Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН КОРИНФ КАРЫН УЛӤСЬЁСЛЫ ЫСТЭМ НЫРЫСЕТӤ ГОЖТЭТЭЗ

Глава 1

1-тӥ ЛЮКЕТ

1Инмарлэн эрикеныз Иисус Христослы апостол луыны ӧтем Павеллэсь но Сосфен братмылэсь, –2Инмарлэн Коринфысь черкезлы, Иисус Христос пыр дун-чылкыт луэмъёслы, вӧсяськисьёс радэ ӧтемъёслы, – вань интыосын улӥсьёслы, кинъёс Кузё-Инмарлы Иисус Христослы оскыса йыбыртто – соослэн но, асьмелэн но Кузё-Инмармылы.3Инмар Атаймылэн но Кузё-Инмарлэн Иисус Христослэн дэлетэз, каньыллыкез ваньдылы мед луоз.

4Тӥ понна дугдылытэк Инмарлы тау карисько: Иисус Христос пыр Инмарлэн тӥледлы сётэм дэлетэз понна,5малы ке шуоно Иисус Христос бордын тӥ котьмаин узырмиды – котькыӵе кылэн но, котькыӵе тодон-валанэн но.6Христос сярысь тодытон тӥ пушкын юнматскиз.7Озьы, Кузё-Инмармылэсь Иисус Христослэсь лыктонзэ возьмаса улыкуды, табере тӥляд дэлет-кузьым басьтонын нокыӵе кулэяськонды ӧвӧл ини.8Со тӥледыз пумозяз юнматоз, Кузё-Инмармылэн Иисус Христослэн лыктон нуналаз дун-шектэмесь мед луоды шуыса.9Оскиськымон Инмар, Со тӥледыз Аслаз Пиеныз Иисус Христосэн Кузё-Инмаренымы кусып возьыны ӧтиз.

10Агай-вынъёсы, Кузё-Инмармылэн Иисус Христослэн нимыныз тӥледыз сюлворыса курисько: ваньды тӥ огкылысь улэ, куспады люкиськылонъёс медаз луэ. Одӥг духен, одӥг малпанъёсын тӥ герӟаськемын мед луоды.11Хлоиялэн гуртоосыз пыр, агай-вынъёсы, мыным тодмо луиз, тӥ куспын ченгешонъёс вань шуыса.12Мон вераны турттӥсько та пумысен: тӥ пӧлысь одӥгез шуэ: «Мон Павеллэн»; мукетыз – «Мон Аполлослэн»; куинетӥез – «Мон Кифалэн»; ньылетӥез – «Нош мон Христослэн».13Христос люкиськиз шат? Тӥ понна Павел кортӵогаськиз шат? Яке, Павеллэн нимыз понна-а тӥледыз пылатӥзы?14Инмарлы тау карисько, Криспен Гаиез сяна, тӥ пӧлысь нокинэ но ӧй пылаты.15Нокин но вераны уг быгаты, соосты мон аслам нимы понна пылатӥ шуыса.16Стефанлэсь семьязэ пылатӥ на; эшшо кинэ ке пылатӥ на-а, – тодам уг лыкты.17Уго Христос монэ пылатыны ӧз ысты, Со монэ Ӟеч Ивор тодытыны ыстӥз, адями визьлыклэн чебер кылъёсыныз ӧвӧл, Христослэн киросэзлэсь кужымзэ быдтонтэм понна.

18Уго быронэ сюроноослы кирос сярысь вераськод ке, визьзэ ыштэм, шуо, нош асьмелы, утиськон сюрес вылтӥ мынӥсьёслы, кирос – со Инмарлэн кужымез.19Гожтэмын уго:

«Визьнодоослэсь визьлыксэс быдто,
валасьёслэсь валанзэс палэнто».

20Кытын визьнодоос? Кытын трос тодӥсьёс? Кытын та даурлэн философъёсыз? Та дуннелэсь визьлыксэ визьтэмъяськон луэ шуыса, Инмар ӧз возьматы-а?21Уго, куке дунне аслаз визьмыз пыр Инмарлэн визьмолэсь визьмолыкеныз Инмарез тодманы ӧз быгаты, соку осконтэм тодытонлы оскисьёсты утьыны Инмар мылкыд кариз.22Иудейёс паймымон ужъёсты мед возьматомы шуыса куро, нош эллинъёс визьлык утчало.23Нош ми кортӵогам Иисус сярысь тодытӥськомы, иудейёс понна со канжаськон из, нош эллинъёс понна – осконтэм вераськон.24Нош асьсэлы, Инмарлэн ӧтемъёсызлы, иудейёслы но, эллинъёслы но, Христос – со Инмар кужымез возьматӥсь, Инмар бордысь потэм визьмолык;25малы ке шуоно Инмарлэн ”визьмотэмез” но адямиослэсь визьмогес, Инмарлэн ”кужымтэмез” но адямиослэсь кужмогес.

26Агай-вынъёсы, тодады вае ай, тӥледыз Инмар ӧтьыку, кыӵеесь тӥ вал: тӥ пӧлын трос дышетскемъёсыз но уно ӧй вал, кужмо кивалтӥсьёсыз но трос ӧй вал, йӧноосыз но трос ӧй вал.27Нош Инмар визьмоосты возьытэ вуттон понна дуннелэсь визьмо луисьтэмзэ бырйиз. Кужмо луисез возьытэ вуттон понна Инмар дуннелэсь кужмо луисьтэмзэ бырйиз.28Инмар сӥё-дано луисьтэмзэ, ултӥямъёсты, номырин но тодмо луисьтэмзэ бырйиз, – адямиослэсь малпам нимо-дано луоноез быдтон понна,29нокин но Инмар азьын медаз ушъяськы шуыса.30Инмарлэн юрттэменыз, тӥ али Христос Иисус борды герӟаськемын, Со Инмар бордысен потэм асьме понна визьмолэсь визьмолык, шонерлык, дун-сьӧлыктэм улон но сьӧлыкъёслэсь мозмытскон луэ.31Священной Гожтэмын кадь мед луоз: «Ушъяськиськод ке, Кузё-Инмарен ушъяськы».


предыдущая глава Глава 1 следующая глава