Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 8

8-тӥ ЛЮКЕТ

1Сульдэръёслы-идолъёслы виро сётон сиёнъёс сярысь ми тодӥськомы, малы ке шуоно милям ваньмылэн тодонъёсмы вань. Тодон адямиез вылӥ мылкыдъем каре, нош яратон – кужым сётэ.2Кин малпа, со мар ке но тодэ шуыса, со уг на тоды озьы, кызьы тодыны кулэ.3Нош кин Инмарез яратэ, со адямиез Инмар тодэ.4Сульдэръёслы-идолъёслы виро сётэм сиён пумысен ке верано, ми тодӥськомы: дунне вылысь сульдэр – со ӧвӧлтэм маке. Одӥг Инмар сяна, мукет инмар ӧвӧл.

5Шуом, язычникъёслэн я инмын, я музъем вылын вань куд-ог инмар шуонъёссы, – вань трос ”инмаръёссы” но трос ”кузёоссы”, –6нош асьмелэн одӥг гинэ Инмармы – Инмар Атай. Со ваньзэ кылдытӥз, асьмеос Со бордын ик улӥськомы; одӥг Кузё-Инмармы Иисус Христос, Со пыр ваньмыз улыны кутскиз, Со пыр асьмеос улон басьтӥмы.

7Но ваньмызлэн таӵе тодонэз ӧвӧл: куд-огез али но, валанзы лябен, сульдэръёслы йыбыртъясьёс луо, соос курбон сӥлез сульдэръёслы сӥзем сиён шуыса сиё, озьы соос асьсэды асьсэос саптало.8Сиён асьмеды Инмарлы матэ уг кары: сиськиськомы-а асьмеос, номыр но соин ӟечсэ ум лэсьтӥське; ум ке но сиськиське – номыр но уродзэ ум лэсьтӥське.9Но чаклаське-утиське, тӥляд сиёнэн бырйиськонды ляб муртъёс понна визь сынанлы медаз пӧрмы.10Кин ке адӟиз ке, кызьы тон тодыса вылысь вӧсяськон куалаын, ӝӧк сьӧрын пукиськод, соку солэн но, ляб муртлэн, мылкыдыз уз ӝутскы-а сульдэръёслы сётэм курбон сӥлез сиыны?11Тынад таӵе ”тодонэныд” сэрен быроз осконэн ляб мурт – тынад братэд, кудӥз понна Христос кулӥз.12Тазьы агай-вынъёслы пумит сьӧлыкаса, соослэсь лябӟем мылкыдзэс сӧрыса, тӥ Христослы пумит сьӧлыкаськоды.13Соин ик сиён мынам братэлэсь визьзэ сына ке, братэлэсь визьзэ сынантэм понна быдэс даурам сӥль уг сиы.


предыдущая глава Глава 8 следующая глава