Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 6

6-тӥ ЛЮКЕТ

1Кызьы тӥ дӥсьтӥськоды, мукет муртэн споре пырыкуды, вӧсяськись калыклы ӧвӧл, оскисьтэмъёслы ченгешон уждэс возьматыны?2Тӥ уд тодӥське шат, дуннеез вӧсяськись калык судить кароз шуыса? Тӥледлы дуннеез судить кароно бере, чыры-пыры ужъёсты асьтэ куспын сэрттыны-пертчыны уд быгатӥське шат?3Тӥ уд тодӥське шат, асьмеос кылчинъёсты судить каромы шуыса? Нош улон куспысь чыры-пыры ужъёсты ум-а быгатӥське куспамы сэрттыны-пертчыны?

4Улон куспады ченгешонъёс луо ке, оскисьтэм адямиосты асьтэлы судьяе пуктӥськоды.5Тӥледлы возьыт мед луоз шуыса верасько: тӥ пӧлын одӥг но визьнодоез, агай-вынъёс куспысь ченгешонэз сэрттыны-пертчыны быгатӥсез ӧвӧл шат?6Агай-вынъёс огзы вылэ огзы судэ сёто, нош та ужез Инмарлы оскисьтэмъёс сэртто-пертчо.7Огдэс огды судэ сётыса, тӥ быдэсак сӥдэс-сандэс ыштӥськоды. Малы кӧтӝожъёсты чидамды уг поты? Ыштонъёс-курадӟонъёс ке луо, огдэ огед судэ сётытозь, малы бен тӥледлы сое но чидантэмез?8Нош тӥ огдэс огды ултӥяськоды, таласькоды, эшшо ке, агай-вынъёстэс ик.9Оло нош тӥ уд тодӥське, шонер улӥсьтэмъёс Инмар Эксэйлыке уз пыре шуыса? Ӧрекчаськон пӧлы эн йыроме: азыса-калгыса улӥсьёс но, сульдэръёслы-идолъёслы йыбыртъясьёс но, мурт пиосмуртэн яке мурт кышномуртэн сьӧлыкасьёс но, киынызы азон сьӧлык лэсьтӥсьёс но, пиосмуртэз кышномурт карыса кӧласьёс но,10лушкаськисьёс но, мурт ваньбурез капыръясьёс но, юисьёс но, урод кылын вераськисьёс но, сьӧсь муртъёс но – Инмар Эксэйлыке уз пыре!11Тӥ пӧлын но куд-огез сыӵеесь ик вал, – гылтӥськиды, дун-чылкыт луиды но Инмармылэн Духеныз, Кузё-Инмармылэн Иисус Христослэн нимыз понна шонере потӥды.

12Мыным котьмар лэсьтыны лэземын, но ваньмыз мыным пайда уг вайы. Мыным котьмар лэсьтыны лэземын, но соос пӧлысь номыр но монэ вормыса улыны кулэ ӧвӧл.13Сиён кӧт понна, кӧт сиён понна. Нош Инмар созэ но, тазэ но быдтоз. Мугор азыса-калгыса сьӧлык лэсьтон понна кылдытэмын ӧвӧл, – со Кузё-Инмар понна кылдытэмын, Кузё-Инмар мугорлы но кузё луэ.14Инмар Аслаз кужыменыз Кузё-Инмарез улӟытыса султытӥз, асьмеды но Аслаз кужыменыз улӟытыса султытоз.

15Уд тодӥське шат, тӥляд мугоръёсты Христослэн мугор люкетъёсыз луо шуыса? Озьыен, Христослэсь люкетсэ талалом но азыса-калгыса улӥсь кышномуртлы люкет карон понна сётом-а? Озьы медаз луы!16Уд тодӥське шат, азыса-калгыса улӥсь кышномуртэн сьӧлыке пырись мурт соин одӥг мугор луэ шуыса? Шуэмын ук: «Кыкназы одӥг лулмугор луозы».17Нош кин Кузё-Инмарен герӟаське, со Кузё-Инмарен одӥг кадь духен улэ.18Азон-калгон сьӧлыклэсь палэнске. Мукет вань сьӧлыкъёс, кудъёссэ адями лэсьтэ, мугорлэн палэназ лэсьтӥське, нош азон-калгон сьӧлык лэсьтӥсь аслаз мугорезлы пумит сьӧлыка.19Уд тодӥське шат, тӥляд мугорды тӥ пушкын улӥсь Святой Духлэн храмез луэ шуыса, Со тӥледлы Инмар дорысь сётэмын. Тӥ асьтэлы асьтэос кузё ӧвӧл, Инмар тӥледлы кузё.20Тӥ уго дуно дун тырыса мозмытэмын-басьтэмын. Соин ик мугорыныды но, лулыныды но Инмарез данъялэ, уго соос Инмарлэн сётэмез луо.


предыдущая глава Глава 6 следующая глава