Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 4

4-тӥ ЛЮКЕТ

1Озьыен, ваньмыз мед адӟоз, ми Христослэн ужасьёсыз-ляльчиосыз луиськомы, милемлы Инмарлэсь ватӥськыса улӥсь зэмлыкъёссэ утьыны сётэмын шуыса.2Нош кинлы со оскыса сётэмын, со мурт оскиськымон луыны кулэ.3Мыным нокыӵе но уг поты, кызьы тӥ монэ судить кариськоды, яке кызьы мукет адямиос судить каро; мон ачим но асме судить уг кариськы.4Аслэсьтым номыр но сыӵе-таӵе сьӧлыко ужъёсме уг тодӥськы, но озьы ке но мон асме шонере поттыны уг выриськы: Кузё-Инмар уго мынам судьяе.5Соин ик, Кузё-Инмар лыктытозь, дырыз вуытэк, нокинэ, ноку но судить эн каре. Пеймыт азе ватӥськемез Со югдытоз но сюлэмлэсь малпанъёссэ шарае поттоз. Соку котькудзэ солэн ужезъя Инмар ушъялоз, сӥлы кароз.

6Тае мон, агай-вынъёсы, ачим сярысь, Аполлос сярысь верасько, тӥледлы ӟеч мед луоз шуыса, милесьтым адӟем карыса, тӥ мед дышысалды валаны та кылъёсты: «Мар гожтэмын, солэн сьӧраз потыны уг яра», вылтӥяськисесь-ушъяськисесь медад луэ, одӥгзэ адямиез мукетызлэсь вылӥе медад пуктэ шуыса.7Зэмзэ ик, кин тонэ вылӥе пуктӥз? Маид тынад вань, ваньзэ сое тыныд Инмар ӧз сёты-а? Нош басьтӥд ке, мар бен ушъяськиськод, – ваньмыз со кузьым ӧвӧл шат?8Тӥляд котьмарды вань ини, тӥ узырмиды ни. Тӥ митэк эксэй луиды ни. Э, кыӵе мынам потэ – зэмзэ но тӥ эксэйёс мед луысалды! Ми но тӥледын ӵош эксэйёс кадь мед кузёяськысалмы!9Мон малпасько, милемды, апостолъёсты, ваньмызлэсь сӥтэм-сантэм, виыны сётэм адямиосты кадь Инмар кариз, малы ке шуоно ми шоры быдэс дунне, Кылчинъёс но, адямиос но учкыса уло.10Христос понна ми ”визьтэмъёслы” пӧрмимы, нош тӥ ”визьнодо” христианъёс; ми катьтэммемын, нош тӥ кужмоесь; тӥ дан пӧлын улӥськоды, нош ми – сантэман пӧлын.11Туннэ нуналозь но ми кӧтмы сюмаса, сюмы куасьмыса улӥськомы, ӟустари дӥськутэн ветлӥськомы, жугон-чапконэз чидаськомы, йырмес поныны коркамы ӧвӧл.12Но ужаськомы, асьме киосынымы тыршиськомы. Ми сярысь урод кылъёс верало, ми соосты бакель кариськомы; милемыз улляло, ми чидаськомы;13милемыз тышкасько, нош ми соос понна вӧсяськиськомы; дунне понна ми жуг-жагъёс луимы, туннэ нуналозь ваньмызлэн пыд улаз лёгаськись сюй луимы.

14Тӥледыз возьытэ вуттон понна тае уг гожтӥськы, аслэсьтым яратоно нылпиосме визьман понна гожтӥсько.15Христос бордын тӥляд сюрс ке но дышетӥсьёсты, нош атайёсты трос ӧвӧл: мон тӥледыз, Ӟеч Ивор тодытыса, Иисус Христос бордын вордӥськытӥ.16Соин ик тӥледыз сюлворыса курисько: кызьы мон Христослэсь адӟем карисько, озьы тӥ но мынэсьтым адӟем каре.17Со понна ик мон тӥ доры Тимофеез ыстӥ, Кузё-Инмар бордысь аслэсьтым яратоно, оскиськымон пиме. Со тӥледлы Иисус Христос бордын улэме-тыршеме сярысь вералоз, кызьы мон котькытын, вань черкъёсын дышетӥсько.18Тӥляд куд-огъёсыз вылтӥяськыны кутскизы ни, соос уго малпазы, мон тӥ доры уг ни лыкты шуыса.19Инмарлы кулэ ке луиз, ӝоген мон тӥ доры лыкто. Соку вылтӥяськисьёслэсь кылъёссэс уг эскеры-чакла, соослэсь кужымзэс эскеро-чаклало.20Уго Инмарлэн Эксэйлыкез чебер кылъёс бордын ӧвӧл, со кужым бордын.21Кызьы тӥледлы кулэ? Тӥ доры ньӧрын-а яке яратонэн, востэм-зӥбыт духен-а мыным лыктоно?


предыдущая глава Глава 4 следующая глава