Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 7

7-тӥ ЛЮКЕТ

1Тӥ мыным гожъяды, кудӥз пумысен мон вераны быгатӥсько: пиосмуртлы, кышномурт борды йӧтӥськытэк, улыны умойгес луоз.2Нош азон-калгон сьӧлыке усёнтэм понна котькудӥзлэн мед луоз кышноез, котькудӥзлэн мед луоз картэз.3Пиосмурт кышнозэ яратыса возьыны кулэ; озьы ик кышноез но картсэ.4Кышномурт аслаз мугорызлы кузё ӧвӧл, картэз солы кузё. Озьы ик пиосмурт но аслаз мугорызлы кузё ӧвӧл, кышноез солы кузё.5Огдылэсь огды эн палэнскылэ визян но вӧсяськон дырлы сяна, со пумысен ог-огеныды огкылысь луыса вакчи дыр ӵоже гинэ нимаз улэ. Нош со бере, чидамтэеныды сэрен шайтан визьдэс медаз туга шуыса, нош ик огазе кариське.6Тае мон мылкыд карыса гинэ тӥледлы верасько, косыса уг.7Мылкыд карисько, вань адямиос мон кадь мед улозы шуыса; но котькудӥзлы Инмар нимысьтыз кузьым-дэлет сётэ: огезлы – одӥг кузьым-дэлет, мукетызлы – мукет.

8Бызьымтэ-басьтымтэослы, кышнотэк-карттэк кылемъёслы верасько: мон кадь улӥзы ке, соослы умой луоз.9Возиськыны уг ке чидало, мед бызёзы, басьтозы, уго бызьыны-басьтыны ӝуатскем мылкыдын пӧсекъяса улонлэсь ӟечгес.10Бызем-басьтэмъёслы мон уг косӥськы, Кузё-Инмар косэ: кышномуртлы картэныз люкиськыны уг яра.11Люкиськиз ке, бызьытэк кыльыны кулэ яке кузпалэныз тупаны, пиосмуртлы но аслэсьтыз кышнозэ куштыны уг яра.12Нош мукетъёсызлы, Кузё-Инмар уг шуы, мон шуисько: кудӥзлэн ке агай-вынлэн кышноез Инмарлы оскисьтэм ке, но со кышномурт картэныз улыны соглаш ке, та пиосмуртлы кышнозэ куштыны уг яра.13Кышномурт но, кудӥзлэн кузпалыз Инмарлы оскисьтэм ке, но со соин улыны соглаш ке, солы картсэ кельтыны уг яра.14Уго оскисьтэм пиосмурт оскись кышноез пыр дун-чылкыт луэ. Оскисьтэм кышномурт но оскись картэз пыр дун-чылкыт луэ. Озьы ке ӧй луысал, тӥляд нылпиосты сьӧлыкоесь луысалзы, нош али соос дун-чылкытэсь луэмын.15Инмарлы оскисьтэм муртлэн люкиськемез потэ ке, мед люкиськоз. Инмарлы оскись та учыре оскисьтэм кузпалэн герӟаськемын ӧвӧл ни. Асьмеды Кузё-Инмар тупаса улыны косӥз.16Кышномурт, кызьы тон тодӥськод, карттэ уд утьы шуыса? Яке тон, пиосмурт, кызьы тон тодӥськод, кышнодэ уд утьы шуыса?

17Котькудӥз озьы мед улоз, кызьы солы Инмар тупатӥз, кызьы Кузё-Инмар улыны косӥз. Тазьы мон вань черкъёсты улыны косӥсько.18Кин ке черке ветлыны кутскыкуз вандӥськемын вал ни ке, вандӥськемзэ ватыны медаз тыршы. Вандӥськон сямез ортчытэмлэсь азьло черке ветлыны кутскем мурт вандӥськон сямез медаз ни ортчыты.19Вандӥськон но номырлы кулэтэм, вандӥськытэк кылён но номырлы кулэтэм, нош ваньмызлэсь дуноез – Инмарлэсь курон-косонъёссэ быдэсъян.

20Инмар тӥледыз кыӵе дыръяды ӧтиз, сыӵе куеныды ик улэ.21Ляльчиын улон дыръяд тонэ Инмар ӧтиз ке, ляльчи луэмедлэсь эн возьдаськы. Нош эрик басьтыны луонлыкед вань ик ке, басьты.22Уго Кузё-Инмарен ӧтем ляльчи Кузё-Инмар азьын эрико мурт, нош Кузё-Инмар ӧтьыку, тон эрико адями вал ке, табере тон Христослэн ляльчиез луиськод.23Тӥ дуно дун тырыса мозмытэмын; адямиослы ляльчи эн кариськы.24Агай-вынъёсы, Инмар тӥледыз кыӵе дыръяды ӧтиз, сыӵе куеныды ик Со азьын улэ.

25Сьӧлыкатэк ныл кылён пумысен Кузё-Инмарлэсь косон мон ӧй басьты, Солэсь мон оскиськымон луыны дэлет басьтӥ, соин ик тӥледлы визь-кенеш сётыны быгатӥсько.26Та виысь шугадӟонъёсты лыдэ басьтоно ке, адямилы бызьытэк-басьтытэк кельтӥськыны ӟечгес луоз шуыса малпасько.27Кышнояськемын-а тон? – Люкиськон эн утча. Кышнотэк-а кылид? – Кышно эн утча.28Кышнояськид ке но, сьӧлык уз луы. Сьӧлыке пырымтэ ныл бызиз ке, солы сьӧлык уз луы. Но бызем-басьтэм муртъёс трос куректон-кайгуос чидано луозы, нош мынам тӥледыз соослэсь утеме потэ.

29Агай-вынъёсы, мон тӥледлы верасько: дыр ӧжыт кылемын ини, соин ик кышноё муртъёс кышнояськымтэ муртъёс кадь улыны кулэ.30Бӧрдӥсьёс но бӧрдымтэ муртъёс кадь мед улозы; шумпотӥсьёс но шумпотытэк улӥсьёс кадесь мед кариськозы; басьяськисьёс номырзы ӧвӧлтэм муртъёс кадесь мед луозы.31Та дуннелэн ӟечлыкеныз улӥсьёс ӟечлыкез адӟымтэос кадь мед улозы. Уго таиз дунне ортче-быре.32Нокыӵе сюлмаськонъёс тӥледыз ёртыса медаз возе вал кадь, мыным потэ. Кышнояськымтэ мурт Кузё-Инмарлэн ужъёсыз сярысь сюлмаське, кызьы меда Кузё-Инмарлы ярамон луом шуыса;33нош кышнояськем мурт та дуннелэнэз сярысь сюлмаське, кызьы меда кышноелы ярамон луом шуыса. Бызем но бызьымтэ нылъёс вискын вань пӧртэмлыкез:34бызьымтэ мурт Кузё-Инмарлэн ужъёсыз сярысь сюлмаське, кызьы меда Солы ярамон луом шуыса; мугорын но, духен но дун-чылкыт луон сярысь со сюлмаське. Нош бызем мурт та дуннелэнэз сярысь сюлмаське, кызьы меда кузпалэзлы ярамон луом шуыса.35Тӥледлы пайда мед луоз шуыса, тае верасько: тӥ вылэ кыӵес-сьӧлтэт поныны уг малпаськы. Чылкыт сюлэмын, шонер улыса ялан Кузё-Инмар бордын мед улоды.

36Нылыд арескын быдэ вуэмын ни ке, но сое ныл куен воземед уг ке поты, соку лэсьты озьы, кызьы лэсьтэмед потэ, – уд сьӧлыка, мед бызёз.37Нош кин сюлмыныз юн, шугадӟонъёсын ёртэмын ӧвӧл, ассэ кутыны кужымез вань, сюлмыныз со аслэсьтыз ныллыксэ утьыны мылкыд кариз ке, со умой лэсьтэ.38Соин ик аслэсьтыз нылзэ картлы сётӥсь мурт ӟеч каре; нош сётӥсьтэм мурт эшшо но ӟечгес.

39Картэз улэп дыръя кышномурт кузпалэныз закон пыр герӟаськемын луэ, нош картэз кулӥз ке, кинлы быземез потэ, солы быземез луэ, но со мед луоз Кузё-Инмарлы оскись мурт.40Нош мынам визь-кенешея бызьытэк улӥз ке, со шудо; малпасько, мынам но бордам Инмарлэн Духез вань шуыса.


предыдущая глава Глава 7 следующая глава