Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 11

11-тӥ ЛЮКЕТ

1Мынэсьтым адӟем каре, кызьы мон Христослэсь адӟем карисько.

2Агай-вынъёсы, мон тӥледыз ушъясько монэ тодады возем понна, дышетонъёсты-верамъёсты утемды понна.3Тӥледлы озьы ик тодытэме потэ: котькудӥзлы пиосмуртлы йыр – Христос, кышномуртлы йыр – кузпалыз, нош Христослы йыр – Инмар.4Котькыӵе пиосмурт йырзэ шобыртыса вӧсяське яке Инмарлэсь кылзэ ивортэ ке, Йырез сантэма.5Котькудӥз кышномурт йырзэ шобыртытэк вӧсяське яке Инмарлэсь кылзэ ивортэ ке, аслэсьтыз йырзэ сантэма. Тазьы уго со йырзэ мычем кышномуртлы укша.6Кышномуртлэн йырзэ шобыртэмез уг ке поты, соку мед ӵышкиськоз; нош кышномуртлы ӵышкиськыса, мычиськыса ветлыны возьыт ке потэ, соку йырзэ мед шобыртоз.7Озьыен, пиосмурт йырзэ шобыртыны кулэ ӧвӧл, малы ке шуоно со – Инмарлэн тусбуез, Солэн данэз; нош кышномурт – кузпалызлэн данэз.8Уго пиосмурт кышномурт бордысь ӧз поты, кышномурт пиосмурт бордысь потӥз.9Пиосмурт кышномурт понна кылдытэмын ӧвӧл, нош кышномурт пиосмурт понна кылдытэмын.10Кылчинъёс азьын кышномуртлэн йыр вылысьтыз шобретэз – кузпаллы тэрытскыса улонлэн тодметэз луэ.11Кузё-Инмар азьын пиосмурт но кышномурт, кышномурт но пиосмурт ог-огзылы тэрытскытэк улыны уг быгато.12Кызьы ке кышномурт пиосмурт бордысь потэмын, озьы ик пиосмурт кышномурт пыр вордӥськемын; нош ваньмыз – Инмар бордысь потэмын.13Асьтэос малпалэ ай, ӟеч-а кышномуртлы Инмар азьын йырзэ шобыртытэк вӧсяськыны?14Инмарен кылдытэм улон азь тӥледыз уг дышеты-а – пиосмурт йырсизэ кузь будэтэ ке, со сое сантэма шуыса,15нош кышномурт йырсизэ кузь будэтэ ке, со солы сӥ-дан вае, йырси солы шобырскон понна сётэмын.16Нош кинлэн ке та пумысен ченгешемез потысал ке, милям сыӵе сяммы ӧвӧл, Инмар черкъёслэн но сыӵе сямзы ӧвӧл.

17Эшшо тае вераме потэ: тӥледыз ушъяме уг поты, малы ке шуоно тӥляд люкаськонъёсты пайда уг ваё, уродзэ гинэ ваё.18Нырысь ик, мон кылӥ, тӥляд черкады люкиськылонъёс-керетонъёс луыло шуыса. Пичи ке но солы оскытэк уг луы.19Тӥ пӧлын люкиськонъёс но луыны кулэ, уго соку тодмо луоз кин шонер, кин шонертэм.20Эшшо, тӥ огазе люкаськиськоды ке но, Кузё-Инмарлэсь ӝытанзэ ортчытӥськоды шуыны уг луы.21Уго котькудӥз аслэсьтыз сьӧраз ваем сиёнзэ дыртыса сие, соин ик одӥгез сютэм кыле, нош мукетыз кудӟыса кошке.22Сиён понна, юон понна тӥляд дорды ӧвӧл-а? Яке Инмар черкез сантэмамды, куанеръёсты ултӥямды потэ-а? Мар тӥледлы верано? Та понна, оло, ушъяно тӥледыз? Уг, та понна тӥледыз уг ушъя.

23Мон уго та дышетонэз Аслэсьтыз Кузё-Инмарлэсь кабыл басьтӥ но тӥледлы тодытӥ: Кузё-Инмар Иисус Сое вузаса сётон уе нянь кутӥз,24тау карыса тӥялтӥз но шуиз: «Басьтэлэ, сиелэ, та тӥ понна тӥялтэм Мынам Мугоры, Монэ буре вайыса, тазьы каре».25Ӝытан бере чашаез кутыса сётӥз но шуиз: «Та чаша Мынам Вирам Выль Сӥзён луэ; тае юыкуды, котьку но Монэ буре вае».26Уго котьку но та нянез сиыкуды, та чашаысь юыкуды, Кузё-Инмарлэсь кулонзэ тодытӥськоды. Со лыктытозь озьы луоз.

27Со понна ик, кин дасяськытэк, нокыӵе кариськытэк та нянез сиёз, Кузё-Инмарлэсь чашазэ юоз, со Кузё-Инмарлэн Мугорызлы но Вирызлы пумит сьӧлыка.28Нырысь ик, адями ассэ ачиз мед чаклалоз-эскероз ук, собере та нянь бордысь мед сиёз, та чашаысь мед юоз.29Уго котькудӥз, кин Кузё-Инмарлэн Мугорыз сярысь малпаськытэк, ярамон луытэк сие, юэ, со ассэ янгыше уськытон понна сие, юэ.30Со понна ик тӥ пӧлысь тросэз лябӟемын, висисесь, тросэз куло но.31Асьмеос асьмеды судить карысалмы ке, судить каронлэсь мозмытскысалмы.32Нош Кузё-Инмар асьмеды судить карыкуз, Со асьмеды тупатэ-визьма, быдэс дуннеен ӵош суд улэ медам сюре шуыса.33Соин ик, агай-вынъёсы, ӝытанэ люкаськыкуды, огдэс огды вите.34Нош кинлэн кӧтыз сюма, гуртаз мед сиськоз, люкаськонды Инмарлэн судить карон улаз сюронлы медаз лу. Мукетъёссэ лыктэм берам лэсьто-интыяло.


предыдущая глава Глава 11 следующая глава