивортон сярысь сюлмаське; пӧртэм кылъёсын вераськыны но эн люкетэ.40Но ваньмыз мед луоз озьы, кызьы кулэ, радызъя.


предыдущая глава Глава 14 следующая глава