Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 12

12-тӥ ЛЮКЕТ

1Агай-вынъёсы, духовной кузьымъёс сярысь но тӥледыз тодытытэк кельтэме уг поты.2Тодӥськоды на, куке тӥ язычникъёс вал на, тӥледыз кин ке кыскыса нуэм кадь, кылтэм-ымтэм сульдэръёс-идолъёс доры тӥ ветлӥськоды вал.3Соин ик тӥледлы ялӥсько: Инмарлэн Духеныз вераськись нокин но Иисус вылэ карган-юриськон кыл уз вера, Святой Духтэк нокинлэн но Иисусэз Кузё-Инмар шуэмез уз луы.

4Инмарлэн сётэм дэлетъёсыз пӧртэмесь, нош Дух – одӥг;5ужан-тыршонъёс пӧртэмесь, нош Кузё-Инмар – одӥг;6вань пӧртэм ужъёс-радъянъёс, нош Инмар – одӥг, адямиос пушкын Со ваньзэ лэсьтэ.7Нош котькудӥзлы Духлэн возьматӥськемез ваньмызлы пайда ваён понна луэ.8Дух одӥгезлы визьлыко кыл сётэ, мукетызлы со Дух ик тодонлэсь кылзэ сётэ.9Со Дух ик куд-огезлы оскон сётэ; со Дух ик куд-огезлы бурмытыны быгатонлык сётэ.10Куд-огезлы паймымон ужъёс лэсьтон сётэ; куд-огезлы – Инмарлэсь кылзэ ивортон, куд-огезлы – духъёсты тодман, куд-огезлы – пӧртэм кылъёсын вераськон, куд-огезлы – кылъёсты валэктон.11Нош ваньзэ тае одӥг со Дух ик поттэ, кызьы Аслыз кулэ, котькудӥзлы нимысьтыз сётылэ.

12Уго, кызьы мугор одӥг, нош люкетъёсыз трос, нош вань та люкетъёс одӥг мугорлэн люкетъёсыз луо, соос трос ке но, одӥг мугор кылдыто, – озьы ик Христос но.13Ваньмы асьмеос одӥг Духен одӥг мугор луон понна пылатӥськимы ук: иудейёс но, эллинъёс но, ляльчиос но, эрикын улӥсьёс но – ваньмы асьмеос одӥг Духен сектамын.14Мугор одӥг люкетлэсь ӧвӧл, трос люкетъёслэсь сылэ.15Пыд шуиз ке: «Мон мугорлэн люкетэз ӧвӧл, малы ке шуоно мон ки ӧвӧл». Соин сэрен со мугорлэн люкетэз уг луы шат?16Нош пель шуиз ке: «Мон мугорлэн люкетэз уг луиськы, малы ке шуоно мон син ӧвӧл». Соин сэрен со мугорлэн люкетэз уг луы шат?17Быдэс мугор син гинэ луысал ке, соку кылон кытын? Быдэс мугор кылон гинэ луысал ке, соку шӧмез шӧдон кытын?18Но Инмар котькудзэ мугор люкетэз ас интыяз пуктӥз, кызьы Солы кулэ вал.19Нош ваньмыз одӥг кыӵе ке гинэ люкетлэсь сылысал ке, соку кытын мугор?20Люкетъёс трос, но соос одӥг мугор кылдыто.21Син килы уг быгаты шуыны: «Тон мыным кулэ ӧвӧл»; яке йыр пыдъёслы: «Тӥ мыным кулэ ӧвӧл».22Мугорлэн уката ик туж лябесь-кынартэмесь адӟиськись люкетъёсыз тужгес но кулэесь луо.23Куд-ог люкетъёс мугорын йӧноесь-чебересь уггес ке но адӟисько, соосты юнгес сӥё-сано кариськомы.24Асьмелэсь чебер-йӧно адскисьтэм люкетъёсмес, уката ик возьдаськоно мугор люкетъёсмес, шобыртӥськомы. Нош чебер-йӧно адскись люкетъёсмы нимысьтыз сӥё-сано каремез, шобыртэмез кулэ уг каро. Инмар мугорез озьы кылдытӥз: тужгес сӥтэм-сантэм адскись люкетлы тужгес бадӟым данлык сётӥз,25мугорын люкиськылонъёс медаз луэ, вань люкетъёс ог-огзы сярысь огкадь мед сюлмаськозы.26Соин ик, курадӟе ке одӥгез люкет, соин валче вань люкетъёс курадӟо; данэ поттӥське ке одӥгез люкет, соин валче вань люкетъёс шумпото.

27Тӥ – Христослэн мугорыз, нош нимады – Солэн люкетъёсыз.28Куд-огъёссэ Инмар черке нырысь ик апостол карыса пуктӥз, куд-огзэ пророк карыса, куд-огзэ дышетӥсь карыса пуктӥз; собере куд-огезлы паймымон ужъёс лэсьтыны кужым сётӥз; куд-огезлы бурмытылыны быгатонлык, юрттэт сётонъёс, кивалтон ужъёс, пӧртэм кылъёсын вераськыны быгатонлык сётӥз.29Ваньмыз-а апостолъёс? Ваньмыз-а пророкъёс? Ваньмыз-а дышетӥсьёс? Ваньмыз-а паймымон уж лэсьтӥсьёс?30Ваньмызлэн бурмытылыны быгатонлыкез вань-а? Ваньмыз мурт кылъёсын верасько-а? Ваньмыз валэктӥсьёс-а?31Эшшо но бадӟымгес быгатонлыкъёс басьтон понна тырше.

Мон тӥледлы самой усто сюрес возьмато.


предыдущая глава Глава 12 следующая глава