Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 3

3-тӥ ЛЮКЕТ

1Агай-вынъёсы, духовной адямиослы кадь мон тӥледлы ӧй тодыты, лулмугорлэн куронъёсызъя улӥсьёслы, Христос бордысь вож нуныослы кадь тодытӥ.2Чурыт сиёнэн ӧй сюды, мон тӥледыз йӧлын сюдӥ, тӥ уго эшшо кужымтэмесь на вал, али но кужмоесь ӧвӧл на,3малы ке шуоно тӥ лулмугорлэн куронъёсызъя улӥськоды на. Тӥ куспын вожъяськон-ченгешон но керетонъёс вань ке, лулмугорлэн куронъёсызъя улӥсьёс ӧвӧл-а тӥ, адями йылолъёсъя-сямъёсъя тӥ уд лэсьтӥське-а?4Уго, куке огез шуэ: «Мон – Павеллэн», нош мукетыз: «Мон – Аполлослэн», соин ик тӥ лулмугорлэн куронъёсызъя улӥсьёс ӧвӧл-а?5Кин со Павел? Кин со Аполлос? Соос ужась-тыршись ляльчиос гинэ, кудъёсыз пыр тӥ оскыны кутскиды. Ми лэсьтӥмы сое, мае милемлы Кузё-Инмар сётӥз.6Мон мерттӥ, Аполлос ву киськаз, нош будэтӥз – Инмар.7Мерттӥсь но, ву киськась но – олокинъёс ик ӧвӧл, будэтӥсь Инмар гинэ – ваньмызлэсь вылӥ.8Мерттӥсь но, ву киськась но одӥг ужез лэсьто. Соос котькудзы ужамзыя уждун басьтозы.9Ми – Инмарлэн ужасьёсыз, нош тӥ – Инмарлэн бусыез, Инмарлэн лэсьтэм-пуктэмез.

10Инмарлэн мыным сётэм дэлетэзъя, усто лэсьтӥськись кадь, мон инъетсэ пуктӥ, нош мукетыз со ужез азинтоз. Котькудӥз но сак мед учкоз, кызьы со лэсьтоз-пуктоз.11Инъет – со Иисус Христос, со инъет пуктэмын ни, табере мукетыз кулэ ӧвӧл ини.12Та инъет вылэ корка ӝутэ ке, – зарнилэсь, азвесьлэсь, дуно изъёслэсь, пулэсь, турынлэсь, куролэсь, –13котькудӥзлэн ужез одӥг пол тодмо луоз: уго Христослэн лыктон нуналыз тылын усьтӥськоз, нош со тыл котькудӥзлэсь ужзэ эскероз-чаклалоз – ярамон-а, ярантэм-а со уж.14Кинлэн коркаез быдэс кылёз, со мурт мед-кузьым басьтоз.15Кинлэн коркаез ӝуаз, со мурт изъян адӟоз; нош ачиз утиськоз тыл пушкысь утиськисьёс кадь.

16Уд тодӥське шат, тӥ Инмарлэн храмез луиськоды но Инмарлэн Духез тӥ пушкын улэ шуыса?17Кин Инмарлэсь храмзэ куашкатэ, со муртэ Инмар куашкатэ, уго Инмарлэн храмез святой, нош тӥ – Инмарлэн храмез.

18Нокин но ассэ ачиз медаз пӧя: тӥ пӧлысь кин ке таяз дуннеын ассэ визьмо шуыса лыдъя, зэмзэ ик визьмо луон понна со ассэ визьтэм шуыса мед лыдъялоз.19Мае адямиос визьмо шуыса лыдъяло, со Инмар дорын укылтэм шуыса лыдъяське. Гожтэмын уго: «Визьмоосты Инмар, кескич уж лэсьтыкузы, кутылэ».20Тазьы но гожтэмын: «Кузё-Инмар тодэ, визьнодоослэн но малпанъёссы юнме алекъяськон гинэ луэ шуыса».21Соин ик адямиосын нокудды но эн ушъяське, уго ваньмыз – тӥляд.22Павел но, Аполлос но, Кифа но, таиз дунне но, улон но, кулон но, туннэ нунал но, вуоноез вапум но – ваньмыз тӥляд;23нош тӥ – Христослэн, нош Христос – Инмарлэн.


предыдущая глава Глава 3 следующая глава