Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 10

10-тӥ ЛЮКЕТ

1Агай-вынъёсы, мынам потэ тӥ мед тодысалды, кызьы асьмелэн вашкала атайёсмы пилем шобрет улын мынӥзы но зарезь вамен выжизы.2Ваньзы соос пилем улын, зарезьын Моисейлэн пылатонэныз пылатӥськизы.3Ваньзы соос одӥг духовной сиён сиизы.4Ваньзы соос одӥг духовной юонэз юизы, уго сьӧразы мынӥсь духовной изгурезьысь юизы; нош со изгурезь – Ачиз Христос вал.

5Тросэз Инмарлы ярантэм луизы; соос кыр дуннее кулыса кылизы.6Ваньмыз таос асьмеды алон понна вал: кызьы вашкала атайёсмы лулмугорлэн лекесь куронъёсызлы сётскыса улӥзы, асьмеос но лулмугорлэн лекесь куронъёсызлы сётскыса медам улэ вал шуыса.7Соос пӧлысь куд-огъёсыз кадь тӥ но сульдэръёслы йыбыртъясьёс эн луэ. Соос сярысь гожтэмын: «Калык сиыны, юыны пуксиз, нош бӧрысь шудыны-шулдыръяськыны султӥзы».8Азон-калгон сьӧлык лэсьтыса ум улэ, кызьы вашкала атайёсмы пӧлысь куд-огез азыса-калгыса улӥзы но одӥгаз нуналэ соос пӧлысь кызь куинь сюрсэз кулӥз.9Христослэсь визьзэ ум сыналэ, кызьы вашкала атайёсмы пӧлысь куд-огъёсыз визь сыназы, но кыйёс соосты быдтӥзы.10Ӟургетыса эн улэ, кызьы соос пӧлысь куд-огъёсыз ӟургетыса улӥзы, но кылчин-убир соосты виылӥз.11Ваньмыз таос соослы со понна луиз: асьмеос соослэсь адӟем медам каре, нош та асьмелы, берпуметӥ аръёсы улыны кылемъёслы, алон понна гожтэмын.12Соин ик, кин ке но мон йыг-йыг сылӥсько шуыса малпа ке, чакласькы: медад усьы.13Адямиослы чидантэм визь сынаськонъёс тӥ доры ӧз на вуылэ. Оскиськымон Инмар. Со тӥледлы чиданы луонтэм визь сынаськон уз лэзьы. Чиданы-сылыны мед быгатозы шуыса, Со тӥледлы визь сынаськонэн ӵош утиськон но сётоз.

14Гажаноосы, сульдэръёслы йыбыртъянъёслэсь утиське.15Тӥледлы, валась муртъёслы, мон верасько. Верамме валаны тырше.16Дэлет басьтон бакель карем чаша асьмеды Христослэн Вирыныз огазе уг кары шат? Нянь, кудзэ тӥялтӥськомы, асьмеды Христослэн Мугорыныз огазе уг кары шат?17Нянь одӥг, нош асьмеос трос мурт ке но, ваньмы огазьын одӥг мугор луиськомы, малы ке шуоно ваньнамы одӥг нянь бордысен чылкытатскиськомы.18Израиль калык шоры учке: курбон сиисьёс курбон тыронлэн адямиосыз пӧлы пыриськисьёс уг луо-а?19Мар бен мон вераны турттӥсько? Сульдэр, оло, мар ке ванез возьматэ-а? Сульдэрлы курбон сётон но, оло, мар ке ванез возьматэ ик-а?20Уг. Язычникъёс курбонзэс Инмарлы уг сёто, периослы сёто, нош мынам тӥледыз периосын кусып возьыса улытэме уг поты.21Уд быгатӥське огдыре Кузё-Инмарлэн чашаысьтыз, со дыре ик перилэн чашаысьтыз но юыны: уд быгатӥське огдыре ик Кузё-Инмарлэн но сиськоназ, периослэн но сиськоназы пыриськыны.22Кузё-Инмарлэсь вожзэ поттыны дӥсьтомы шат? Асьмеос Солэсь кужмогес шат?

23Котьмар карыны мыным лэземын, но ваньмыз пайда уг вайы; котьмар карыны мыным лэземын, но ваньмыз асьмемыз уг визьма-нодъя.24Нокин но аслыз пайда медаз утча, мукетызлы мед утчалоз.25Базарын мар вузаське, со сярысь юатэк-вератэк, шугъяськытэк, мар вань, сие.26Музъем но, мар отын вань, – ваньмыз Кузё-Инмарлэн уго.27Христослы оскисьтэм мурт тӥледыз куное ӧтиз но, тӥ мыноно кариськиды ке, соку мар ӵектӥзы – юатэк-вератэк, шугъяськытэк сие.28Нош кин ке тӥледлы шуиз ке: «Та – сульдэръёслы курбон сётэм сиён», соку тӥледлы ивортӥсь адями понна, солы сюлэмшугъяськоно медаз луы шуыса, эн сие; уго музъем но маин со тырмемын – со Кузё-Инмарлэн.29Аслам сюлэмшугъяськонэ сярысь уг вераськы, мукетлэн сярысь верасько. Мынам мылкыд каронэ мукет муртэ малы сюлэмшугъяськытыны кулэ?30Мон Инмарлы тау карыса сиисько ке, малы монэ тау карем сиён понна пыкылонэз-курланэз?

31Озьыен, сииськоды-а, юиськоды-а яке мукет маке лэсьтӥськоды-а – ваньзэ Инмарез вылӥ-дано карон понна лэсьтэ.32Иудейёсты но, эллинъёсты но, Инмарлэсь черксэ но визь сынаськонэ пыртыса эн улэ.33Кызьы мон но, аслым пайда утчатэк, ваньмызлы, котьмар ласянь тэрытскыса улӥсько, мон тыршисько соослы пайда мед луоз, тросэз мед утиськозы шуыса.


*а 10:10 кылчин-убир – черк-славян кылын: всегубитель; истребитель


предыдущая глава Глава 10 следующая глава